SİYASƏT
Ulu öndər Heydər Əliyevin anadan olmasının 92-ci ildönümü Polşada da qeyd edilib
Bakı, 12 may, AZƏRTAC
Azərbaycanın Polşadakı səfirliyi və Azərbaycan-Slavyan Gəncləri Assosiasiyası (ASGA) ümummilli lider Heydər Əliyevin anadan olmasının 92-ci ildönümünə həsr edilən tədbir keçirib.
Səfirlikdən AZƏRTAC-a verilən məlumata görə, “Heydər Əliyev polyakların gözü ilə” adlı tədbirdən əvvəl Polşada təhsil alan azərbaycanlı tələbələrin Varşavanın mərkəzindən diplomatik nümayəndəliyə doğru veloturu keçirilib. Üzərlərində Azərbaycan bayrağı olan velotur iştirakçıları bir neçə kilometr məsafə qət etdikdən sonra səfirliyə daxil olublar.
Tədbirdə səfir Həsən Həsənov ulu öndər Heydər Əliyevin həyat və fəaliyyətindən danışıb. O deyib ki, Heydər Əliyev birinci dəfə hakimiyyətə gələndən sonra Azərbaycan iqtisadiyyatında yeni bir səhifə açıldı. Bütün sahələr inkişaf etməyə başladı. 1990-cı illərin əvvəllərində isə Azərbaycanda baş verən hadisələrin fonunda ölkəmizi yalnız və yalnız Heydər Əliyev kimi nadir şəxsiyyət xilas edə bilərdi. Onun ikinci dəfə hakimiyyətə qayıdışı məhv olmaq təhlükəsi ilə üzləşən Azərbaycanı xilas etdi. Onun yaratdığı, formalaşdırdığı siyasi və iqtisadi kurs Prezident İlham Əliyev tərəfindən uğurla davam etdirilir.
ASGA-nın sədri Səbuhi Abbasov çıxış edərək ümummilli lider Heydər Əliyevin xalqın təkidli tələbi ilə ikinci dəfə hakimiyyətə qayıdışının Azərbaycan üçün böyük qurtuluş olduğunu deyib. O vurğulayıb ki, ulu öndər Heydər Əliyevin həyata keçirdiyi ən önəmli islahatlardan biri də gənclər siyasətinin və proqramının işlənib hazırlanması oldu. Bu siyasət bu gün də davam etdirilir. Azərbaycanda gənclərə yüksək səviyyədə diqqət və qayğı göstərilir. Bu gün Azərbaycan gəncliyi informativ və innovativ biliklərinə görə dünyada ön sıradadır.
Sonra ümummilli lider Heydər Əliyevin həyat və fəaliyyətindən bəhs edən film göstərilib.
Tədbirdə ASGA-nın idarə heyəti adından Həsən Həsənova “Sülh səfiri” mükafatı təqdim olunub.
Bundan başqa, veloturda iştirak edən, Polşada təhsil alan azərbaycanlı gənclərə sertifikatlar verilib.
“Heydər Əliyev polyakların gözü ilə” tədbiri Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə dəstəyi ilə həyata keçirilir. Layihə çərçivəsində, eyni zamanda, Varşavanın mərkəzində “Heydər Əliyev polyakların gözü ilə” və “Bakı-2015”: Birinci Avropa Oyunları polyakların gözü ilə” adlı sərgilərin keçirilməsi də planlaşdırılıb.