REGİONLAR


Xocavənd rayonu üzrə sosial-iqtisadi göstəricilər təhlil edilib

Beyləqan, 12 fevral, AZƏRTAC 

Ərazisi işğal altında olan Xocavənd rayonunun azərbaycanlı əhalisi respublikanın 37 şəhər və rayonunda məskunlaşıb. Xocavəndli məcburi köçkünlər əsasən Beyləqan rayonu ərazisində yerləşən “Xocavənd”, “Yeni Xocavənd“, “Yeni Tuğ”, “Qaradağlı”, 320 ailəlik qəsəbələrdə, Ağcabədi rayonu ərazisində salınmış yaşayış massivində kompakt şəkildə yaşayırlar. 2015-ci ildə Xocavənd rayonundan olan məcburi köçkünlərdən Bakı şəhəri üzrə 8 ailə, Mingəçevir şəhəri üzrə 9 ailə, Bərdə rayonu üzrə 3 ailə, Saatlı rayonu üzrə 1 ailə, Beyləqan rayonu üzrə isə 5 ailə yeni mənzillərlə təmin edilib.

AZƏRTAC xəbər verir ki, bu fikirlər Xocavənd rayonu üzrə 2015-ci ilin yekunlarına həsr olunan yığıncaqda səsləndirilib.

Yığıncaq iştirakçıları əvvəlcə ümummilli lider Heydər Əliyevin Xocavənd qəsəbəsindəki abidəsi önünə gül dəstələri qoyub, mədəniyyət evinin qarşısında ötən il görülən işlər və keçirilən tədbirlərdən ibarət fotostendlərə baxıblar.

Rayon icra hakimiyyətinin başçısı Eyvaz Hüseynovun hesabat məruzəsində və çıxışlarda rayonun sosial-iqtisadi göstəriciləri təhlil olunub, xocavəndli məcburi köçkünlərin həyat şəraitinin yaxşılaşdırılması istiqamətində görülən işlərdən bəhs edilib. Bildirilib ki, hesabat dövründə Xocavənd qəsəbəsinin uzunluğu 5,6 kilometr olan giriş və mərkəzi yolu asfaltlanıb, Kuropatkin kənd uşaq bağçasının binası və Salakətin kənd tam orta məktəbinin istilik sistemi təmir edilib. İl ərzində rayonda ümumilikdə 4594 ağac əkilib. Yeni Xocavənd qəsəbəsinin daxili yollarının qum-çınqılla təmirinə başlanılıb. Hazırda Xocavənd qəsəbəsinin abadlaşdırılması və idman zalının tikintisi davam etdirilir.

Yığıncaqda qeyd olunub ki, rayon məşğulluq mərkəzinə 142 işaxtaran vətəndaş müraciət edib, onlardan 117 nəfəri işlə təmin olunub. 320 ailəlik qəsəbədə xalçaçılıq kursları təşkil edilib.

Diqqətə çatdırılıb ki, 2015-ci ildə rayonun təsərrüfatlarında 2035 baş iribuynuzlu mal-qara, 15 min 200 baş qoyun və keçi olub. Bu dövrdə 3050 sentner ət, 16 min 796 sentner süd, 362 sentner yun istehsal edilib. Rayon üzrə 5157 hektar buğda sahəsindən 160 min 898,4 sentner, 317 hektar arpa sahəsindən 8115,2 sentner məhsul götürülüb. Bundan başqa, fermerlər tərəfindən 1725 sentner kartof, 8765,5 sentner tərəvəz, 2633 sentner bostan məhsulları istehsal edilib.

İclasda digər çıxış edənlər təmsil etdikləri ayrı-ayrı sahələr üzrə görülən işlər barədə məlumat verib, qarşıda duran vəzifələrin həlli ilə bağlı təkliflər irəli sürüblər. Bildirilib ki, Xocavənd sakinləri bundan sonra da Prezident İlham Əliyev tərəfindən qarşıya qoyulmuş vəzifələrin icrasında fəal mövqe nümayiş etdirəcək, Azərbaycanın daha da çiçəklənməsi və qüdrətlənməsi naminə əllərindən gələni əsirgəməyəcəklər.

Hesabat yığıncağında Prezident Administrasiyasının məsul əməkdaşı Ağaəli Əhmədov və Milli Məclisin deputatı Elman Məmmədov çıxış ediblər.

Sonda qərar layihəsi oxunub, yığıncaq iştirakçıları adından Prezident İlham Əliyevə müraciət qəbul edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.