Bakı, 29 aprel, AZƏRTAC

Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) aprelin 7-dən 29-dək Tərtər, Ağcabədi, Ağdam, Füzuli, Goranboy, Tovuz, Zərdab, Şəmkir, Cəlilabad və Samux rayonlarında aşkar olunan partlamamış hərbi sursat (PHS) haqqında hesabatı açıqlayıb.

ANAMA-nın mətbuat xidmətindən AZƏRTAC-a bildiriblər ki, Tərtər rayonunun Qapanlı kəndində 100 ev və həyətyanı sahəyə, 1 tibb məntəqəsinə, 137 partlayış yerinə baxış keçirilib və partlamış sursatların qalıqları təmizlənıb. Bununla yanaşı, partlamamış 3 ədəd 85 millimetrlik top mərmisi, 9 ədəd 122 millimetrlik top mərmisi və 1 ədəd 152 millimetrlik top mərmisi aşkar edilərək götürülüb.

Yuxarı Qapanlı kəndində 5 ev və həyətyanı sahəyə, 5 partlayış yerinə baxış keçirilib və partlamış sursatların qalıqları təmizlənib. Qarağacı kəndində 22 ev və həyətyanı sahəyə və 24 partlayış yerinə baxış keçirilib, partlamış sursatların qalıqları təmizlənib. Qaradağlı kəndində 36 ev, 52 partlayış yerinə və bir əkin sahəsinə baxış keçirilib, partlamış sursatların qalıqları təmizlənib.

Əskipara kəndində 1 ev və həyətyanı sahəyə, 4 ferma və 13 partlayış yerinə baxış keçirilib, partlamış sursatların qalıqları təmizlənib. Bir əkin sahəsində 30 ədəd 122 millimetrlik partlamamış top mərmisi aşkar edilərək götürülüb. Şıxarx kəndində 1 ev və həyətyanı sahəyə, 1 əkin sahəsində 5 partlayış yerinə baxış keçirilib. Bir ədəd partlamamış 152 millimetrlik top mərmisi, 1 ədəd 60 millimetrlik minaatan mərmisi aşkar olunaraq götürülüb. Buruc kəndində 1 ev və həyətyanı sahədə 1 partlayış yerinə baxış keçirilib. Nəticədə 1000 kvadratmetr ərazi yoxlanılıb və partlamamış hərbi sursat aşkar edilməyib. Hacıqərvənd kəndində 1 ev və həyətyanı sahəyə baxış keçirilib və partlamamış hərbi sursat aşkar edilməyib.

Tərtər şəhərində 2 ev və həyətyanı sahədə 2 partlayış yerinə baxış keçirilib. Bir ədəd 122 millimetrlik 9M22U raketinin motor hissəsi aşkar edilərək zərərsizləşdirilib.

Ağcabədi rayonunun Yuxarı Qiyaməddinli kəndində 1 ev və həyətyanı sahəyə düşmüş 1 ədəd partlamamış 122 millimetrlik top mərmisi aşkar olub. Mirzəhaqverdili kəndində 1 ev və həyətyanı sahəyə baxış keçirilib və partlamış sursatın qalıqları təmizlənib. Qaraxanlı kəndində 18 ev və həyətyanı sahəyə və 22 partlayış yerinə baxış keçirilib və partlamış sursatın qalıqları təmizlənib.

Ağdam rayonunun Təzəkənd kəndində 8 ev və həyətyanı sahəyə, 5 əkin sahəsinə və 28 partlayış yerinə baxış keçirilib. Bir ədəd partlamamış 122 millimetrlik top mərmisi və 1 partlamamış 100 millimetrlik tank mərmisi aşkarlanaraq zərərsizləşdirilib. Orta Qərvənd kəndində 1 ev və həyətyanı sahəyə baxış keçirilib. Bir partlamamış 122 millimetrlik top mərmisi aşkar olunub və zərərsizləşdirilib. Çıraqlı kəndində dörd ev və həyətyanı sahəyə və 4 partlayış yerinə baxış keçirilib, partlamış sursatın qalıqları götürülüb. Mahrızlı kəndində 15 ev və həyətyanı sahəyə baxış keçirilib, qrad mərmilərinin partlamış hissələri çıxarılıb. Əfətli kəndində 9 ev və həyətyanı sahə, 1 partlayış yerinə baxış keçirilmiş, 1 ədəd partlamamış 152 millimetrlik top mərmisi aşkar olunmuş və zərərsizləşdirilib. Kənddən keçən Qarqar çayında Ermənistan istehsalı olan beş ədəd piyada əleyhinə mina aşkar olunaraq götürülüb

Ballar kəndində dörd əkin sahəsində 4 partlayış yerinə baxış keçirilib, partlamamış sursat aşkar edilməyib. Ergi düzündə bir fermaya baxış keçirilib, 1 ədəd 100 millimetrlik top mərmisi aşkar edilərək götürülüb. Evoğlu kəndində dörd əkin sahəsində 4 partlayış yerinə baxış keçirilib, partlamamış sursat aşkar edilməyib. Baharlı kəndində bir əkin sahəsində 1 partlayış yerinə baxış keçirilib, partlamamış sursat aşkar edilməyib. Yusifcanlı kəndində 1 əkin sahəsində 1 partlayış yerinə baxış keçirilib, partlamamış sursat aşkar edilməyib. Dörd yol-1 qəsəbəsində bir əkin sahədə 1 partlayış yerinə baxış keçirilib və partlamamış sursat aşkar edilməyib. Çəmənli kəndində 1 partlayış yerinə baxış keçirilib və partlamamış sursat aşkar edilməyib. Səfərli qəsəbəsində 1 ev və həyətyanı sahəyə, 2 partlayış yerinə baxış keçirilib, partlamamış sursat aşkar edilməyib.

Goranboy rayonunun Tapqaraqoyunlu kəndində 133 ev və həyətyanı sahəyə, 2 hərbi hissəyə, 1 kənd qəbiristanlığı, 1 kənd orta məktəbinin ərazisi yoxlanılıb, 156 partlayış yerindən sursatların qalıqları çıxarılıb. İki ədəd partlamamış 100 millimetrlik, 1 ədəd 122 millimetrlik top mərmisi və 1 ədəd 82 millimetrlik minaatan mərmisi aşkar olunaraq zərərsizləşdirilib. Qaxdud kəndində 2 evə və həyətyanı sahəyə, 2 partlayış yerinə baxış keçirilib, partlamış sursatların qəlpələri və qalıqları götürülüb.

Füzuli rayonunun Mirzənağılı kəndində 5 ev və həyətyanı sahəyə, 4 partlayış yerinə baxış keçirilib, bir ədəd 82 millimetrlik minaatan mərmi aşkar edilib. Qazaxlar kəndində 3 ev və həyətyanı sahələrdə 3 partlayış yerinə baxış keçirilib. Əhmədalılar kəndində 7 ev və həyətyanı sahədə 7 partlayış yerinə baxış keçirilib, partlamış sursatların qəlpələri və qalıqları götürülüb. Alıxanlı kəndində 8 ev və həyətyanı sahəyə, Çaxır zavodu ərazisində 37 partlayış yerinə baxış keçirilib, 1 ədəd 100 millimetrlik top mərmisi, 1 ədəd 82 millimetrlik minaatan mərmi və 1 ədəd 125 millimetrlik tank mərmisi aşkar olunaraq götürülüb.

Horadiz şəhərində və ətrafında 89 partlayış yerinə baxış keçirilib, 81 partlamış, 3 partlamamış hərbi sursat aşkar olunaraq götürülüb.

Tovuz rayonunun Qədirli kəndində 1 ev və həyətyanı sahəyə baxış keçirilib, 84 ədəd 100 millimetrlik partlamamış top mərmisi aşkar edilərək götürülüb.

Zərdab rayonunun Körpükənd kəndində aprelin 22-də saat 20:02-də Zərdab rayon polis şöbəsinin rəisi Fövqəladə Hallar Nazirliyi Böhran Vəziyyətlərində İdarəetmə Mərkəzinə zəng edərək rayonunun Körpü kəndi ərazisində bir tank əleyhinə mina aşkar olunması barədə məlumat verilib. Agentliyin xüsusi mobil çevik əməliyyat qrupu dərhal həmin əraziyə göndərilib və sel suları vasitəsilə sahilə çıxan bir tank əleyhinə minanın olduğu müəyyən olunub.

Tapılan minanın ətrafı işarələnmiş və yerli polislər tərəfindən mühafizəsi təşkil olunub. Havanın qaranlıq olması nəzərə alınaraq minanın zərərsizləşdirilməsi aprelin 23-də partlayış yolu ilə məhv edilib.

Samux rayonunun Kolayır kəndində 3 ədəd OFAB-50 aviabomba, 1122 ədəd 12.7 millimetrlik və 15 ədəd 7.62 millimetrlik patron aşkar edilərək zərərsizləşdirilib.

ANAMA-nın mütəxəssisləri Şəmkir şəhərinin 20 yanvar küçəsində 1 ədəd aşkar olunan 122 millimetrlik top mərmisinə texniki baxış keçirib və daşınması mümkün olduğu üçün götürülərək zərərsizləşdirilməsi üçün agentliyin mərkəzi partlayış ərazisinə daşınıb. Aşkar edilmiş sursatın ətrafında 100 kvadratmetr əraziyə baxış keçirilib, əlavə heç bir təhlükəli əşya və ya qurğu aşkar edilməyib.

Cəlilabad rayonunda aprelin 27-də 2 saat 10:16-də Daxili İşlər Nazirliyinin əməliyyat növbətçisinin köməkçisi tərəfindən Fövqəladə Hallar Nazirliyinin Böhran Vəziyyətlərində İdarəetmə Mərkəzinə zəng daxil olub. Məlumata əsasən, Cəlilabad rayonu Privolnoye kəndi ərazisindən keçən Göytəpə çayında 4 ədəd mərmi aşkar edilib. Agentliyin xüsusi mobil çevik əməliyyat qrupu dərhal həmin əraziyə göndərilib və çay vasitəsilə sahilə çıxan altı ədəd tank əleyhinə minaları aşkar ediblər. Tapılan minaların Daxili İşlər Nazirliyinin Daxili Qoşunlarının əməkdaşları ilə birlikdə partlayış yolu ilə zərərsizləşdirilib.

Ümumilikdə, agentlik tərəfindən aprelin 7-dən 29-dək Tərtər, Ağcabədi, Ağdam, Füzuli, Zərdab, Şəmkir, Cəlilabad, Goranboy və Tovuz rayonlarında 378 ev və həyətyanı sahəyə, 2 hərbi hissəyə, 1 kənd qəbiristanlığına, 1 kənd orta məktəbinə, 1 tibb məntəqəsinə, 5 fermaya və əkin sahələrinə baxış keçirilib. 1294 ədəd partlamamış hərbi sursat və on piyada əleyhinə mina, altı tank əleyhinə mina aşkar olunaraq zərərsizləşdirilib.

Hazırda agentlik tərəfindən yaradılmış minaaxtaran itlərin dəstəyi ilə xüsusi təyinatlı mobil çevik qrupları tərəfindən təmas xəttində yerləşən kəndlərdə evlərlə yanaşı məktəblər və digər obyektlərin yerləşdiyi ərazilərdə əməliyyatlar davam etdirilir.