ELM VƏ TƏHSİL
AMEA ilə “Thomson Reuters” agentliyi arasında əməkdaşlığa dair müqavilə imzalanıb VİDEO
Bakı, 11 oktyabr, Maqsud Dadaşov, AZƏRTAC
Oktyabrın 11-də Azərbaycan Milli Elmlər Akademiyası (AMEA) ilə dünyanın tanınmış elmi-analitik informasiya təminatçısı olan “Thomson Reuters” agentliyi arasında əməkdaşlığa dair müqavilə imzalanıb.
AZƏRTAC xəbər verir ki, sənədi AMEA-nın prezidenti, akademik Akif Əlizadə və agentliyin Əqli Mülkiyyət və Elm Departamentinin İnkişaf Etməkdə olan Bazarlar üzrə baş direktoru xanım Viji Krişnan imzalayıblar.
Müqaviləyə əsasən AMEA-nın 40-dan çox elmi-tədqiqat müəssisəsi və orada çalışan çoxlu sayda alim və mütəxəssislər “Thomson Reuters” platformasının bibliometrik şəbəkəsindən (“Web of Science”) istifadə imkanı əldə edəcəklər. Həmçinin “Thomson Reuters” agentliyinin mütəxəssisləri tərəfindən bu bazaya daxil olan jurnallarda məqalələrin dərc edilməsi qaydaları, elmi müəssisələrdə əldə olunan yeniliklər və alimlərin beynəlxalq aləmdə tanınması kimi müxtəlif mövzularda mütəmadi seminar və treninqlərin keçirilməsi nəzərdə tutulur.
Tədbirdə çıxış edən A.Əlizadə “Thomson Reuters” ilə əməkdaşlığı yüksək dəyərləndirib, müqavilənin Azərbaycanda elmin inkişafına, müvafiq sahədə ölkəmizdə əldə olunan nailiyyətlərin dünyaya çatdırılmasına töhfə verəcəyini və tədqiqatçılar üçün yeni imkanlar açacağını bildirib. Rəhbərlik etdiyi qurumun fəaliyyəti haqqında məlumat verən akademik diqqətə çatdırıb ki, son illər AMEA-nın elmi müəssisələrinin infrastrukturunun müasirləşdirilməsi, akademiyada multidissiplinar tədqiqatların inkişaf etdirilməsi üçün əhəmiyyətli addımlar atılıb. Elmi fəaliyyətin səmərəliliyinin artırılması məqsədilə AMEA-nın laboratoriyaları qabaqcıl texnologiyalar və avadanlıqla təmin olunub, gənc alim və mütəxəssislər daim dünyanın müxtəlif elmi təşkilatlarında təcrübə keçməyə göndərilir.
V.Krişnan AMEA ilə əməkdaşlıqdan məmnunluğunu bildirib. Vurğulayıb ki, müqaviləyə əsasən yüzlərlə azərbaycanlı tədqiqatçı beynəlxalq bilik mərkəzləri ilə uğurlu əməkdaşlıq qurmaq və yerli imkanları maksimum inkişaf etdirmək üçün 20 milyon istifadəçisi olan nüfuzlu “Web of Science” bazasına qoşulmaq imkanı əldə edəcək. O deyib ki, bizim üçün, AMEA ilə əməkdaşlıq Azərbaycan ilə əlaqələrimizin tarixində mühüm mərhələdir. Peşəkar dialoqumuza xüsusi əhəmiyyət veririk. AMEA və onun elmi-tədqiqat institutları ilə güclü ümumi proqram yaratmağa nail olacağımıza inanırıq.
Tədbirdə digər çıxış edənlər də iki qurum arasında əməkdaşlığın qurulmasını AMEA-nın beynəlxalq əlaqələrini genişləndirməsi, yeni tərəfdaşlar qazanması və növbəti uğurlara imza atması ucun mühüm addım kimi dəyərləndiriblər.