MƏDƏNİYYƏT
ATMU-nun əməkdaşları beynəlxalq tədbirdə iştirak edib
Bakı, 20 aprel, AZƏRTAC
Azərbaycan Turizm və Menecment Universitetinin (ATMU) iki əməkdaşı Avstriyanın IMC Krems Tədbiqi Elmlər Universitetində (TEU) keçirilən “IMC Beynəlxalq Magistr Günləri 2016” adlı beynəlxalq tədbirə qatılıb. Məqsəd ikitərəfli əlaqələrin inkişafı, beynəlxalq səviyyədə mübadilə proqramlarının təhsilin inkişafına dəstəyinin intensivləşdirilməsindən ibarət olub.
ATMU-dan AZƏRTAC-a bildirilib ki, tədbirdə Azərbaycanla yanaşı, ABŞ, Kanada, Meksika, Rusiya, Avstriya, Fransa, İspaniya, Finlandiya, İsveç, Serbiya və Sinqapurun nümayəndə heyətləri də iştirak ediblər.
Beynəlxalq tədbir çərçivəsində ATMU-nun biznes İdarəçiliyi fakültəsinin və eyni zamanda, “Azərbaycan-Avstriya Turizm Proqramı”nın (AATP) müəllimi, iqtisadiyyat üzrə fəlsəfə doktoru Günel Poladova “Azərbaycan və Qafqaz regionunda biznesin qurulmasına iqtisadi, siyasi və mədəni amillərin təsiri ” mövzusunda seminarlar keçirib. Universitetin beynəlxalq əlaqələr şöbəsinin əməkdaşı Humay Cəfərli isə İMC Krems TEU-da keçirilən görüşlərə qatılıb, “Azərbaycan-Avstriya Turizm Proqramı”nın icrası ilə bağlı inzibati prosedurların, eləcə də proqram üzrə gələcək əməkdaşlıq perspektivlərini müzakirə edib.
Görüşün əsas müzakirə mövzularından biri də 2017-ci ildə ATMU və İMC Krems TEU arasında beynəlxalq ikili diplom proqramının yaradılmasının və fəaliyyətinin 10 illik yubileyinə həsr olunacaq tədbirin təşkilati məsələsinə həsr edilib.
Tədbir zamanı nəzəri və müzakirəli seminarlar keçirilib, müxtəlif tarixi-mədəni yerlərə ekskursiyalar təşkil olunub.
Sonda iştirakçılara mükafat və sertifikatlar təqdim edilib.