Bakı, 16 fevral, AZƏRTAC

Martın 15-dən etibarən AZALJET brendi (“Azərbaycan Hava Yolları” QSC-nin aşağıbüdcəli brendi) altında Moskvanın “Vnukovo” Hava Limanından Azərbaycanın regionlarına - Gəncə və Qəbələyə müntəzəm reyslərin yerinə yetirilməsinə başlanılacaq.

“Azərbaycan Hava Yolları” QSC-nin mətbuat xidmətindən AZƏRTAC-a bildirilib ki, Moskva-Gəncə reysləri hər həftənin çərşənbə və şənbə günləri, Moskva-Qəbələ reysləri isə hər həftənin cümə axşamı günləri “Airbus A320” təyyarələri ilə yerinə yetiriləcək.

“Vnukovo” Beynəlxalq Hava Limanından (VKO) uçuş yerli vaxtla saat 15:10–da, Qəbələ Beynəlxalq Hava Limanına (GBB) və Gəncə Beynəlxalq Hava Limanına (KVD) eniş saat 20:30-da baş tutacaq. Qəbələ və Gəncədən uçuş isə saat 20:30-da, “Vnukovo” Beynəlxalq Hava Limanına eniş yerli vaxtla saat 22:20-də həyata keçiriləcək.

Aviabiletlərin qiymətləri 49 avrodan başlayacaq (bir istiqamətdə). Baqajın daşınma qiyməti hər kiloqram üçün 2 avro təşkil edəcək.

Aviabiletləri şirkətin www.azal.az  saytında bronlaşdırmaq, AZAL-ın kassalarında və rəsmi agentliklərdə əldə etmək mümkündür.

Sözügedən reyslərdə sərnişinlər AZAL Miles bonus proqramından istifadə edə bilərlər. AZAL Miles bonus proqramı haqqında ətraflı məlumat aviaşirkətin rəsmi internet saytında verilib. www.miles.azal.az  Proqram iştirakçısı olmayan şəxslər onlayn qeydiyyatdan keçə bilər. Balların avtomatik hesablanması üçün aviabiletin alınması prosesində müvafiq xanada AZAL Miles iştirakçısının unikal nömrəsini daxil etmək kifayətdir.

Aviabiletləri əldə etmək və daha ətraflı məlumat almaq üçün (+99412) 598-88-80; *8880, telefon nömrələri ilə və [email protected]  elektron ünvanı ilə əlaqə saxlamaq olar.

AZAL Miles bonus proqramı ilə bağlı sualları ya [email protected]  email ünvanına və ya www.azal.az saytındakı əlaqə forması vasitəsilə göndərmək olar.