Bakı, 12 avqust, AZƏRTAC

Avqustun 12-si dünyada Beynəlxalq Gənclər Günü kimi qeyd olunur. 1998-ci il avqustun 8-dən 12-dək Lissabonda gənclərlə iş üzrə nazirlərin iştirakı ilə keçirilən beynəlxalq konfransda hər il avqustun 12-nin dünyada Beynəlxalq Gənclər Günü kimi qeyd olunması qərara alınıb. Həmin vaxtdan etibarən bu gün gənclərə lazımi diqqət göstərmək, onların nailiyyətlərini təbliğ etmək, cəmiyyətin bütün sahələrində gənclərin iştirakına təkan vermək məqsədilə dünyada geniş qeyd olunur.

Bu gün Azərbaycanda uğurlu gənclər siyasəti həyata keçirilir. Xalqımızın ulu öndəri Heydər Əliyevin əsasını qoyduğu gənclər siyasətinin Prezident İlham Əliyevin rəhbərliyi ilə müasir dövrün tələblərinə uyğun davam etdirilməsi gənclərin hərtərəfli fəaliyyətinə geniş imkanlar yaradıb.

Ölkəmizdə gənclər siyasətinin əsasını qoyan ümummilli lider Heydər Əliyev gəncləri Azərbaycanın gələcək qurucuları adlandırır, onların imkan və bacarıqlarını yüksək qiymətləndirir, problemlərinin həlli istiqamətində həyata keçirilən tədbirlərə xüsusi önəm verirdi. Dahi rəhbərin Fərmanına əsasən, 1994-cü ildə Gənclər, İdman və Turizm Nazirliyinin yaradılması bu sahədə mühüm tədbirlərin həyata keçirilməsinə geniş imkan verdi. Müstəqil Azərbaycan gənclərinin ilk ümumrespublika forumunun keçirilməsi, 2 fevral - Azərbaycan Gəncləri Gününün təsis olunması, gənclərlə bağlı mühüm dövlət proqramlarının qəbulu, “Dövlət gənclər siyasəti haqqında” fərmanın imzalanması və geniş fəaliyyət proqramının təsdiq edilməsi ümummilli lider Heydər Əliyevin gənclərə böyük qayğısının göstəricisi idi.

2003-cü ildən etibarən Prezident İlham Əliyevin diqqət və qayğısı sayəsində ölkəmizdə gənclər siyasəti mahiyyət və keyfiyyətcə yeni mərhələyə qədəm qoyub. Dövlətimizin başçısının 2005-ci ildə təsdiq etdiyi “Azərbaycan gəncliyi: 2005-2009-cu illər Dövlət Proqramı” uğurla həyata keçirilib. 2006-cı ildə Prezident İlham Əliyevin Fərmanı ilə Gənclər və İdman Nazirliyi yenidən təşkil olundu, gənclər siyasətinin əsas icra orqanı qarşısında yeni vəzifələr qoyuldu. İndi bu nazirlik Azərbaycan gəncliyinin formalaşmasında Ulu Öndərin arzu və amallarını davam etdirən ən böyük qurumdur. Prezident İlham Əliyevin 2007-ci il 16 aprel tarixli Sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsil üzrə Dövlət Proqramı” bütün təbəqələrdən olan gənclərin xaricdə təhsilinə, dünyanın ən nüfuzlu ali təhsil müəssislərində oxumalarına geniş imkanlar yaradıb.

Ölkəmizdə istedadlı gənclərə qayğı da xüsusi yer tutur. Məhz bu qayğının nəticəsidir ki, 2011-ci ildə 14-də Almaniyanın Düsseldorf şəhərində keçirilən 56-cı “Eurovision–2011” mahnı müsabiqəsində ölkəmizi təmsil edən gənclər parlaq qələbə qazandılar. Bu qələbə isə mötəbər yarışmanın 2012-ci ildə Azərbaycanda keçirilməsinə, son nəticədə ölkəmizin Avropada və bütün dünyada təbliğinə səbəb oldu. Ölkəmiz bu yarışmaya yüksək səviyyədə ev sahibliyi etməklə adını “Eurovision” tarixinə böyük hərflərlə yazdı.

Azərbaycanın gənclər siyasətində idmanın inkişaf etdirilməsi və onun kütləviliyinin artırılmasına da xüsusi diqqət yetirilir. Prezident İlham Əliyevin yürütdüyü uğurlu siyasət nəticəsində Azərbaycan dünyanın qabaqcıl idman ölkələrindən birinə çevrilib. Bölgələrdə mötəbər idman kompleks və qurğularının açılması, ölkəmizin nüfuzlu beynəlxalq idman yarışlarına ev sahibliyi etməsi, idmançılarımızın uğurlu çıxışları buna əyani sübutdur. Beynəlxalq yarışlarda qələbə qazanan gənc idmançıların layiqincə qiymətləndirilməsi də onların yeni uğurların qazanılmasında mühüm rol oynayır. Ötən il Bakıda tarixdə ilk dəfə keçirilən Avropa Oyunlarında Azərbaycanın 50 ölkə arasında ikinci yeri tutması, ölkəmizin bu ilin sentyabrında 42-ci Ümumdünya Şahmat Olimpiadasına, gələn il IV İslam Həmrəylik Oyunlarına ev sahibliyi edəcək.

Prezidentin 2011-ci il 7 iyul tarixli Sərəncamı ilə təsdiq edilmiş "Azərbaycan gəncliyi 2011-2015-ci illərdə" Dövlət Proqramı əsası Ulu Öndər tərəfindən qoyulmuş gənclər siyasətinin elmi-nəzəri əsaslara bağlılığının, əməli nəticəliliyinin, davamlılığının daha bir əyani sübutudur. Azərbaycan Respublikasının Prezidenti yanında Gənclər Fondunun yaradılması nəinki yerli, hətta əcnəbi gənclərin ölkəmizlə bağlı layihələrinə maliyyə vəsaiti ayırır. İndi Azərbaycanın uğurlu gənclər siyasəti bir sıra ölkələrdə model kimi qəbul olunur.

Dövlətimizin başçısının davamlı inkişaf konsepsiyasının uğurla həyata keçirilməsində Heydər Əliyev Fondunun da xidmətləri böyükdür. Fondun təhsilin inkişafı, bu sahədə həllini gözləyən bir sıra problemlərin aradan qaldırılması istiqamətindəki fəaliyyəti Azərbaycanda elm və təhsilə ictimai təsisat səviyyəsində yüksək qayğı göstərmək nümunəsi olmaqla yanaşı, cəmiyyətin ümumi potensialının bu zəmində səfərbər olunmasına yönəlmişdir. Fondun elmin, təhsilin dinamik inkişafı, gənc nəslin təlim-tərbiyəsinin yüksək səviyyədə qurulması, yeniyetmələrin sabahın layiqli vətəndaşları kimi yetişməsi istiqamətində məqsədyönlü tədbirləri ilk növbədə vətənpərvərlikdən irəli gəlir. Azərbaycanın birinci xanımı, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyeva Ulu Öndərin əsasını qoyduğu, hazırda Prezident İlham Əliyevin uğurla davam etdirdiyi konseptual təhsil strategiyasının həyata keçirilməsinə öz töhfəsini verir.

Azərbaycan gənclərinin xarici ölkələrdə təşkilatlanması, ölkəmizlə bağlı həqiqətlərin dünya ictimaiyyətinin diqqətinə çatdırılması, ətraf mühitin mühafizəsində gənclərin enerji və potensialından geniş istifadə olunması işində Fondun vitse-prezidenti, İDEA İctimai Birliyinin sədri Leyla Əliyevanın da mühüm xidmətləri var.

Sosial həyatın bütün sahələrində gənclər əksəriyyət təşkil edir. Təbii ki, bu, Prezident İlham Əliyevin gənc kadrların irəli çəkilməsi ilə bağlı qarşıya qoyduğu vəzifənin reallaşmasının nəticəsidir. Gənclər də öz növbəsində onlara göstərilən etimadı layiqincə doğrultmağa çalışırlar. Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər bütöv və müstəqil Azərbaycan naminə bütün güclərini səfərbər edir, Vətənin inkişafı üçün səylə çalışır, öz siyasətində onlara arxalanan Prezident İlham Əliyevin uğurlu daxili və xarici siyasətini dəstəkləyirlər.

Bu il Azərbaycan Gəncləri Günü ərəfəsində ölkə gənclərinin bir qrupunu qəbul edən Prezident İlham Əliyev deyib: “Gənclər cəmiyyətimizin fəal üzvləri kimi ölkəmizin güclənməsində əsas rol oynayırlar. Mən gənclərin fəaliyyətini yüksək qiymətləndirirəm. Həm beynəlxalq müstəvidə, həm ölkə daxilində mən görürəm ki, bu gün böyüyən gənclər xalqa, dövlətə bağlıdırlar. Bu, çox önəmlidir. Gənclər gərək milli ruhda tərbiyə alsınlar. Biz milli dəyərlərimizi hər şeydən üstün tutmalıyıq”.

Bu gün qürurla demək olar ki, xalqımızın ulu öndəri Heydər Əliyevin ideyalarını daim əldə rəhbər tutan, Prezident İlham Əliyevin ətrafında sıx birləşərək milli mənəvi dəyərlərimizi göz bəbəyi kimi qoruyub yaşadan müasir Azərbaycan gəncləri müstəqil dövlətimizin bu günü və gələcəyi haqqında düşünür, öz fəaliyyətlərində yüksək vətəndaşlıq hisslərinə malik olduqlarını nümayiş etdirirlər.