Belqrad, 28 may, AZƏRTAC

Serbiyanın paytaxtı Belqrad şəhərindəki “Hyatt Regency” otelində 28 May - Respublika Günü münasibətilə rəsmi qəbul təşkil edilib.

Tədbirdə Serbiya parlamentinin sədri xanım Maya Qoykoviç, müdafiə naziri Zoran Corceviç, digər yüksək rütbəli dövlət və hökumət rəsmiləri, deputatlar, siyasi partiyaların rəhbərləri, elm, incəsənət və din xadimləri, diplomatik korpusun nümayəndələri, Belqradda fəaliyyət göstərən Azərbaycan Mədəniyyət Mərkəzinin, Serbiya-Azərbaycan Ticarət Palatasının və Serbiya-Azərbaycan Dostluq Cəmiyyətinin rəhbərləri və üzvləri, bu şəhərdə yaşayan, işləyən və təhsil alan azərbaycanlılar iştirak ediblər.

Tədbirdə Azərbaycan və Serbiyanın dövlət himnləri səsləndirilib.

Ölkəmizin Serbiyadakı səfiri Eldar Həsənov çıxış edərək 98 il əvvəl müsəlman dünyasında ilk demokratik parlamentli respublika olan Azərbaycan Xalq Cümhuriyyətinin yaradılmasından və tarixindən söz açıb. Diplomat təəssüf hissi ilə bildirib ki, bu dövlətin mövcudluğuna bolşeviklərin XI Qırmızı Ordusunun işğalı nəticəsində son qoyulub. O, xalqımızın uzun illər apardığı milli azadlıq mübarizəsi və SSRİ-nin dağılması nəticəsində dövlət müstəqilliyini yenidən bərpa edən Azərbaycanın keçdiyi inkişaf yolundan söz açıb.

Səfir tədbir iştirakçılarına Ermənistan-Azərbaycan, Dağlıq Qarabağ münaqişəsi, o cümlədən əzəli Azərbaycan torpaqlarının – Dağlıq Qarabağ və onun ətrafındakı 7 rayonun Ermənistan silahlı qüvvələri tərəfindən işğal olunması və bu münaqişə nəticəsində 1 milyondan çox azərbaycanlının qaçqın və məcburi köçkünə çevrilməsi barədə məlumat verib. Bildirib ki, münaqişə ilə bağlı BMT TŞ-nin qəbil etdiyi dörd qətnamə hələ də yerinə yetirilməyib. Diplomat Ermənistan tərəfinin, həmçinin ATƏT, AŞ və digər nüfuzlu təşkilatların da münaqişə ilə bağlı qətnamə və sənədlərinə məhəl qoymadığını, lakin bütün bunlara baxmayaraq, Azərbaycan dövlətinin münaqişənin beynəlxalq hüquq norma və prinsipləri əsasında – ölkəmizin suverenliyi, ərazi bütövlüyü və sərhədlərinin toxunulmazlığı çərçivəsində həll olunacağına inandığını bildirib.

E.Həsənov hazırda dünyada məskunlaşmış milyonlarla azərbaycanlıların tarixi vətəni olan Azərbaycanın bu il həmçinin dövlət müstəqilliyinin bərpasının 25 illiyini böyük qürur və sevinc hissi ilə qeyd etdiyini vurğulayıb. Bildirib ki, Prezident İlham Əliyevin rəhbərliyi altında ölkəmiz hər bir sahədə dinamik inkişafa nail olub. Müstəqil xarici siyasət yürüdən Azərbaycan dünyada söz və nüfuz sahibinə çevrilib və etibarlı tərəfdaş kimi tanınır.

Diqqətə çatdırılıb ki, 2016-cı il Azərbaycanda “Multikultralizm ili” elan edilib, tarixi İpək Yolu üzərində yerləşən ölkəmiz müxtəlif sivilizasiyaların qovuşduğu məkan olaraq, ayrı-ayrı millətlərin və konfessiyaların nümayəndələrinin sülh, qarşılıqlı anlaşma və dialoq şəraitində yaşadığı nadir məkandır. Birləşmiş Millətlər Təşkilatının Sivilizasiyalar Alyansının 7-ci Qlobal Forumunun bu ilin aprel ayında Bakı şəhərində keçirilməsi dünya dövlətlərinin Azərbaycandakı multikultural mühitə olan münasibətinin real ifadəsi kimi qəbul edilir.

E.Həsənov tədbir iştirakçılarına Azərbaycan-Serbiya əməkdaşlığının inkişafı barədə məlumat verərək, iki ölkənin liderləri də daxil olmaqla, müxtəlif səviyyələrdə həyata keçirilən qarşılıqlı səfərlərin ölkələrimiz arasında dostluq və strateji tərəfdaşlıq münasibətlərinin möhkəmlənməsinə mühüm töhfə verdiyini vurğulayıb.

Tədbirdə Azərbaycanın tarixini və mədəniyyətini, ölkəmizin gündəlik həyatını, müstəqilliyin bərpasından sonra qazanılmış uğurları əks etdirən film nümayiş olunub, iştirakçılara milli rəqslərimiz təqdim edilib.

Mərasimin keçirildiyi zalın foyesində “Gəncə - Avropa gənclərinin paytaxtı 2016” layihəsi çərçivəsində Azərbaycanda səfərdə olmuş serbiyalı fotoqraf Emir Mafke Vrajalitsanın fotoşəkillərindən ibarət sərgi açılıb.

İştirakçılara, həmçinin Azərbaycanla bağlı materiallar, o cümlədən Heydər Əliyev Fondu və Xarici İşlər Nazirliyi tərəfindən göndərilmiş kitab və jurnallar, eləcə də görkəmli ədiblərimizin serb dilinə tərcümə edilmiş əsərləri hədiyyə edilib.

Tədbir Serbiya KİV-lərində geniş işıqlandırılıb.

Pərvanə Qarayeva

AZƏRTAC-ın xüsusi müxbiri

Belqrad