“Qarabağa yaz gələcək” devizi altında ordu ilə xalqın birlik bayramı keçirilib
Bakı, 12 mart, AZƏRTAC
Silahlı Qüvvələrdə Novruz bayramının keçirilməsi ilə bağlı müdafiə naziri general-polkovnik Zakir Həsənovun təsdiq etdiyi tədbirlər planına əsasən, ilk teatrlaşdırılmış kütləvi hərbi vətənpərvərlik mərasimi Xocavənd Rayon İcra Hakimiyyəti ilə birgə təşkil edilib.
Müdafiə Nazirliyinin mətbuat xidmətindən AZƏRTAC-a bildiriblər ki, “Qarabağa yaz gələcək” devizi altında təşkil olunan ordu ilə xalqın birlik bayramı yeni salınmış Xocavənd qəsəbəsində keçirilib.
Bayraq meydanına doğru hərəkət edən yürüş iştirakçıları əvvəlcə xalqımızın ümummilli lideri Heydər Əliyevin abidəsini ziyarət edərək önünə gül dəstələri düzüb, Ulu Öndərin xatirəsini dərin hörmət və ehtiramla yad ediblər.
Bayraq meydanına toplaşan böyük izdiham Müdafiə Nazirliyi rəsmilərini, Milli Məclisin deputatlarını, Xocavənd uğrunda döyüşlərin iştirakçılarını, müharibə veteranlarını və əlillərini alqışlarla qarşılayıb.
Əməkdar incəsənət xadimi Abdulla Qurbaninin ssenarisi və rejissorluğu ilə keçirilən tədbir ordu ilə xalqın monolit birliyinin nümayişi olmaqla yanaşı, həm də tamaşaçılara tezliklə Qarabağın azad olunacağı inamını aşılayıb.
Mərasimdə Silahlı Qüvvələrin Təlim və Tədris Mərkəzinin hərbi orkestri “Azərbaycan fanfarası”nı ifa edib. Silahlı Qüvvələrin Mahnı və Rəqs Ansamblının, rayon Mədəniyyət və Turizm, Təhsil şöbələrinin birləşmiş özfəaliyyət kollektivlərinin, tanınmış incəsənət ustalarının iştirakı ilə keçirilən teatrlaşdırılmış kütləvi vətənpərvərlik mərasimi böyük coşqu ilə qarşılanıb.
Xocavənd Rayon İcra Hakimiyyətinin başçısı Eyvaz Hüseynov çıxış edərək Novruz bayramı ərəfəsində kütləvi vətənpərvərlik tədbirinin böyük əhəmiyyət kəsb etdiyini bildirib. O, bu tədbirin xocavəndlilərə, cəbhə bölgəsində xidmət edən Azərbaycan əsgərinə gözəl Novruz töhfəsi olduğunu vurğulayıb. E.Hüseynov tədbirin təşkilatçısı olan Müdafiə Nazirliyinin rəhbərliyinə minnətdarlığını bildirib.
Müdafiə Nazirliyi Mənəvi-Psixoloji Hazırlıq və İctimaiyyətlə Əlaqələr İdarəsinin rəisi, general-mayor Rasim Əliyev, deputatlar Elman Məmmədov, professor Xanhüseyn Kazımlı, birlik komandiri, polkovnik Mais Bərxudarov, “Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin sədri, ehtiyatda olan polkovnik Mehdi Mehdiyev və başqaları çıxış edərək Azərbaycan ordusunun güc və qüdrətindən, xalqın daim öz ordusuna arxa-dayaq olmasından və hər gün atəşkəs rejiminin pozulmasına baxmayaraq, Vətən müdafiəçilərinin xalqımızı xoş xəbərlərlə sevindirdiyindən qürur duyduqlarını bildiriblər.
Qeyd olunub ki, Xocavənd rayonu nəinki Azərbaycanın, habelə dünyanın ən qədim yaşayış məskənlərindəndir. Azıx və Tağlar mağaraları, neçə-neçə arxeoloji və memarlıq abidələri, alban kilsələri, köhnə qəbiristanlıqlar, pirlər, ocaqlar zaman-zaman dünya səyyah və arxeoloqlarının diqqət mərkəzində olub. Keçmiş Sovet İttifaqı ərazisində ən qədim abidə Xocavənd rayonu ərazisində idi. Rayon 1923-cü ilədək Aşağı Qaranlıq adlandırılıb. Bu ad rayon ərazisindəki Qaranlıq dağından götürülüb. Lakin XIX əsrin sonlarında buraya köçürülmüş ermənilərin hesabına rayonda onların sayı çoxaldılıb, azərbaycanlılar sıxışdırılaraq doğma yurd yerlərindən zorla çıxarılıblar. Ermənilər burada məskunlaşdıqdan sonra rayon Nijni Qaranlıq, Cüməbazarı, Xonaşen, Martuni adlandırılıb. Azərbaycan müstəqilliyini bərpa etdikdən sonra - 1991-ci ildə rayonun adı Xocavənd, yəni “Xocalı nəsli” kimi rəsmiləşdirilib.
Bildirilib ki ,1992-ci ilin oktyabrında Xocavənd rayonu Ermənistan silahlı qüvvələri tərəfindən işğal olunsa da, xocavəndlilər son gülləyə, son ana qədər vuruşub, 146 nəfər şəhid veriblər. Bundan başqa, 300-dən çox insan sağlamlığını itirib və ya əlil olub, 243 uşaq valideynlərindən birini, 68 qadın həyat yoldaşını itirib. Girov götürülmüş 110 dinc sakindən 49-u əsir və girovluqda erməni vəhşiliyinin qurbanı olub, bir ailədən 3 uşaq hər iki valideynini itirib. Azərbaycanlılar yaşayan 10 kənd tamamilə dağıdılaraq viran edilib. Lakin bütün bunlara baxmayaraq, xocavəndlilər ruhdan düşməyib, ümidləri qırılmayıb, Xocavəndə qayıdacaqları günü səbirsizliklə gözləyirlər. İndi Silahlı Qüvvələrimizin bütün qoşun növlərində, xüsusilə cəbhə bölgələrində neçə-neçə xocavəndli Vətən qarşısında əsgəri borcunu şərəf və ləyaqətlə yerinə yetirir, xüsusi təyinatlı hərbi təhsil müəssisələrində hərbi ixtisaslara yiyələnirlər. Xocavəndlilər bu gün də ordumuzla birlikdə Qarabağ uğrunda döyüşlərə atılmaq üçün Ali Baş Komandanın hər bir əmrinə hazırdırlar.
Vizual görüntülərlə müşayiət olunan ordu ilə xalqın birlik bayramında bir-birindən maraqlı ədəbi-musiqili kompozisiyalar, etnoqrafik lövhələr, ordu həyatından səhnələr canlandırılıb.
Bir qrup Qarabağ müharibəsi veteranı və hərbi qulluqçu Müdafiə Nazirliyinin hədiyyələri, “Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin təsis etdiyi “Fədai” medalı ilə təltif olunub.
Tədbirin sonunda bütün iştirakçılar Azərbaycan Respublikasının dövlət himnini birlikdə ifa etməklə Heydər Əliyev ideyalarına, Vətənə, xalqa, dövlətə sadiq və Silahlı Qüvvələrin Ali Baş Komandanı İlham Əliyevin əmrlərinə hər an hazır olduqlarını bir daha bəyan ediblər.
Bölmənin digər xəbərləri
