ELM VƏ TƏHSİL
AMEA-nın institut və təşkilatlarının saytları üzrə aparılan monitorinqin nəticələri açıqlanıb
Bakı, 10 mart, AZƏRTAC
Azərbaycan Milli Elmlər Akademiyasının (AMEA) elmi müəssisə və təşkilatları arasında ötən il üçün “İlin ən yaxşı veb-saytı” nominasiyası üzrə qalib saytların müəyyənləşdirilməsi ilə bağlı aparılan monitorinqin nəticələri açıqlanıb.
AMEA-dan AZƏRTAC-a bildiriblər ki, monitorinq akademiyanın rəyasət heyəti aparatı ictimaiyyətlə əlaqələr və elmin populyarlaşdırılması idarəsi tərəfindən həyata keçirilib.
Direktorlar Şurasının iclasında müasir dövrdə veb-saytların geniş imkanlara malik olduğunu diqqətə çatdıran AMEA-nın prezidenti, akademik Akif Əlizadə deyib ki, Azərbaycan elminin dünya informasiya məkanına uğurlu inteqrasiyasında vacib rol oynayan amillərdən biri də elmlə bağlı informasiya təminatının gücləndirilməsidir. Bu baxımdan elmi fəaliyyətin yüksək səviyyədə təbliği, müxtəlif elm sahələri üzrə elektron informasiya resurslarının yaradılması və inkişaf etdirilməsi böyük əhəmiyyət daşıyır.
Sonra AMEA rəyasət heyəti aparatı ictimaiyyətlə əlaqələr və elmin populyarlaşdırılması idarəsi rəisinin müavini, monitorinq qrupunun rəhbəri Ülviyyə Rzayeva yekun hesabatı təqdim edib. Ümumilikdə akademiyanın 6 elmi bölməsi üzrə 40 institut və təşkilatın rəsmi informasiya resursunun analiz edildiyi bildirilib. Qeyd olunub ki, monitorinqin aparılmasının əsas məqsədi “İnformasiya əldə etmək haqqında” Qanunun tələbləri baxımından elmi müəssisə və təşkilatların saytlarında informasiyaların, müraciətlərin kəmiyyət göstəricilərini nəzərə almaqla mövcud vəziyyəti araşdırmaq, o cümlədən saytların fəaliyyətini stimullaşdırmaq, elmin populyarlaşdırılması və kütləvi təbliğində xidmətləri olan jurnalistləri, yaradıcı kollektivi həvəsləndirməkdir.
Monitorinqin müraciətlərin və xəbərlərin sayına görə aparıldığını vurğulayan Ü.Rzayeva veb-saytların fəaliyyəti ilə bağlı müsbət tendensiyaları, eləcə də problem və tövsiyələri diqqətə çatdırıb. Bildirilib ki, ilk üç yerdə AMEA-nın İnformasiya Texnologiyaları İnstitutu, Neft-Kimya Prosesləri İnstitutu və Milli Azərbaycan Tarixi Muzeyi qərarlaşıb. Monitorinq zamanı elmi müəssisə və təşkilatların saytlarının əksəriyyətində informasiya təminatı sahəsində müsbət dinamika müşahidə olunub. Akademiyanın fəaliyyətinin, aparılan elmi tədqiqatlar haqqında zəruri məlumatların və s. ictimaiyyətə operativ çatdırılması istiqamətində səmərəli fəaliyyət göstərən saytlar üstünlük təşkil edir.
Bu gün elmin populyarlaşdırılması və kütləvi təbliği sahəsində internet-medianın mühüm rol oynadığını söyləyən Ü.Rzayeva veb-saytların fəaliyyətinin yüksək səviyyədə təşkilinin, institutlarda ictimaiyyətlə əlaqələr şöbələrinin yaradılmasının akademiyanın həyatında taleyüklü məsələ olduğunu bildirib. O deyib: “İnanırıq ki, informasiya müharibəsində qalib gəlmək üçün elmi jurnalistlər ordusunun formalaşdırılması və inkişaf etdirilməsi elmin populyarlaşdırılmasına və təbliğinə dəyərli töhfə verəcək”.
AMEA-nın institutlarının rəhbərləri monitorinqin əhəmiyyətini vurğulayıb, növbəti mərhələdə veb-saytların çoxmeyarlı qiymətləndirilməsini təklif ediblər.