Ümummilli Liderin anadan olmasının 93-cü ildönümü Qarabağ bölgəsində qeyd olunub
Ağdam, 10 may, Tahir Ağaməmmədov, AZƏRTAC
Xalqımızın Ümummilli Lideri, böyük siyasi xadim Heydər Əliyevin anadan olmasının 93-cü ildönümü respublikamızın hər yerində olduğu kimi, Qarabağ bölgəsində də təntənə ilə qeyd edilib. Dahi rəhbərin anadan olmasının 93-cü ildönümü münasibətilə müxtəlif tədbirlər, sərgilər və ağacəkmə aksiyaları keçirilib.
AZƏRTAC xəbər verir ki, mayın 10-da səhər saatlarından başlayaraq ağdamlılar Ümummilli Liderin Quzanlı qəsəbəsindəki abidəsini ziyarət edərək, önünə gül dəstələri düzüblər. Mərasimdə rayon rəhbərliyi, YAP rayon təşkilatının fəalları, hüquq mühafizə orqanlarının əməkdaşları, hərbçilər, əmək kollektivləri, ziyalılar, ağsaqqallar, veteranlar, gənclər, rayon ictimaiyyətinin nümayəndələri iştirak ediblər.
Sonra Ulu Öndərin doğum günü münasibətilə rayon ərazisində iməcilik keçirilib. Tərtər-Hindarx avtomobil yolunun Quzanlı qəsəbəsi və İmamqulubəyli kəndi ərazisindən keçən hissəsində, Bayraq meydanında, Quzanlı-Xındırıstan avtomobil yolunun kənarında və Heydər Əliyev parkında abadlıq-təmizlik işləri aparılıb, 2875 çinar, zeytun, Eldar şamı, küknar, sərv və digər ağaclar əkilib.
X X X
Bərdə rayon ictimaiyyəti, YAP rayon təşkilatının fəalları, hüquq mühafizə orqanlarının rəhbərləri, əmək kollektivləri ümummilli lider Heydər Əliyevin abidəsi önünə tər çiçək dəstələri qoyub, böyük öndərə öz sevgi və məhəbbətlərini bildiriblər.
AZƏRTAC xəbər verir ki, rayon mədəniyyət evində keçirilən tədbirdə çıxış edənlər ulu öndər Heydər Əliyevin həyat və fəaliyyətinin müəyyən məqamlarından bəhs edib, xilaskarlıq missiyasından, Azərbaycanın müstəqilliyinin bərpası və möhkəmləndirilməsindəki xidmətlərindən danışıblar.
Tədbirdə YAP sıralarına yeni qəbul olunan gənclərə üzvlük vəsiqələri, ümummilli lider Heydər Əliyevin anadan olmasının 93-cü ildönümü ilə əlaqədar keçirilən bilik, mahnı, şeir, bədii qiraət müsabiqələrinin qaliblərinə diplom, fəxri fərman və qiymətli hədiyyələr təqdim edilib.
X X X
Dünya şöhrətli siyasətçi Heydər Əliyevin anadan olmasının 93-cü ildönümü Beyləqanda da qeyd olunub. Minlərlə beyləqanlı Ulu Öndərin abidəsini ziyarət edib, önünə tər çiçəklər düzüblər.
AZƏRTAC xəbər verir ki, mərasim iştirakçıları məktəblilərin Ulu Öndərə həsr etdikləri gül və əl işləri sərgisi ilə, Heydər Əliyev Mərkəzində Ümummilli Liderin zəngin həyatını və siyasi fəaliyyətini əks etdirən eksponatlarla tanış olub, sənədli filmə tamaşa ediblər.
Anım mərasimində Ümummilli Liderin həyat və fəaliyyətindən, xilaskarlıq rolundan, Azərbaycanın dövlət müstəqilliyinin qorunub saxlanılmasında, respublikamızın hərtərəfli inkişafında əvəzsiz xidmətlərindən, məqsədyönlü siyasətinin əhəmiyyətindən danışılıb.
Həmin gün rayon ərazisində ümumrayon iməciliyi keçirilib, 2 mindən çox ağac və gül kolu əkilib.
X X X
Beyləqan rayonu ərazisində məskunlaşan xocavəndli məcburi köçkünlər mayın 10-da Ümummilli Liderin Xocavənd qəsəbəsində ucaldılmış abidəsi önünə tər gül dəstələri düzüb, xatirəsini ehtiramla yad ediblər. Sonra məcburi köçkünlərin məskunlaşdıqları ərazilərdə ağacəkmə aksiyası keçirilib.
AZƏRTAC xəbər verir ki, xocavəndli məktəblilərin Beyləqan şəhərindəki Heydər Əliyev Mərkəzinə ekskursiyası da təşkil olunub. Şagirdlər Mərkəzdə Ümummilli Liderin zəngin həyat və fəaliyyətini əks etdirən eksponatlarla tanış olub, filmə tamaşa ediblər.
Ekskursiya iştirakçılarına Ulu Öndərin zəngin irsi, xalqımız və dövlətimiz qarşısındakı xidmətləri barədə ətraflı məlumat verilib.
X X X
Ağcabədi rayon ictimaiyyəti, əmək kollektivləri Heydər Əliyev adına meydanda Ulu Öndərin abidəsi önünə tər çiçək dəstələri qoyub, dahi rəhbərə öz sevgi və məhəbbətlərini bildiriblər.
AZƏRTAC xəbər verir ki, rayon mədəniyyət evində davam edən tədbirdə Ağcabədi Rayon İcra Hakimiyyətinin başçısı Şahin Məmmədov çıxış edərək, Heydər Əliyevin zəngin həyatından, Azərbaycan xalqının bu günü və xoşbəxt gələcəyi naminə misilsiz xidmətlərindən danışıb. Bildirib ki, ulu öndər Heydər Əliyevə olan xalq sevgisi zaman ötdükcə daha da çoxalır. Nə qədər ki, bu xalq var, Heydər Əliyev böyüklüyü yaşayacaq, nəsildən-nəslə ötürüləcək.
Tədbirdə dahi rəhbərə həsr olunmuş film və şagirdlərin ifasında şeir kompozisiyası nümayiş etdirilib.
X X X
Laçınlı məcburi köçkünlərin müvəqqəti məskunlaşdıqları Ağcabədi rayonu ərazisindəki Taxtakörpü qəsəbəsində də ümummilli lider Heydər Əliyevin anadan olmasının 93-cü ildönümü qeyd olunub. Laçınlı məcburi köçkünlər ulu öndər Heydər Əliyevin qəsəbədəki büstü önünə tər çiçək dəstələri düzərək, dahi rəhbərin xatirəsini ehtiramla yad ediblər. Sonra Taxtakörpü ərazisində ağacəkmə aksiyası keçirilib.
AZƏRTAC xəbər verir ki, Yeni Azərbaycan Partiyası Laçın rayon təşkilatında keçirilən tədbirdə təşkilatın aparat rəhbəri Xaliq Musayevin “Azərbaycanın əbədi inkişaf yolu Heydər Əliyev yoludur” mövzusunda məruzəsi dinlənilib.
Gənclər Birliyinin sədri Vüsal Həsənov və başqaları çıxış edərək, ulu öndər Heydər Əliyevin ölkəyə rəhbərlik etdiyi hər iki dövrdə gördüyü böyük işlərdən, müstəqil dövlətimizin yaranmasında, möhkəmlənməsində və beynəlxalq aləmdə tanınmasında tarixi xidmətlərindən, gənclərə olan diqqət və qayğısından danışıblar. Bildirilib ki, Azərbaycan tarixinin yetişdirdiyi ən parlaq simalardan biri, türk dünyasının qüdrətli şəxsiyyətlərindən olan ulu öndər Heydər Əliyevin həyatı və siyasi fəaliyyəti çoxəsrlik dövlətçilik tariximizə qızıl hərflərlə yazılıb.
X X X
Ulu öndər Heydər Əliyevin anadan olmasının 93-cü ildönümü münasibəti ilə Horadiz şəhərində keçirilən tədbirdə üç mindən çox insan iştirak edib.
AZƏRTAC xəbər verir ki, füzulililər Ümummilli Liderin abidəsini ziyarət edərək, önünə gül-çiçək dəstələri qoyub, dahi rəhbərə ehtiramlarını bildiriblər. Sonra tədbir iştirakçıları Heydər parkında təşkil olunan gül kompozisiyaları, Ulu Öndərə həsr edilən kitab sərgisi və əl işləri ilə tanış olublar.
Ümummilli lider Heydər Əliyevin anadan olmasının 93-cü ildönümü münasibətilə rayon ərazisində iməciliklər keçirilib, ağac və gül kolları əkilib, küçə və meydanlarda, parklarda abadlıq, səliqə-sahman işləri görülüb.
Tədbir Heydər parkında gəzinti ilə davam etdirilib.
Bölmənin digər xəbərləri
