ELM VƏ TƏHSİL
ABŞ ÖLKƏMİZDƏ TƏHSİL PROQRAMLARININ HƏYATA KEÇİRİLMƏSİNİ DAVAM ETDİRƏCƏKDİR
Sentyabrın 4-də ABŞ-ın Azərbaycandakı səfiri Ross Uilsonun, təhsil naziri Misir Mərdanovun, Amerikanın ACCELS, İREX, PROCEKT HARMONİ təhsil təşkilatlarının Bakı nümayəndəlikləri rəhbərlərinin iştirakı ilə mətbuat konfransı keçirilmişdir. Tədbir ABŞ Dövlət Departamentinin və qeyri-hökumət təşkilatlarının 2002-ci ildə ölkəmizdə həyata keçirəcəkləri təhsil proqramlarına həsr edilmişdi.
Səfir Ross Uilson Azərbaycanda 1992-ci ildən həyata keçirilən təhsil proqramlarını “gələcək üçün sərmayə” adlandıraraq bildirdi ki, o vaxtdan bəri 1200-dən çox Azərbaycan vətəndaşı Birləşmiş Ştatlara getmiş, ABŞ-ın bu sahəyə yönəldilmiş sərmayələrinin ümumi məbləği isə təxminən 30 milyon dollar olmuşdur. Hazırda ümumi müddəti 4 həftədən 2 ilədək olan 11 proqram həyata keçirilir.
Məktəblilər üçün nəzərdə tutulan əsas proqramlardan biri təhsil müddəti bir il olan “Gələcək liderlərin mübadiləsi” proqramıdır. Tələbələr üçün sabiq dövlət katibi Edmund Maski adına ikiillik magistratura proqramı da var. Həmin proqram əsasında 1998-ci ildən bəri ölkəmizin 112 nümayəndəsi Amerikada magistratura təhsili almışdır. Alimlər, orta məktəb müəllimləri, habelə müxtəlif peşələrin nümayəndələri üçün də proqramlar var. “Müasir dövrün aktual məsələləri” isə yeni proqramdır. O, işgüzar idarəçilik, iqtisadiyyat, jurnalistika, səhiyyə və digər sahələrdə çalışan və 24- 55 yaşlarında olan mütəxəssislər üçündür.
Ross Uilson vurğuladı ki, faciəli 11 sentyabr hadisələrindən sonra təhsil proqramlarının həyata keçirilməsi yeni məzmun kəsb edir, çünki onlar müxtəlif etnoslara mənsub və dini görüşləri fərqlənən insanlar arasında qarşılıqlı anlaşma yaratmağa imkan verəcəkdir.
Yaxın vaxtlarda PROCEKT HARMONİ təşkilatı Bakıdakı 164 və 220 nömrəli məktəblərdə “Sülh gündəliyi” proqramını həyata keçirməyə başlayacaqdır. Həmin proqram çərçivəsində aşağı sinif şagirdləri İnternetdə amerikalı yaşıdları ilə görüşə biləcəklər. Bundan əlavə, Bakı, Gəncə və Mingəçevir şəhərlərində bir sıra məktəblər kompüterləşdiriləcəkdir.
Misir Mərdanov bu sahəyə diqqətə görə ABŞ hökumətinə təşəkkürünü bildirərək, dedi ki, Amerika proqramlarının bütün bölgələrimizi və təhsilin bütün pillələrini əhatə etməsi əhəmiyyətlidir. O, 11 sentyabr terroru qurbanlarının xatirəsinin bir dəqiqəlik sükutla yad olunmasını təklif etdi.
Nazir Azərbaycanda yeni məktəblərin tikilib-tikilməyəcəyi barədə suala cavab verərək bildirdi ki, Səudiyyə Ərəbistanının İnkişaf Fondunun vəsaiti hesabına Bakıda beş məktəb binasının inşasına dair layihə hazırlanmışdır.