İDMAN


AFFA-nın İcraiyyə Komitəsinin iclası keçirilib

A+ A

 

Bakı, 30 avqust, AZƏRTAC 

Azərbaycan Futbol Federasiyaları Assosiasiyasının (AFFA) İcraiyyə Komitəsinin iclası keçirilib.

AFFA-dan AZƏRTAC-a bildiriblər ki, iclasda aparılan müzakirələrdən sonra bir sıra qərarlar qəbul olunub.

Müzakirələr nəticəsində “Danışılmış oyunlar və oyun nəticələrinin manipulyasiyası” ilə bağlı Bəyannamənin qəbul olunması qərara alınıb. Peşəkar futbolla bu və ya digər şəkildə məşğul olan hər bir şəxsin Bəyannaməni imzalamaqla müvafiq öhdəlik götürməsi nəzərdə tutulur. Bəyannamə AFFA tərəfindən müvafiq futbol strukturlarına təqdim olunacaq.

Bundan başqa, birinci divizionda yaş və legioner limitinin müəyyənləşdirilməsinin AFFA, Peşəkar Futbol Liqası və Məşqçilər Komitəsinə həvalə olunması barədə qərar qəbul edilib.

Həmçinin AFFA-nın təsisçiliyi ilə Futbolun İnkişaf Fondunun yaradılması qərara alınıb. Qurumun idarə heyəti bütövlükdə AFFA-nın İcraiyyə Komitəsinin heyətindən təşkil olunacaq. Futbolun İnkişaf Fondunun hüquqi məsələlərinin həlli və təşkilati işlərinin həyata keçirilməsi AFFA-nın baş katibliyinə tapşırılıb.

İclasda 17 yaşadək futbolçulardan ibarət Azərbaycan yığmasının baş məşqçisi Rafiq Mirzəyevin öz istəyi ilə istefası qəbul olunub. U-17 Azərbaycan yığmasının baş məşqçisi vəzifəsinin müvəqqəti icrası Vüqar Məmmədə həvalə olunub.

Habelə UEFA-nın tövsiyəsinə əsasən, 2017-2018-ci il mövsümündə futbol yarışlarında iştirak etmək üçün lisenziya qaydalarına dəyişikliklər haqqında təkliflər tanış olmaq və münasibət bildirmək üçün İcraiyyə Komitəsinin üzvlərinə təqdim olunub.

İclasda qəbul olunan digər qərarda isə futbol veteranları Boris Xetaqurova və Adil Nadirova AFFA-nın təqaüdü verilməsi məsələsi əksini tapıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.