CƏMİYYƏT
8 mart – Beynəlxalq Qadınlar günü Səbail rayonunda qeyd edilib
Bak, 6 mart, AZƏRTAC
Səbail Rayon İcra Hakimiyyəti tərəfindən 8 mart – Beynəlxalq Qadınlar Günü münasibətilə bayram tədbiri təşkil edilib.
İcra hakimiyyətindən AZƏRTAC-a bildirilib ki, tədbirdə rayonun ictimai-siyasi həyatında fəal iştirak edən dövlət, elm və təhsil, səhiyyə, mədəniyyət və digər sahələrdə çalışan, həmçinin bir çox ictimai təşkilat və birliklərə rəhbərlik edən qadınlar iştirak ediblər.
Səbail Rayon İcra Hakimiyyətinin başçısı Asif Əsgərov əlamətdar günün tarixi barədə məlumat verib.
İcra başçısı qeyd edib ki, ümummilli liderimiz Heydər Əliyev həmişə Azərbaycan qadınının zəhmətini, fəaliyyətini çox yüksək qiymətləndirib, qadınlara hər zaman böyük hörmət və ehtiramla yanaşıb.
Vurğulanıb ki, müasir dövrümüzdə Azərbaycan qadını ölkənin ictimai-siyasi həyatında fəal rol oynayır. Bu gün Heydər Əliyev Fondunun prezidenti Mehriban Əliyeva bütün dünyaya sübut edir ki, Azərbaycan qadını həm gözəl ana, həm də fəal ictimai xadim ola bilər.
Tədbirdə qeyd olunub ki, Böyük Vətən müharibəsi illərində qadınlarımız kişilərlə bərabər böyük qəhrəmanlıq və fədakarlıq göstərərək qələbənin əldə olunmasında böyük əmək, qüvvə və bacarıq sərf ediblər. Bu gün ölkə həyatının müxtəlif sahələrində çalışanların böyük bir hissəsini qadınlar təşkil edir.
Məlumat verilib ki, Səbail rayonunda əhalinin 51 faizini qadınlar təşkil edir. Rayonun təhsil, səhiyyə, mədəniyyət, elm və digər sahələrində çalışan qadınlarımız öz bilik və bacarıqları, işgüzarlıqları və rayonun ictimai-siyasi həyatındakı fəaliyyətləri ilə hər zaman seçilirlər. Onların fəaliyyəti ölkə rəhbərliyi tərəfindən yüksək qiymətləndirilir. Son bir neçə il ərzində rayonun təkcə təhsil müəssisələrində çalışan qadınlardan 38-i Əməkdar Müəllim adına, biri Prezident təqaüdünə, 27-si müxtəlif orden və medallara layiq görülüb. Elm, təhsil, səhiyyə ocaqlarında yüzlərlə elmlər doktoru və elmlər namizədləri çalışır.
İcra hakimiyyəti adından qadınlara hədiyyələr təqdim olunub.
Tədbir konsert proqramı ilə davam etdirilib.