SİYASƏT
Sankt-Peterburqda Azərbaycanın milli bayramına –Respublika Gününə həsr edilmiş rəsmi qəbul olub
Moskva, 27 may, AZƏRTAC
Mayın 26-da Sankt-Peterburqda “Bakı” Azərbaycan Kulinariyası Mərkəzində Azərbaycan Demokratik Respublikasının yaranmasının 97-ci ildönümünə həsr edilmiş rəsmi qəbul olub. Tədbir Azərbaycan Respublikasının Sankt-Peterburqdakı baş konsulluğu tərəfindən təşkil edilib.
Konsulluğun mətbuat xidməti xəbər verir ki, Respublika Günü bayramında Sankt-Peterburq və Leninqrad Vilayəti Administrasiyasının, Rusiya XİN-in nümayəndələri, qanunvericilik məclisinin deputatları, şəhər və vilayət ictimaiyyətinin, Azərbaycan diasporunun nümayəndələri iştirak ediblər.
Azərbaycanın Sankt-Peterburqdakı baş konsulu Elşad Qulamov 1918-ci ildə Şərqdə ilk demokratik respublikanın yaranmasından danışıb və bildirib ki, bu, Azərbaycanın şanlı tarixində böyük mərhələnin əsasını qoyub. Diplomat həmçinin XX əsrin 90-cı illərinin əvvəllərində Azərbaycan dövlətçiliyinin təşəkkülündə ümummilli lider Heydər Əliyevin misilsiz rolunu və hazırda Prezident İlham Əliyev tərəfindən uğurla davam etdirilən bu siyasətin ardıcıllığını qeyd edib. E.Qulamov Böyük Vətən müharibəsində ümumi qələbəyə Azərbaycan xalqının çox böyük kömək göstərdiyini xüsusi vurğulayıb.
Baş konsul öz çıxışının sonunda iyunun 12-28-də Bakıda keçiriləcək birinci Avropa Oyunlarına hazırlıqdan danışıb. O qeyd edib ki, yarışların iştirakçıları və qonaqları üçün ən rahat şərait yaradılıb. Onlar qitənin çox mühüm idman hadisəsindən zövq alacaq, Azərbaycanın qədim tarixi və mədəniyyəti ilə tanış olacaqlar.
Sankt-Peterburq Xarici Əlaqələr Komitəsinin sədri Yevgeni Qriqoryev Sankt-Peterburqun qubernatoru Georgi Poltavçenkonun təbrik məktubunu oxuyub. Məktubda Sankt-Peterburq hökuməti ilə Azərbaycan hökuməti arasında əməkdaşlığa və qarşılıqlı faydalı münasibətlərin daha da inkişaf etdirilməsinə böyük diqqət yetirildiyi qeyd olunub.
Leninqrad vilayəti Xarici Əlaqələr Komitəsi rəhbərinin birinci müavini İnna Biqotskaya Leninqrad vilayətinin qubernatoru Aleksandr Drozdenko adından iştirakçıları təbrik edib. Təbrikdə əlaqələrin genişləndirilməsinə və əməkdaşlığın zəngin potensialının aşkara çıxarılmasına maraq göstərildiyi ifadə olunub.
Sankt-Peterburq Qanunvericilik Məclisinin beynəlxalq əlaqələr üzrə səlahiyyətli nümayəndəsi, deputat Tatyana Zaxarenkova Sankt-Peterburq Qanunvericilik Məclisinin sədri Vyaçeslav Makarovun təbrik məktubunu oxuyub. Məktubda suveren demokratik dövlət quruculuğu yolunda Azərbaycanın qazandığı nailiyyətlər, habelə Rusiya üçün daim əhəmiyyət kəsb edən Azərbaycan ilə tarixi dostluq, mehriban qonşuluq və qarşılıqlı faydalı əməkdaşlıq ənənələri xüsusi qeyd olunub.
Toplaşanlara birinci Avropa Oyunlarına həsr olunmuş videoçarxlar göstərilib.
Fəridə Abdullayeva
AZƏRTAC-ın xüsusi müxbiri
Moskva