REGİONLAR
Cəbhə bölgəsinin əli silah tutan sakinləri düşmənlə döyüşə atılmağa hazırdırlar
Cəbhə bölgəsindəki bir sıra yaşayış məntəqələri ermənilər tərəfindən aramsız atəşə tutulur. Mərmilər evlərə düşür, mülki əhali arasında həlak olanlar və yaralananlar var. Lakin sakinlər evlərinin dağılmasna təəssüflənmirlər. “Təki Vətən sağ olsun, torpaqlarımız düşmən tapdağından xilas edilsin” – bu fikirlər cəbhə bölgəsində yerləşən rayonlarda keçirilən yığıncaqlarda xüsusi vurğulanır.
Ağdam, 5 aprel, Tahir Ağaməmmədov, AZƏRTAC
Son günlər cəbhə bölgəsində erməni silahlı birləşmələrinin təxribat əməllərinə Azərbaycan Ordusunun layiqincə cavab verməsi, düşmənin canlı qüvvəsi və hərbi texnikasının darmadağın edilməsi, strateji əhəmiyyətə malik bir neçə yüksəklik və yaşayış məntəqələrinin işğaldan azad edilməsi, Təhlükəsizlik Şurasının toplantısında Azərbaycan Prezidenti, Ali Baş Komandan İlham Əliyevin çıxışı hər bir ölkə vətəndaşında olduğu kimi xocavəndli məcburi köçkünlərdə də böyük ruh yüksəkliyi yaradıb.
AZƏRTAC xəbər verir ki, bu barədə xocavəndli məcburi köçkünlərin məskunlaşdıqları Beyləqan rayonu ərazisindəki Xocavənd qəsəbəsində keçirilən tədbirdə bəhs edilib.
Tədbir iştirakçıları əvvəlcə şəhid olan Vətən övladlarının xatirəsini ehtiramla anıblar.
Xocavənd Rayon İcra Hakimiyyətinin başçısı Eyvaz Hüseynov çıxış edərək, son günlər cəbhədə baş verən hadisələrdən, erməni silahlı birləşmələrinin cəbhəboyu mövqelərimizi və yaşayış məntəqələrini atəşə tutmasından, düşmənə verilən layiqli cavabdan danışıb. Bildirib ki, Azərbaycan ordusunun qısa müddətdə həyata keçirdiyi əks-həmlə zamanı erməni hərbi birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən azad olunub. Döyüşlərdə ermənilərə məxsus xeyli hərbi texnika və canlı qüvvə məhv edilib.
Diqqətə çatdırılıb ki, bu gün xalqımızda əhval-ruhiyyə çox yüksəkdir. Cəbhəyanı zonalarda sakinlər qruplar şəklində toplaşaraq ermənilərlə döyüşməyə gəldiklərini bildirirlər. Hər bir Azərbaycan vətəndaşı öz Vətənini qorumaq, işğal altında olan torpaqlarımızı azad etmək istəyir.
Çıxış edənlər xocavəndlilərin işğal altındakı torpaqlarımızı azad etmək üçün Ali Baş Komandanın əmrinə hər an hazır olduğunu vurğulayaraq, dünya azərbaycanlılarını Prezident İlham Əliyevin ətrafında sıx birləşməyə, dünya ictimaiyyətini isə Azərbaycan xalqına qarşı törədilən ədalətsizliklərə göz yummamağa çağırıblar.
X X X
Ağdam rayonunun Quzanlı qəsəbəsində keçirilən ümumrayon toplantısında rayon ictimaiyyəti, ağsaqqallar, ehtiyatda olan zabitlər, Qarabağ müharibəsi veteranları, gənclər Vətənin müdafiəsində öz həmrəyliklərini nümayiş etdiriblər.
AZƏRTAC xəbər verir ki, Ağdam Rayon İcra Hakimiyyətinin başçısı Raqub Məmmədov, Yeni Azərbaycan Partiyası rayon təşkilatının sədri İsgəndər Quliyev, keçmiş döyüşçülər Şamil Əbilov və Baxşeyiş Hətəmov çıxış edərək, cəbhə xəttindəki son hadisələrdən danışıblar. Bildirilib ki, Qarabağ müharibəsinin bütün ağrılarını çiyinlərində daşıyan Ağdam düşmənə qarşı savaşda minlərlə şəhid verib, torpaqlarımızın müdafiəsi uğrunda fədakarlıq göstərmiş ağdamlılardan 16 nəfəri Azərbaycanın Milli Qəhrəmanı adına layiq görülüb.
Rayon ictimaiyyəti Azərbaycan Respublikası Prezidenti yanında Təhlükəsizlik Şurasının aprelin 2-də keçirilən iclasında Ali Baş Komandan İlham Əliyevin konkret mövqeyini ürəkdən alqışlayır, dövlətimizin başçısının hər bir əmrinə səfərbər olduqlarını bildirirlər.
Vurğulanıb ki, ağdamlılar bu gün də Prezident İlham Əliyevin əmri ilə torpaqlarımızın işğaldan azad edilməsi üçün silaha sarılmağa hazırdırlar.
X X X
Azərbaycan Silahlı Qüvvələrinin son günlərdə erməni işğalçılarının cəbhədəki təxribatının qarşısını qətiyyətlə alması və həyata keçirdiyi uğurlu əməliyyatlar laçınlı məcburi köçkünlərin işğal altında olan torpaqlarımıza böyük qayıdışa inamını daha da artırıb.
AZƏRTAC xəbər verir ki, laçınlı məcburi köçkünlərin müvəqqəti məskunlaşdıqları Ağcabədi rayonu ərazisindəki Taxtakörpü qəsəbəsində keçirilən tədbirdə bu barədə ətraflı söhbət açılıb.
Tədbirdə çıxış edən Laçın Rayon İcra Hakimiyyətinin başçısı səlahiyyətlərini müvəqqəti icra edən, Yeni Azərbaycan Partiyası Laçın rayon təşkilatının sədri Aqil Nəzərli bildirib ki, Azərbaycan ordusunun son uğurları Laçın əhalisinin də böyük ruh yüksəkliyinə səbəb olub.
Bildirilib ki, cəbhəyanı kəndlərdə yaşayan əhalinin orduya olan inamı və etibarının nəticəsidir ki, əhali yaşayış yerini tərk etmir. Döyüşə qatılmaq üçün müraciət edənlərin sayı günbəgün artır, bütün bölgələrdə orduya ümumxalq dəstəyi nümayiş olunur. Ordumuzun uğurlu əməliyyatları, xalq və ordu birliyi deməyə əsas verir ki, torpaqlarımız qısa zamanda işğaldan azad olunacaq.
Birinci Qarabağ savaşı zamanı torpaqlarımızın müdafiəsi uğrunda 300-dən çox şəhid verən, dövlətimizə, onun rəhbərinə sədaqətlə xidmət edən laçınlılar Prezident İlham Əliyevin apardığı daxili və xarici siyasəti daim dəstəklədiklərini, Ali Baş Komandanın ətrafında sıx birləşərək, onun döyüş əmrini gözlədiklərini yekdilliklə vurğulayıb, yaxın vaxtlarda tarixi qələbəni qeyd edəcəklərinə əminliklərini bildiriblər.
X X X
Cəbhə bölgəsində erməni silahlı birləşmələrinin təxribat əməllərinə Azərbaycan Ordusunun layiqincə cavab verməsi, düşmənin canlı qüvvəsi və hərbi texnikasının darmadağın edilməsi, Təhlükəsizlik Şurasının toplantısında Azərbaycan Respublikasının Prezidenti, Ali Baş Komandan İlham Əliyevin çıxışı ölkəmizin hər yerində olduğu kimi, tərtərlilərdə də böyük ruh yüksəkliyi yaradıb.
AZƏRTAC xəbər verir ki, rayon ictimaiyyəti ilə keçirilən görüşdə əvvəlcə respublikamızın ərazi bütövlüyü uğrunda döyüşlərdə şəhid olanların xatirəsi bir dəqiqəlik sükutla yad edilib.
Rayon icra hakimiyyətinin başçısı Müstəqim Məmmədov bildirib ki, Tərtər rayonu düşmənlə 48 kilometr təmas xəttində yerləşir. Rayonun yaşayış məntəqələri ermənilər tərəfindən mütəmadi olaraq atəşə tutulur. Mülki şəxslər düşmən gülləsinə tuş gəlir.
Aprelin 1-dən 2-nə keçən gecə yenə də Tərtər rayonu düşmən tərəfindən atəşə tutulub. Ordumuz düşmənə layiqli cavabını verib. Dövlətimizin başçısının Təhlükəsizlik Şurasının iclasında dediyi kimi, “biz atəşi pozmamışıq, sadəcə təxribata layiqli cavab vermişik”. Nə qədər ki, Ermənistan təxribatçı əməllərindən əl çəkmir, Azərbaycan ordusu ona layiqincə cavab verəcək. Düşmən bir daha şahid oldu ki, Azərbaycanın güclü ordusu var, Azərbaycan əsgəri qələbə çalmaq əzmindədir.
Məlumat verilib ki, aprelin 2-dən 4-dək erməni silahlı qüvvələri tərəfindən rayonun yaşayış məntəqələrinə atılan mərmilər nəticəsində Tərtər şəhərində 10, Qapanlı kəndində 42, Yuxarı Qaradağlı kəndində 35, Qaraağacı kəndində 17, Seydimli kəndində 1, Şıxarx kəndində 35, Azad Qaraqoyunlu kəndində 5, Dəmirçilər kəndində 2, Çaylı kəndində 8, cəmi 155 yaşayış evinə ziyan dəyib. 16 ev tamamilə dağılıb, 139 ev zədələnib.
Qarabağ müharibəsi veteranları, gənclər çıxışlarında günü-gündən qüdrətlənən Azərbaycan ordusu ilə qürur duyduqlarını və işğal altında olan torpaqlarımızın azad edilməsi uğrunda müqəddəs döyüşlərə hazır olduqlarını bəyan ediblər.
Tədbirin sonunda vətənpərvərlik mahnılarının mahir ifaçısı Şəmistan Əlizamanlı tərtərlilərin alqışları altında “İgid əsgər möhkəm dayan” mahnısını ifa edib.
X X X
Bərdə rayonunda keçirilən yığıncaqda ermənilərin Azərbaycana qarşı həyata keçirdikləri işğalçılıq siyasətindən, ölkə ərazisinin 20 faizinin işğal edilməsindən, işğalçı ordunun cəbhə bölgəsində yerləşən yaşayış məntəqələrinin, o cümlədən dinc əhalini atəşə tutmasından danışılıb, Azərbaycan Silahlı Qüvvələrinin son günlərdə düşmənə verdiyi layiqli cavabdan bəhs olunub.
AZƏRTAC xəbər verir ki, rayon ictimaiyyəti nümayəndələrinin aprelin 4-də keçirilən yığıncağında Azərbaycan Respublikasının Prezidenti İlham Əliyevin aprelin 2-də Təhlükəsizlik Şurasının iclasındakı çıxışına və cəbhə bölgəsində baş verən hadisələrlə əlaqədar bəyanatına dəstək nümayiş etdirilib.
Çıxışlarda Azərbaycan Ordusunun qüdrətindən fəxarətlə söhbət açılıb. Vurğulanıb ki, hər bir bərdəli Azərbaycan Prezidenti, Ali Baş Komandanın əmri ilə erməni işğalçılarına qarşı döyüşməyə, işğal altındakı torpaqlarımızı azad etməyə hazırdır.
X X X
Yevlax şəhər Heydər Əliyev sarayında keçirilən tədbirdə rayonun rəhbər işçiləri, hüquq mühafizə orqanları, idarə, müəssisə və təşkilatların rəhbərləri, Qarabağ müharibəsi veteranları, ağsaqqallar, gənclər və rayon ictimaiyyətinin nümayəndələri iştirak edib.
Yığıncaqda çıxış edən şəhər icra hakimiyyətinin başçısı Qoca Səmədov deyib ki, Azərbaycan Prezidenti yanında Təhlükəsizlik Şurasının iclasında Ali Baş Komandan İlham Əliyevin çıxışı yevlaxlılarda böyük ruh yüksəkliyi yaradıb.
Bildirilib ki, Azərbaycan Silahlı Qüvvələrinin həyata keçirdiyi son əməliyyatlar torpaqlarımızın işğalından keçən uzun müddətdən sonra ordumuzun həyata keçirdiyi ən uğurlu hərbi əməliyyatlardan biridir. Bütün ölkə vətəndaşları kimi yevlaxlılar da bu uğuru yüksək qiymətləndirir.
Vurğulanıb ki, bütün Azərbaycan xalqı kimi yevlaxlılar da torpağımızın erməni işğalından azad etməyə hazırdır.