Bakı, 25 may, AZƏRTAC

“Bakı-2015” birinci Avropa Oyunlarının başlanmasına artıq sayılı günlər qalır. Bu mötəbər idman tədbirində Avropanın 6 mindən artıq atleti 253 dəst medal uğrunda mübarizə aparacaq. Gərgin idman yarışlarının ayrılmaz parçası olan könüllülər də birinci Avropa Oyunlarına böyük əzmlə hazırlaşırlar. Minlərlə gənc, eyni zamanda, yerli və xarici namizədlər bu fürsətdən istifadə edərək “Bakı-2015”də müxtəlif sahələrdə könüllü kimi fəaliyyət göstərə biləcəklər. “Bakı-2015”in “Alovqoruyanlar” (könüllülər) proqramına rəsmi olaraq, ötən il iyunun 12-də start verilib. Bu müddətdə iştirak üçün 30 mindən çox müraciət daxil olub. Könüllü olmaq istəyənlərlə müsahibələr aprelin sonunadək davam etdirilib.

Birinci Avropa Oyunları müddətində “Alovqoruyanlar” əsas rolları icra edəcək, idmançılara və yüksək vəzifəli şəxslərə kömək göstərəcək, idman yarışlarında çalışacaq, tamaşaçılara və media nümayəndələrinə yardım edəcəklər. Avropa Oyunlarının könüllü proqramı gənclərin “Bakı-2015”ə qoşulması və beynəlxalq arenada ölkəmizi dəstəkləməsi üçün gözəl imkandır.

“Bakı-2015” birinci Avropa Oyunlarında könüllü kimi fəaliyyət göstərən Aysel Əsədova bu vəzifənin onun gələcək karyerasında mühüm dönüş yaradacağını bildirib. Gənc könüllü bu barədə deyib: “Ölkəmizin ev sahibliyi edəcəyi, tarixdə ilk dəfə təşkil olunacaq belə mötəbər yarışın - birinci Avropa Oyunlarının bir parçası olmağım üçün çox xoşbəxtəm. Birinci Avropa Oyunlarına könüllülərin cəlb olunması xəbərini rəfiqəmdən eşitdim. Əvvəlcə, bu qədər maraqlı olacağını fikirləşmirdim. Ancaq indi buradakı ab-havanı, xoş ünsiyyəti və mehribanlığı gördükdən sonra “Alovqoruyanlar”ın sırasına qoşulduğum üçün çox sevinirəm”.

Aysel Əsədova qeyd edib ki, birinci Avropa Oyunları kimi genişmiqyaslı bir tədbiri könüllülərin dəstəyi olmadan keçirmək çətindir. “Alovqoruyanlar” rolunda könüllü kimi çalışmaq Avropa Oyunları ruhunun bir hissəsinə çevrilmək üçün yaxşı fürsətdir. Birinci Avropa Oyunları gənclərin bacarığını, peşəkarlığını, işgüzarlığını və dostluq əlaqələrini inkişaf etdirməyə imkan yaradacaq. Əlli ölkədən idmançıların qatılacağı birinci Avropa Oyunlarında bizim üçün geniş imkanlar açılacaq. Biz müxtəlif ölkələrin mədəniyyəti, tarixi və incəsənəti haqqında ətraflı fikir mübadiləsinə hazır olmalıyıq. Təbii ki, gələcək qonaqlara Ermənistanın Azərbaycana qarşı təcavüzü haqqında dolğun məlumat verəcəyik. Həmçinin xarici dil bacarığımızı, ünsiyyət qabiliyyətimizi inkişaf etdirməyimiz gələcəkdə karyeramız üçün uğurlu başlanğıc olacaq.

“Könüllülük işi sevərək etmək deməkdir. Bu, həm də bizə gələcəkdə öz işimizi sevməyi də öyrədəcək. Üç vəzifə və bir məkan təlimində iştirak etdik. Bu təlimlər bizə işimizin nədən ibarət olduğunu anlamağa çox kömək etdi. Təlimləri həm yerli, həm də xarici mütəxəssislər birgə həyata keçirdilər. Məkan təlimi isə ərazini yaxşı tanımaq və daha operativ xidmət göstərməyimiz üçün yaxşı fürsət oldu”, deyə Aysel Əsədova deyib.

Birinci Avropa Oyunlarının digər könüllüsü Nurlan İsmayılov ali məktəbə qəbul olunduğu ildən könüllü kimi fəaliyyət göstərdiyini diqqətə çatdırıb. O vurğulayıb ki, birinci Avropa Oyunlarında könüllü kimi fəaliyyət göstərmək əslində çox qürurvericidir. Əldə edəcəyim təcrübə və dünyagörüşü gələcəkdə iş karyeramda müsbət təsirini göstərəcək. “Bakı-2015”ə müraciət haqında ilk dəfə dostlarımdan eşitdim. Heç bir tərəddüd etmədən “Bakı-2015”ə müraciət etdim. Bu tədbirin maraqlı olacağını əvvəlcədən bilirdim. Çünki yeni dostlarla tanışlıq və ünsiyyət qabiliyyətinin təkmilləşdirilməsi mənim üçün çox önəmlidir. Mən digər dostlarımı da könüllü olmağa dəvət etdim.

Konüllülər üçün təlimlərin keçirildiyini bildirən Nurlan İsmayılov deyib ki, ilk Avropa Oyunlarının könüllülük proqramının gənclərin “Bakı-2015”ə qoşulması və beynəlxalq arenada ölkəmizi dəstəkləməsi üçün gözəl imkan yaradır. Bütün “Alovqoruyanlar” Azərbaycanda çoxnövlü böyük idman yarışı çərçivəsində daimi irs qoyan proqram sayəsində ölkəmizin tarixindəki bu möhtəşəm anı paylaşacaq və şəxsi karyeramız üçün mühüm təcrübə qazanacaqlar.

Birinci Avropa Oyunları kimi çoxnövlü idman yarışlarında çalışacaq “Alovqoruyanlar” təlimlərdə iştirak etmək, “Bakı-2015” uniformalarını ödənişsiz əldə etmək, obyektlərə ictimai nəqliyyatla ödənişsiz getmək, qida və Oyunların könüllü proqramının rəsmi tərəfdaşı olan “Nar Mobile” şirkəti tərəfindən nömrələrlə təmin edilmək və s. fürsətlərdən yararlanırlar.