SİYASƏT
Parisdə fəaliyyət göstərən DATAR-ın üzvləri Azərbaycan haqqında məlumatlandırılıblar
Paris, 20 may, AZƏRTAC
Mayın 19-da Parisdəki Azərbaycan Mədəniyyət Mərkəzində Fransanın Ərazi Planlaşdırılması və İnkişafı, Regional Cəlbedicilik Nazirliklərarası Komitəsinin (DATAR) inzibati şurasının iclası keçirilib.
Şuranın iclasından sonra Azərbaycan barədə video nümayiş etdirilib. Nümayişdən sonra Fransadakı səfirimiz Elçin Əmirbəyov iştirakçılara ölkəmiz haqqında geniş məlumat verib.
Ölkəmizin tarixindən danışan diplomat XIX əsrin əvvəllərində Azərbaycanın geosiyasi dəyişikliklər nəticəsində regionun böyük dövlətləri arasında iki yerə bölündüyünü diqqətə çatdırıb. Böyük İpək yolu üzərində yerləşən ölkəmizin sivilizasiyalar arasında körpü rolu oynadığı vurğulanıb. Zəngin dövlətçilik tarixinə malik Azərbaycanın milli dəyərlərə önəm verdiyi qeyd olunub.
Bildirilib ki, 1918-ci ildə müsəlman dünyasında ilk demokratik respublika və dünyəvi dövlət olan Azərbaycan Şərqdə milli parlamentin yaranması, insan hüquq və azadlıqlarının təminatı, qadınlara səsvermə hüququnun verilməsi kimi müasir Avropa dəyərlərinin tətbiq edildiyi ilk ölkə olub.
Sovet İttifaqının süqutundan sonra yenidən öz müstəqilliyini bərpa edən Azərbaycan ilk illərdə siyasi, iqtisadi və sosial çətinliklərlə üzləşib, iqtisadi böhran, yüksək inflyasiya, Ermənistan tərəfindən elan edilməmiş müharibə ilə qarşılaşıb. Ermənistanın ölkəmizə qarşı apardığı hərbi təcavüz nəticəsində ərazilərimizin beşdə biri işğal olunub. Ancaq üzləşdiyi çətinliklərə baxmayaraq, Azərbaycan 1996-cı ildən siyasi sabitliyini bərpa edib, siyasi və iqtisadi sahədə islahatlar aparıb. 2001-ci ildə Avropa Şurasına üzv və Avropa İttifaqının tərəfdaşı olan ölkəmiz demokratiya və Avropa dəyərlərinə inteqrasiya yolunu seçib.
Müstəqilliyinin ikinci onilliyi iqtisadi inkişafla yadda qalan Azərbaycan dinamik iqtisadiyyatı ilə diqqəti cəlb edib. Aparılan neft strategiyası və islahatlar sayəsində 2004-2010-cu illərdə ölkəmizin iqtisadiyyatı üç dəfə, ümumi daxili məhsulun həcmi isə iki dəfə artıb. Karbohidrogen ehtiyatlarına, eləcə də geosiyasi mövqeyinə görə Azərbaycanın dünya ölkələrinin diqqətini cəlb etdiyi bildirilib.
Neft ehtiyatları, eləcə də iqtisadiyyatın şaxələndirilməsi və müasirləşdirilməsi sayəsində ölkəmiz qısa müddətdə iqtisadi tərəqqiyə nail olub. Artıq bir neçə ildir ki, Azərbaycan qeyri–neft sektorunun, xüsusilə də infrastrukturun, nəqliyyat, kommunikasiya və informasiya texnologiyaları sahələrinin inkişafına önəm verir. Azərbaycan regionda kommunikasiya peykinə malik yeganə ölkədir. Ölkəmiz bu sahədə Fransa ilə əməkdaşlıq edir.
Diqqətə çatdırılıb ki, 2012-2013-cü illərdə Azərbaycan BMT Təhlükəsizlik Şurasının qeyri-daimi üzvü olub.
Dini tolerantlığın hökm sürdüyü ölkəmizin son illərdə mədəniyyətlər və dinlərarası dialoq platformasına çevrildiyi, əhalisinin əksəriyyətinin müsəlman olmasına baxmayaraq, burada bütün dinlərin nümayəndələrinin dostluq və qarşılıqlı hörmət şəraitində yaşadığı vurğulanıb.
Qeyd edilib ki, aprel ayının sonunda BMT-nin Sivilizasiyalar Alyansının 7-ci Qlobal Forumuna ev sahibliyi edən Bakıda iyun ayında “Formula-1” üzrə Avropa Qran-pri yarışları keçiriləcək.
Ermənistan-Azərbaycan, Dağlıq Qarabağ münaqişəsindən danışan diplomat torpaqlarımızın 20 faizinin erməni silahlı qüvvələri tərəfindən işğal olunduğunu bildirib. Bu işğal nəticəsində bir milyondan çox azərbaycanlının doğma yurdundan didərgin düşdüyü, hazırda qaçqın və məcburi köçkün vəziyyətində yaşadığı diqqətə çatdırılıb.
Bildirilib ki, BMT, Avropa Şurası və digər beynəlxalq təşkilatlar bu işğal faktını beynəlxalq hüququn pozulması kimi tanıyır. BMT Təhlükəsizlik Şurası erməni silahlı qüvvələrinin Azərbaycanın işğal olunmuş ərazilərindən dərhal və qeyd-şərtsiz çıxmasını tələb edən dörd qətnamə qəbul edib.
Fransa münaqişənin həlli ilə məşğul olan ATƏT-in Minsk qrupuna ABŞ və Rusiya ilə birlikdə həmsədrlik edir. Azərbaycan Fransanın bu istiqamətdəki səylərini yüksək qiymətləndirir.
Qoşunların təmas xəttində ermənilərin törətdiyi son təxribatlara toxunan səfir deyib ki, belə hadisələr mövcud status-kvonun qəbuledilməz olduğunu bir daha təsdiqləyir. Münaqişənin yeganə ədalətli həlli beynəlxalq hüququn prinsiplərinə riayət etməkdir. Buna görə də beynəlxalq ictimaiyyət Ermənistanın BMT Təhlükəsizlik Şurasının qətnamələrinə riayət etməsi üçün səfərbər olmalıdır.
Diplomat iki gün əvvəl Vyanada keçirilən sammitin danışıqlar prosesinin bərpasına töhfə verəcəyinə ümid etdiyini bildirib.
Azərbaycanın Fransa ilə çoxtərəfli əlaqələrə böyük əhəmiyyət verdiyi diqqətə çatdırılıb, son illərdə iki ölkə arasında müxtəlif sahələrdə münasibətlərin inkişafından danışılıb.
Sonda iştirakçıların sualları cavablandırılıb.
Qeyd edək ki, Parisdəki Azərbaycan Mədəniyyət Mərkəzinin yerləşdiyi binada əvvəllər DATAR dərnəyi fəaliyyət göstərib. Bu dərnəyin üzvləri sabiq nazirlər, parlamentarilər, böyük sənaye qruplarının baş direktorları, maliyyə müəssisələrinin rəhbərləridir. Nostalji duyğularla dolu iştirakçılar binaya baş çəkib və yaradılan şəraitlə tanış olublar. Onlar aparılan yenidənqurma işlərindən sonra binanın tanınmaz dərəcədə dəyişdiyini, nəfis və möhtəşəm olduğunu vurğulayıblar. Azərbaycan haqqında eşitdiklərini müzakirə edərək ölkəmizə səfər etmək arzusunda olduqlarını bildiriblər.
Şəhla Ağalarova
AZƏRTAC-ın xüsusi müxbiri
Paris