İQTİSADİYYAT


8 noyabr – Metropoliten işçilərinin peşə bayramı günüdür

A+ A

Bakı, 8 noyabr, AZƏRTAC

Kütləvi sərnişin daşınmasında şəhər əhalisi üçün mühüm əhəmiyyət kəsb edən Bakı Metropoliteni 49 il əvvəl ilk metro qatarının hərəkətə gətirilməsi ilə fəaliyyətə başlayıb və həmin gün paytaxt Bakının tarixinə əlamətdar gün kimi daxil olub. 1967-ci il noyabrın 6-da 5 stansiyadan – “Bakı Soveti” (indiki – “İçərişəhər”), “26 Bakı komissarı” (indiki – “Sahil”), “28 Aprel” (indiki – “28 May”), “Gənclik” və “Nəriman Nərimanov” stansiyalarından ibarət 9,2 kilometrlik yeraltı xətti istifadəyə verilən və o vaxtdan böyük inkişaf yolu keçən Bakı Metropoliteninin hazırda 36,6 kilometr uzunluğunda 3 xətti, 25 stansiyası və bir elektrik deposu var. Paytaxt sakinlərinə və qonaqlarına göstərilən yüksək xidmət mədəniyyəti sayəsində yeraltı dəmiryolu şəhər nəqliyyatı sistemində layiqli yerini tutaraq sevilən ictimai nəqliyyata çevrilib.

Bakı Metropoliteninin zəhmətkeş kollektivinin əməyi dövlət tərəfindən həmişə yüksək qiymətləndirilib. Prezident İlham Əliyevin 28 oktyabr 2006-cı il fərmanı ilə noyabrın 8-i Metropoliten işçilərinin peşə bayramı günüdür.

AZƏRTAC xəbər verir ki, Bakı Metropoliteninin istismara verilməsinin 49-cu ildönümü və 8 noyabr – Metropoliten işçilərinin peşə bayramı münasibətilə “Bakı Metropoliteni” QSC-nin kollektivi Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad edib, məzarı önünə əklil və gül dəstələri qoyub.

Görkəmli oftalmoloq alim, akademik Zərifə Əliyevanın da xatirəsi anılıb, məzarı üzərinə tər güllər düzülüb.

Metropolitençilər Şəhidlər xiyabanında Azərbaycan müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad edərək, onların, o cümlədən “20 Yanvar” tarixinin metropolitençi şəhidləri İlqar Qarayevin və Əflatun Kazımovun məzarları önünə güllər düzüblər.

Metropolitenin fəaliyyətə başlamasının ildönümü və peşə bayramı münasibətilə “Bakı Metropoliteni” QSC-nin idarə aparatının iclas zalında mərasim keçirilib. QSC-nin sədri Zaur Hüseynov Prezident İlham Əliyevin imzaladığı sərəncamlarla bir qrup metropolitençinin “Əməkdar mühəndis” fəxri adına və “Tərəqqi” medalına layiq görüldüyünü deyib. Bu yüksək etimada layiq görülənləri təbrik edən sədr metropolitenin daim dövlətin diqqət və qayğısının mərkəzində olduğunu qeyd edib.

Sonra tədbir iştirakçıları metropolitenin tarixindən və hazırkı fəaliyyətindən bəhs edən filmə tamaşa ediblər. Filmdə metropolitenin tarixi ilə yanaşı, istər Sovet Azərbaycanına rəhbərlik etdiyi illərdə, istərsə də müstəqillik dövründə ümummilli lider Heydər Əliyevin metropolitenin inkişafına, genişlənib böyüməsinə göstərdiyi diqqət, metropolitençi əməyinə verdiyi yüksək qiymətdən bəhs olunub. Həmin ənənələrə sadiq qalan Prezident İlham Əliyevin diqqət və qayğısı nəticəsində son illər müasir dövrün tələblərinə uyğun inşa olunub sakinlərin istifadəsinə verilən yeni stansiyalar, həmçinin istismarda olan mövcud stansiyaların yenidən qurulması haqqında süjetlər filmdə yer alıb.

Bakı Metropoliteni haqqında filmin nümayişindən sonra “Bakı Metropoliteni” QSC sədrinin müavini Hidayət Məmmədov, tikinti departamentinin aparıcı texnoloqu Kamal Cəfərov, satınalmaların təşkili və müqavilələr şöbəsinin meneceri Aidə Cəfərova, Metropoliten İşçiləri Həmkarlar İttifaqının (MİHİ) sədri Arif Mərdanov çıxışlarında bu əlamətdar gün münasibətilə hər bir metropolitençini təbrik edərək fikirlərini bölüşüblər.

MİHİ sədri nitqini “İlin ən yaxşı qatar maşinisti” mükafatının təsis edilməsi ilə bağlı məlumatla bitirib. A.Mərdanov sədr Zaur Hüseynovla birlikdə nominasiyanın qalibi - Elman Məmməd oğlu Musayevə mükafatı təqdim edib.

Həmçinin ilk dəfə müəssisə rəhbərliyinin qərarı ilə yüksək əmək nailiyyətlərinə, vəzifə borcunu vicdanla yerinə yetirərək, işdə təşəbbüskarlıq göstərdiyinə görə, “Bakı Metropoliteni” QSC-nin bir qrup əməkdaşı “Fəxri metropolitençi” adına layiq görülüb. Bu münasibətlə bu ada layiq görülən metropolitençilərə diplomlar təqdim olunub.

Z.Hüseynov metropolitenin fəaliyyəti dövründə onun perspektivi naminə dövlətin qayğısı və diqqətindən də ətraflı bəhs edərək, bunu yeraltı yollarımızın inkişafına istiqamətverici töhfə adlandırıb. Yarım əsrə yaxın müddət ərzində paytaxt sakinlərinə nümunəvi nəqliyyat xidməti göstərən metropolitençilərin bundan sonra da ölkə rəhbərliyinin yüksək etimadını doğruldaraq, bacarıq və qüvvəsini əsirgəməyəcəyinə əminliyini ifadə edib.

QSC-nin sədri peşə bayramı münasibətilə kollektivə təbrikini çatdıraraq, hər bir metropolitençiyə möhkəm cansağlığı, doğma Vətənimizin qüdrəti və çiçəklənməsi naminə işlərində uğurlar arzulayıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.