İQTİSADİYYAT
“AİTF-2013” Azərbaycan Beynəlxalq turizm və səyahətlər sərgisində 35 ölkədən 251 şirkət iştirak edəcəkdir
Bakı, 3 aprel (AZƏRTAC). Xəbər verdiyimiz kimi, aprelin 4-dən 6-dək Bakıda “AİTF-2013” 12-ci Azərbaycan Beynəlxalq turizm və səyahətlər sərgisi və “Horex Caucasus-2013” 7-ci Qafqaz Beynəlxalq mehmanxana, restoran və supermarketlər üçün avadanlıq və ləvazimatlar sərgisi açılacaqdır.
Aprelin 3-də sərgiyə hazırlıqla bağlı mətbuat konfransı keçirilmişdir.
Tədbirdə Mədəniyyət və Turizm Nazirliyinin turizm şöbəsinin müdiri Aydın İsmiyev, “İteca Caspian” şirkətinin icraçı direktoru Fərid Məmmədov və AİTF və Horex sərgilərinin meneceri Xəyal Əliyeva çıxış edərək sərgi ilə bağlı geniş məlumat vermişlər.
Bildirilmişdir ki, sərgi Azərbaycan Respublikası Mədəniyyət və Turizm Nazirliyinin rəsmi dəstəyi ilə keçirilir və Dünya Turizm Təşkilatı, Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası və Beynəlxalq Turizm Sərgiləri Assosiasiyası tərəfindən daim dəstəklənir.
Vurğulanmışdır ki, “AİTF-2013” sərgisində 60-dan çox istiqaməti təqdim edən 35 ölkədən 251 şirkət iştirak edəcəkdir. İştirakçı ölkələrin coğrafiyası isə hər il genişlənir. Bu il “AİTF-2013” sərgisində Monteneqro, Tailand, Tunis, Kanada, Mərakeş və Monakonun turoperatorları ilk dəfə iştirak edəcəklər.
Ənənəvi turizm marşrutları arasında Türkiyə, Gürcüstan, Çex Respublikası və Birləşmiş Ərəb Əmirlikləri kimi ölkələr yer almışlar. Sərgidə 20 ölkə öz milli stendləri ilə çıxış edəcəkdir.
İştirakçı ölkələr sərgidə turizm sənayesinin müxtəlif istiqamətlərini təqdim edəcəklər. Buraya hava yolları və aviaagentliklər, turoperatorlar və turizm agentlikləri, mehmanxanalar, mehmanxana şəbəkələri, sanatoriyalar, pansionatlar, macəra istirahəti üzrə ixtisaslaşan şirkətlər, habelə işgüzar səfərlərin, idman, ekoloji və maarifləndirici turizmin, eləcə də elit istirahətin təşkili ilə məşğul olan şirkətlər daxildirlər.
Sərgidə tibbi turizm də geniş şəkildə təqdim ediləcəkdir. Bu il ilk dəfə olaraq sərginin ekspozisiyasında sürətlə populyarlıq qazanan “Xaricdə əmlak” adlı bölmə də təmsil olunacaqdır.
Hazırda sərgi meydançalarının 60 faizdən çox hissəsi tutulmuşdur. Bu il sərginin bir sıra iri iştirakçıları öz stendlərinin ölçülərini əhəmiyyətli dərəcədə artırmışlar.
Milli hava daşıyıcısı olan “Azərbaycan Hava Yolları” (AZAL) Qapalı Səhmdar Cəmiyyəti də öz stendini genişləndirmişdir.
Diqqətə çatdırılmışdır ki, bu il Azərbaycanın turizm potensialını nümayiş etdirən geniş regional ekspozisiyanın təşkil edilməsi planlaşdırılır. Burada Xaçmaz, Qusar, Quba, Qəbələ, Şəki, İsmayıllı, Lənkəran, Oğuz, Naftalan və ölkənin başqa regionlarının turizm imkanları təqdim olunacaqdır.
Həmişəki kimi, sərgidə təqdimat mərasimləri və seminarların keçirilməsi planlaşdırılır. Bundan əlavə, iştirakçıların stendlərində müxtəlif lotereyalar və istirahət turları da oynanılacaqdır.