Bakı, 31 may, P.İmanova, AZƏRTAC

Mayın 31-də Azərbaycan Milli Elmlər Akademiyasında (AMEA) görkəmli alim, ictimai-siyasi və dövlət xadimi, akademik Vəli Axundovun 100 illik yubileyinə həsr olunan tədbir keçirilib.

AZƏRTAC xəbər verir ki, mərasimdə AMEA-nın prezidenti, akademik Akif Əlizadə tədbirin “Akademik Vəli Axundovun 100 illik yubileyinin keçirilməsi haqqında” Prezident İlham Əliyevin 2016-cı il 15 yanvar tarixli Sərəncamına əsasən təşkil olunduğunu söyləyib, görkəmli alimin həyatı, ictimai-siyasi və elmi fəaliyyəti barədə danışıb.

Akademik A.Əlizadə bildirib ki, V.Axundov dövlət xadimi olmaqla yanaşı, həm də elmi-təşkilati və tibbi-nəzəri istiqamətləri özündə birləşdirən çoxşaxəli fəaliyyət göstərib, XX əsrin Azərbaycan elmi-ictimai düşüncəsinin təşəkkülündə və inkişafında müstəsna rol oynayıb.

AMEA-nın rəhbəri alimin 1949-1952-ci illərdə Azərbaycan səhiyyə nazirinin müavini, 1952-1953-cü illərdə Bakı Vilayəti səhiyyə şöbəsinin müdiri, 1953-1954-cü illərdə Azərbaycan KP MK-da inzibati, ticarət-maliyyə və plan orqanları şöbəsi müdirinin müavini vəzifələrində çalışdığını diqqətə çatdırıb. V.Axundovun fəaliyyətinə dövlət səviyyəsində daim yüksək qiymət verildiyi qeyd edilib.

Akademik A.Əlizadə 1996-cı ildə alimin 80 illiyinə həsr olunan yubiley yığıncağında ümummilli lider Heydər Əliyevin şəxsən iştirak etdiyini xatırladıb, Ulu Öndərin akademik V.Axundovun Azərbaycan tarixindəki roluna ən obyektiv qiymət verdiyini söyləyib. Vurğulanıb ki, V.Axundov dövlət xadimi olmaqla yanaşı, eyni zamanda, görkəmli elm xadimi idi. O, hansı vəzifədə çalışmasından asılı olmayaraq elmlə əlaqəsini kəsməyib, elmi tədqiqatlarını uğurla davam etdirib. Görkəmli alim 1969-cu ildə Azərbaycan Elmlər Akademiyasının həqiqi üzvü və vitse-prezidenti seçildikdən sonra isə özünü elmə həsr edib.

Sonra AMEA-nın Biologiya və Tibb Elmləri Bölməsinin akademik-katibi, akademik Əhliman Əmiraslanovun V.Axundovun elmi və ictimai-siyasi fəaliyyəti barədə məruzəsi dinlənilib. Qeyd edilib ki, uzun illər dövlət idarəçiliyi sahəsində ən məsul vəzifələrdə çalışan V.Axundov təqdirəlayiq fəaliyyət göstərib və tibb alimi kimi respublikada səhiyyə işinin təşkilinə töhfələr verib. 1954-cü ildə Vəli Axundovun Azərbaycanın səhiyyə naziri vəzifəsində çalışdığı müddətdə bu sahədə mühüm addımlar atılıb, ciddi irəliləyişlər əldə edilib. Azərbaycan tibb təhsili sisteminin, tibb elminin müharibədən sonrakı problemlərinin aradan qaldırılmasına və bu sahələrdə islahatlar aparılmasına hər zaman böyük diqqət göstərib. Alim respublikada səhiyyənin səmərəsinin artırılması, əhalinin sağlamlığının qorunması istiqamətində əvəzsiz işlər görməklə səhiyyənin ən bacarıqlı təşkilatçılarından biri olduğunu sübut edib.

Tədbirdə professor Musa Qasımlı V.Axundovun ictimai-siyasi fəaliyyətindən danışıb. Professor 1918-ci ildən 2005-ci ilədək olan dövrdə respublikada hökumətə rəhbərlik etmiş şəxslərin bioqrafiyasından bəhs edən “Azərbaycan baş nazirləri” kitabı üçün materiallar toplayarkən V.Axundova dair rast gəldiyi bir sıra məxfi arxiv sənədləri ilə tanış olduğunu bildirib. Bu sənədlərdə həmin illərin ictimai-siyasi vəziyyətinə baxmayaraq Ermənistanın əsassız ərazi iddialarına qarşı V.Axundovun münasibəti və digər bu kimi tarixi faktların əksini tapdığı qeyd edilib. Diqqətə çatdırılıb ki, mürəkkəb situasiyaların baş verdiyi bir dövrdə respublikaya rəhbərlik etmək asan məsələ deyildi. Biliyinə, zəkasına və idarəetmə qabiliyyətinə görə V.Axundov bu çətin işin öhdəsindən gələrək on il respublikaya rəhbərlik edib.

Akademik Vəli Axundov adına Milli Elmi-Tədqiqat Tibbi Profilaktika İnstitutu direktorunun müavini, professor Həqiqət Qədirova alimin respublikada yoluxucu xəstəliklərlə mübarizə məsələlərinin araşdırılması, torpaqların sanitar-gigiyenik tədqiqinə dair xidmətlərindən danışıb. Vurğulanıb ki, Vəli Axundovun elmi əsərlərinin çoxu ətraf mühit gigiyenasının müxtəlif məsələlərinə həsr olunub. Alimin Elmi Tədqiqat Virusologiya, Mikrobiologiya və Gigiyena İnstitutunun direktoru olduğu müddətdə elmi informasiyanın işlənməsi, kadr hazırlığı və digər sahələrdə inqilabi dəyişikliklər baş verib. Onun rəhbərliyi ilə institutda çoxlu sayda fəlsəfə və elmlər doktoru dissertasiyaları müdafiə olunub.

Akademik Məmməd Salmanov, professor İbadulla Ağayev və digər çıxış edənlər V.Axundovun tibb sahəsinin inkişafındakı xidmətlərindən, yüksək insani keyfiyyətlərindən söz açıb, akademiklə bağlı xatirələrini bölüşüblər.

Alimin qızı Nigar Axundova atasının xatirəsinə göstərilən yüksək hörmət və ehtirama görə Prezident İlham Əliyevə minnətdarlığını bildirib.

N.Axundova, həmçinin tədbirin təşkilatçılarına və iştirakçılarına təşəkkür edib.

Sonda görkəmli akademikə həsr edilən film nümayiş olunub.