SİYASƏT
ADİU-da YAP-ın 22 illiyinə həsr olunmuş tədbir keçirilib
Bakı, 21 noyabr, AZƏRTAC
Noyabrın 21-də Azərbaycan Dövlət İqtisad Universitetində (ADİU) Yeni Azərbaycan Partiyasının (ADİU) yaranmasının 22-ci ildönümünə həsr olunmuş yığıncaq keçirilib.
ADİU-nun marketinq və kommunikasiya departamentindən AZƏRTAC-a bildirilib ki, tədbir iştirakçıları əvvəlcə ümummilli lider Heydər Əliyevin bu ali təhsil ocağındakı büstü önünə gül dəstələri düzərək xatirəsini ehtiramla yad ediblər.
Yığıncağı giriş sözü ilə açan ADİU-nun rektoru, professor Ədalət Muradov bildirib ki, yaradılmasının 22-ci illiyini qeyd edən Yeni Azərbaycan Partiyası milli dövlətçilik ənənələrinin formalaşmasında, respublikamızın bir çox ölkə əhəmiyyətli problemlərinin aradan qaldırılmasında həlledici rol oynayaraq xalqımızın tarixinin şərəfli səhifələrindən birinə çevrilib.
1992-ci ildə Ümummilli Liderin xeyir-duası ilə Azərbaycanı düşdüyü bütün bəlalardan xilas etmək yolunda atılan ilk müdrik addımlardan biri YAP-ın yaradılması oldu. Partiya qısa vaxt ərzində təşkilatlanaraq ölkənin ən güclü siyasi partiyasına çevrildi. Bu partiya Azərbaycan dövlətçiliyinin, onun dövlət müstəqilliyinin, bu günün və sabahın qarantı demək idi.
Rektor Ulu Öndərin siyasi kursunu bütün sahələrdə uğurla davam etdirən Prezident İlham Əliyevin və onun rəhbərliyi ilə YAP fəaliyyətinin bu gün də Azərbaycan gənclərinin hərtərəfli inkişafı, onların ölkənin ictimai-siyasi, sosial-mədəni həyatındakı rolunun artması, idarəçilik strukturlarında geniş təmsil olunmasının prioritet istiqamətlərindən olduğunu qeyd edib. Bu sahədə Azərbaycanın birinci xanımı, Heydər Əliyev Fondunun prezidenti Mehriban xanım Əliyevanın birbaşa təşəbbüsü və təşkilatçılığı ilə həyata keçirilən layihələr və proqramların xüsusi əhəmiyyət kəsb etdiyini vurğulayıb.
Azərbaycan Milli Elmlər Akademiyasının prezidenti, akademik Akif Əlizadə ümummilli lider Heydər Əliyevin uğurlu daxili və xarici siyasəti nəticəsində Azərbaycanın güclü, qüdrətli dövlətə çevrildiyini qeyd edib. Bildirib ki, bu gün Ulu Öndərin əsasını qoyduğu inkişaf siyasəti Prezident İlham Əliyev tərəfindən uğurla davam etdirilir və Azərbaycanı dünya miqyasında nüfuzlu söz sahibinə çevirib. Dövlətimizin başçısının inkişaf siyasəti Azərbaycanın dünyanın ən sürətlə inkişaf edən ölkələr sırasında yer tutmasını şərtləndirib. Bu siyasətin əsasında insan amili dayanır və Azərbaycan güclü, müasir və nüfuzlu dövlət kimi tanınır.
YAP Səbail rayon təşkilatının sədrinin müavini Muxtar Nağıyev, YAP Səbail rayon təşkilatının qadınlar şurasının sədri Təranə Kərimova, YAP ADİU ərazi təşkilatının sədri Zəfər Bayramov və “SABAH” qrupunun tələbəsi Günay Qarayeva partiyanın keçdiyi şərəfli yola nəzər salaraq, bu gün ölkənin iqtisadi və siyasi gücünün xeyli artdığını, partiyanın Prezident İlham Əliyevin sədrliyi ilə cəmiyyətdə yüksək siyasi nüfuza malik olduğunu diqqətə çatdırıblar.
Tədbirin sonunda YAP sıralarına yeni qəbul olunmuş üzvlərə partiyanın üzvlük vəsiqələri təqdim edilib.