Vaşinqton, 15 aprel (AZƏRTAC). Aprelin 14-də ABŞ Dövlət Departamentində FİFA-nın Dünya Kubokunun təntənəli təqdimat mərasimi keçirilmişdir. İyunun 12-də Braziliyada başlanacaq futbol üzrə 2014-cü il dünya çempionatı ərəfəsində “Coca-Cola” şirkətinin sponsorluğu ilə baş tutan “Trofey turu” çərçivəsində Kubokun Birləşmiş Ştatlarda birinci dayanacağı ABŞ Dövlət Departamenti olmuşdur. 

Dünya Kubokunun təqdimat mərasimini ABŞ dövlət katibinin təhsil və mədəniyyət məsələləri üzrə müavini Evan Rayan açmışdır. O, tədbirin qonaqlarını: ABŞ Dövlət Departamentinin idman üzrə xüsusi nümayəndələri - kişilər arasında futbol üzrə ABŞ milli futbol komandasının keçmiş üzvü Kobi Counsu və qadınlar arasında futbol üzrə ABŞ milli futbol komandasının keçmiş üzvü Culi Foudini, FİFA-nın mətbuatla iş şöbəsinin rəhbəri Deliya Fişeri, “Coca-cola” şirkətinin ictimaiyyətlə əlaqələr üzrə vitse-prezidenti Klayd Taqqlı, Braziliya Federativ Respublikası idman nazirinin müavini Manuel Rebelo Fernandesi və Braziliyanın ABŞ-dakı səfiri Mauro Viyeranı tədbir iştirakçılarına təqdim etmişdir.

ABŞ Dövlət Departamentinin idman üzrə xüsusi nümayəndələri Kobi Couns və Culi Foudi kişilər və qadınlar arasında futbol üzrə ABŞ yığma komandalarının heyətində öz peşəkar təcrübələri barədə danışmışlar. Mərasimin digər qonaqları futbol üzrə dünya çempionatı zamanı münasibətlərin yaxşılaşmasında futbolun rolunu qeyd etmişlər. Braziliyanın ABŞ-dakı səfiri Mauro Viyera bildirmişdir ki, Braziliyada keçiriləcək futbol üzrə dünya çempionatına biletlərin dörddə bir hissəsini amerikalı azarkeşlər almışlar. Bu fakt idmanın həmin növünə amerikalıların marağının artmasına dəlalət edir.

Braziliya idman nazirinin müavini Manuel Rebelo Fernandes futbolun əhəmiyyətindən danışaraq xatırlatmışdır ki, onun ölkəsi beş dəfə dünya çempionatında qalib gəlmiş və iki dəfə dünya çempionatında ikinci yeri tutmuşdur, özü də həmin çempionatlar təkcə qərb yarımkürəsində keçirilməmişdir.

Sonra mərasim iştirakçıları qarşısında ABŞ dövlət katibi Con Kerri və vitse-prezident Co Beyden çıxış etmişlər. Con Kerri auditoriyada toplaşanlara müraciətlə futbolun beynəlxalq münasibətlərdə və planetimizdə sülhün qorunub saxlanmasında əhəmiyyəti barədə danışmışdır. Con Kerri hətta, Braziliya idman nazirinin müavininə “braziliyalıların artıq beş dəfə dünya kubokuna layiq görüldüyünü” amerikalılara xatırlatdığına görə zarafatla təşəkkür etmiş və ümidvar olduğunu bildirmişdir ki, növbəti dəfə amerikalı futbolçular dünya Kubokunu ABŞ-a özləri, trofey kimi gətirəcəklər.

ABŞ vitse-prezidenti Co Beyden təntənəli mərasimin iştirakçıları qarşısında çıxışında bildirmişdir ki, ABŞ-ın öz möhtəşəm çempionatları, o cümlədən hər il keçirilən superbol (Amerika futbolu üzrə ABŞ çempionatı), basketbol üzrə ölkə çempionatı və əsas beysbol liqasının dünya seriyası vardır, lakin bu çempionatların heç biri futbol üzrə dünya çempionatı ilə müqayisə edilə bilməz, çünki o, həqiqətən dünya miqyaslı bayramdır.

Tədbir ABŞ Dövlət Katibi Con Kerri və vitse-prezident Co Beyden tərəfindən Dünya Kubokunun təntənəli açılışı ilə başa çatmışdır.

Yusif Babanlı

AZƏRTAC-ın xüsusi müxbiri

Vaşinqton