ABŞ hökuməti: Rusiyanın yeni diplomatları üçün qapılar açıqdır
Bakı, 29 mart, AZƏRTAC
ABŞ hökuməti ölkədə Rusiyadan olan diplomatların sayını azaltmır və yeni diplomatlar üçün qapılar açıqdır.
AZƏRTAC TASS informasiya agentliyinə istinadla xəbər verir ki, bu açıqlamanı ABŞ administrasiyasının nümayəndəsi martın 29-da xarici jurnalistlər üçün keçirilən brifinqdə səsləndirib.
Bununla yanaşı, Amerika hökumətinin nümayəndələri Vaşinqtonun “xarici kəşfiyyat əməkdaşları tərəfindən gözlənilən təhlükəni” ciddi qəbul etdiyini bildiriblər. “Bizim qapımız rusiyalı diplomatların üzünə açıqdır, lakin biz diplomat olmayan şəxslərlə bağlı ciddi narahatlıq keçiririk”, - deyə onlardan biri qeyd edib. Nümayəndə ölkədən çıxarılan Rusiya diplomatlarını casus adlandırıb.
Xatırladaq ki, Avropa İttifaqının bir sıra ölkələri, habelə ABŞ, Kanada, Norveç, Ukrayna, Gürcüstan və başqa dövlətlər “Skripal işi” əlaqədar rusiyalı diplomatları arzuolunmaz şəxs elan ediblər. O cümlədən Vaşinqton bəyan edib ki, 48 rusiyalı diplomatı və Rusiyanın BMT yanındakı missiyasının 12 əməkdaşını ölkədən çıxarır. RF XİN də öz növbəsində Moskvanın adekvat cavab verəcəyini bildirib.
Bölmənin digər xəbərləri
