Bakı, 26 may, Pərvanə İmanova, AZƏRTAC

Mayın 26-da Bakıda Azərbaycan Milli Elmlər Akademiyası(AMEA) və Respublika Ağsaqqallar Şurasının birgə təşkilatçılığı ilə ümummilli lider Heydər Əliyevin anadan olmasının 92-ci ildönümünə həsr edilən “Ölkənin ictimai-siyasi həyatında AMEA, Respublika Ağsaqqallar Şurası və gənc alimlərin rolu” mövzusunda tədbir keçirilib.

AZƏRTAC xəbər verir ki, tədbirdə AMEA-nın prezidenti, akademik Akif Əlizadə görkəmli dövlət xadimi Heydər Əliyevin zəngin və çoxşaxəli fəaliyyətindən danışıb. Bildirilib ki, Azərbaycanın dövlətçilik ənənələrinin qurulmasında, müstəqilliyinin və iqtisadi-siyasi əsaslarının möhkəmləndirilməsində, ölkəmizin beynəlxalq birliyin bərabərhüquqlu üzvünə çevrilməsində, demokratik imicinin yüksəldilməsində Ümummilli Liderin müstəsna xidmətləri olub.

AMEA-nın rəhbəri dahi şəxsiyyət Heydər Əliyevin bütün fəaliyyəti dövründə elm, təhsil və mədəniyyətin inkişafına xüsusi diqqət və qayğısından söz açıb, ölkənin elmi-ictimai həyatında akademiyanın rolundan bəhs edib. Diqqətə çatdırılıb ki, Ulu Öndərin Azərbaycana rəhbərlik etdiyi illər ölkəmizin tarixinə elmin və təhsilin, mədəniyyətin tərəqqi dövrü kimi daxil olub. Həmin illərdə müdrik rəhbər Heydər Əliyev Azərbaycan elminin tərəqqisinə mane olan bir sıra amilləri aradan qaldırıb, mövcud potensialı ölkənin gələcək inkişafının elmi əsaslar üzərində qurulmasına, respublikanın mədəni intellektual resurslarının gücləndirilməsinə səfərbər edib.

Akademik A.Əlizadə ölkənin ictimai-siyasi həyatında və Azərbaycan dövlətinin müxtəlif sahələrinin inkişafında ağsaqqalların rolunu xüsusi qeyd edib. Bildirilib ki, ümummilli lider Heydər Əliyev ölkəmizin ictimai-siyasi, elmi-mədəni həyatında mühüm qərarların qəbul edilməsi zamanı daim ağsaqqallarla görüşlər keçirər, həmişə onların fikirlərinə hörmətlə yanaşardı. Bu gün cəmiyyətimizin müxtəlif sahələrində əzmlə çalışan ağsaqqallarımızın, ziyalı nəslin həyat və fəaliyyəti gənclərimiz üçün bir örnəkdir.

Sonra Respublika Ağsaqqallar Şurasının sədri, Milli Məclisin deputatı Fəttah Heydərov “Ümummilli lider Heydər Əliyev Azərbaycan dövlətinin banisidir. İctimai-siyasi həyatda respublika ağsaqqallarının rolu” mövzusunda məruzə ilə çıxış edib.

F.Heydərov Ulu Öndərin dövlətimiz və xalqımız qarşısındakı tarixi xidmətlərindən söz açıb. Bildirilib ki, siyasi müdrikliyinə, zəngin dövlətçilik və idarəçilik təcrübəsinə əsaslanaraq milləti parçalanmaqdan, ölkəni məhv olmaqdan qurtarıb tez bir zamanda Azərbaycanın dünyəvi, demokratik dövlət kimi dünyada öz layiqli yerini tutmasına nail olmuş ümummilli lider Heydər Əliyevin nurlu xatirəsi daim xalqımızın qəlbində yaşayacaqdır.

Diqqətə çatdırılıb ki, Ulu Öndərin siyasəti hazırda onun siyasi kursunun layiqli davamçısı Prezident İlham Əliyev tərəfindən uğurla davam etdirilir. Bu gün ölkəmiz regionun ən qüdrətli dövlətləri sırasında özünə layiqli yer tutub. “Bakı-2015” ilk Avropa Oyunlarının ölkəmizdə keçirilməsi Azərbaycanın dünyada tanıdılmasının parlaq nümunəsidir. Ölkəmizdə dinindən, dilindən, mənsubiyyətindən asılı olmayaraq müxtəlif xalqların nümayəndələri mehriban və sülh şəraitində yaşayırlar.

F.Heydərov Azərbaycan elminin, mədəniyyətinin, incəsənətimizin, milli-mənəvi dəyərlərimizin dünyada tanıdılmasında Heydər Əliyev Fondunun xidmətlərini xüsusi qeyd edib.

Ulu Öndərin hakimiyyətə qayıdışından sonra ölkə həyatının bütün sahələrində ağsaqqalların rolunun daha da artdığını deyən F.Heydərov məhz ümummilli lider Heydər Əliyevin sayəsində ağsaqqalların ölkənin ictimai-siyasi həyatında fəal iştirakının təmin edildiyini vurğulayıb. Bildirilib ki, Azərbaycan xalqının milli dəyərlərininin parlaq nümunəsi kimi, tarix boyu ağsaqqallar cəmiyyətdə yüksək hörmət və nüfuz sahibi olublar. Hər zaman öz müdrikliyi ilə seçilən ağsaqqallarımız Azərbaycan dövlətçiliyinin çətin günlərində də xalqın ön sıralarında olub, insanlara ən doğru yolu göstəriblər.

Tədbirdə AMEA-nın vitse-prezidenti, Milli Məclisin deputatı, akademik İsa Həbibbəyli “Azərbaycan Respublikasının ictimai-siyasi həyatında Milli Elmlər Akademiyasının rolu” mövzusunda məruzəsində ulu öndər Heydər Əliyevin AMEA-nın inkişafındakı tarixi xidmətlərindən, alimlər, ziyalılar ilə keçirdiyi görüşlərdən söz açıb. Akademik bildirib ki, Ümummilli Lider hər zaman Azərbaycan elmi qarşısında dayanan əsaslı problemlərə toxunaraq və onların aktuallığını əsaslandıraraq alimlərimizə dövlətimiz, xalqımız üçün daha gərəkli strateji məsələlərlə məşğul olmağı tövsiyə edib, elmin inkişaf strategiyasının əsas müddəalarını irəli sürüb.

Akademik İ.Həbibbəyli Ulu Öndərin Azərbaycan tarixi, ədəbiyyatı və mədəniyyətinin öyrənilməsi, öyrədilməsi, müxtəlif problemlərinin tədqiqi, tarix, mədəniyyət və ədəbiyyat sahəsində xidməti olan şəxsiyyətlərin xalqa tanıdılması, tanınmış insanların adlarının əbədiləşdirilməsi istiqamətində genişmiqyaslı fəaliyyətindən danışıb. Qeyd edilib ki, müdrik rəhbərin qayğısının nəticəsidir ki, bu gün də ədəbiyyat və mədəniyyətimizin müxtəlif problemlərinə aid geniş tədqiqatlar aparılır, fundamental əsərlər yazılır.

AMEA-nın vitse-prezidenti bildirib ki, müdrik dövlət xadimi Heydər Əliyevin ikinci dəfə hakimiyyətə qayıdışından sonra akademiyaya dövlət statusu verilib. Akademiya “Milli Elmlər Akademiyası “statusunu Ulu Öndərin Sərəncamı ilə qazanıb.

AMEA-nın Gənc Alim və Mütəxəssislər Şurasının sədri, fizika üzrə fəlsəfə doktoru Famin Salmanov respublikanın ictimai-siyasi həyatında gənc alimlərin rolundan danışıb. O, Azərbaycan gənclərinin yüksək intellektli aparıcı qüvvə kimi formalaşmasında Ulu Öndərin xidmətlərindən bəhs edib. Bildirilib ki, bu gün Azərbaycanda aparılan gənclər siyasəti gənc nəslin, o cümlədən elmi gəncliyin inkişafına hərtərəfli dəstək verilməsi Heydər Əliyev siyasətinin davamıdır və bu siyasət Prezident İlham Əliyevin gənclər siyasəti ilə bağlı konsepsiyada əksini tapır. Müxtəlif sahələrdə fəaliyyət göstərən intellektual səviyyəli gənclərin elmi-ictimai fəaliyyətlərinin inkişafına xidmət edən mühüm layihələrin həyata keçirilməsi Heydər Əliyev siyasətinin təməl prinsiplərinə söykənir. F.Salmanov qeyd edib ki, akademiyada fəaliyyət göstərən gənclərin dünyanın tanınmış elmi-tədqiqat mərkəzləri ilə əməkdaşlığı, nüfuzlu beynəlxalq statuslu tədbirlərdə Azərbaycan elmini təmsil etmələri görkəmli dövlət xadimi Heydər Əliyevin mirası və Azərbaycan gəncliyinin uğurudur. Ulu Öndərin müəyyənləşdirdiyi elm siyasətinə gənc alimlərimiz daim sadiqdirlər və bu siyasətin yaşaması üçün lazım olan bütün fədakarlığı göstərirlər.

Akademik Rasim Əliquliyev ölkəmizdə informasiya və kommunikasiya texnologiyalarının sürətlə inkişaf etdiyini bildirib, bu sahədə əldə olunan uğur və nailiyyətlərdən söz açıb. Qeyd edilib ki, dövlətimizin başçısı tərəfindən ölkəmizdə informasiya cəmiyyətinin qurulması istiqamətində mühüm addımlar atılır, müxtəlif layihələr həyata keçirilir.

Tədbirdə akademik Teymur Bünyadov, xalq şairi Zəlimxan Yaqub və digər çıxış edənlər dahi rəhbər Heydər Əliyev haqqında fikir və mülahizələrini bölüşüb, Ulu Öndərin əsasını qoyduğu məqsədyönlü siyasətin və ənənələrin uğurla davam etdiriləcəyini bildiriblər.