Sentyabrın 12-də Azərbaycan Beynəlxalq Əməliyyat Şirkətində ABƏŞ-in və “Britiş petroleum-Azərbaycan”şirkətinin prezidenti Devid Vudvordun, “BTC Ko” şirkətinin vitse-prezidentləri Maykl Tausent və Corc Saylerin iştirakı ilə mətbuat konfransı keçirilmişdir.

Devid Vudvord mətbuat konfransını açaraq bildirdi ki, sentyabrın 18-də Səngəçal terminalının genişləndirilmiş sahəsində Bakı-Tbilisi-Ceyhan /BTC/ ixrac neft boru kəmərinin tikintisinin bünövrəsinin qoyulmasına həsr olunmuş mərasim keçiriləcəkdir. Bu, xam neftin Azərbaycandan və Xəzər regionundan Gürcüstan vasitəsilə Türkiyənin Aralıq dənizindəki Ceyhan limanına ixrac edəcək 1760 kilometrlik boru kəmərinin tikintisi layihəsinin həyata keçirilməsində mühüm mərhələdir.

Devid Vudvord dedi ki, ərazisindən ixrac boru kəməri keçəcək ölkələrin – Azərbaycanın, Gürcüstanın və Türkiyənin prezidentləri – zati-aliləri Heydər Əliyev, Əhməd Necdət Sezər və Eduard Şevardnadze tikintinin başlamasını bildirən xatirə lövhəsini açacaq, paslanmayan poladdan hazırlanmış və içərisində gələcək nəsillərə müraciət məktubu olan “zaman kapsulu”nu bünövrəyə qoyacaqlar.

O vurğuladı ki, Xəzər dənizinin Azərbaycan sektorundakı “Azəri”, “Çıraq” yataqlarının və “Günəşli” yatağının (AÇG) dərinlikdə yerləşən hissəsinin işlənilməsi üzrə Rəhbər Komitə AÇG-nin tammiqyaslı işlənilməsi layihəsinin ikinci fazasına başlanmasını sanksiyalaşdırır. Faza -2 layihəsinin imzalanmasına dair rəsmi mərasim Azərbaycan Respublikasının Prezidenti zati-aliləri Heydər Əliyevin iştirakı ilə Prezident sarayında keçiriləcəkdir.

Devid Vudvord bildirdi ki, bu il avqustun 1-də Londonda “Bakı-Tbilisi-Ceyhan boru kəməri “şirkətinin /BTC Ko/yaradılmasının rəsmiləşdirilməsi üçün lazımi sənədlər imzalanmışdır. İmzalanma mərasimində bütün tranzit ölkələrin –Azərbaycan, Gürcüstan və Türkiyə hökumətlərinin nümayəndələri iştirak etmişlər. ARDNŞ-in prezidenti Natiq Əliyev BTC Ko-nun Direktorlar Şurasının sədri, bp şirkəti isə layihənin operatorudur. Hazırda BTC Ko-nun səhmdarları bunlardır: bp /38,21%/, ARDNŞ/25%/, Statoyl/9,58%/”, Yunokal/8,90%/, TPAO /7,55%/, Eni/5%/, İtoçu/3,40%/ və Amerada Hess/2,36%/. Əlavə olaraq, TotalFinaElf şirkəti də BTC-də 5% pay almaq hüququ qazanmışdır. D.Vudvord Bakı-Tbilisi-Ceyhan boru kəmərinin tikintisinin mühüm müqavilələrini həyata keçirəcək şirkətlərin də adlarını açıqladı. Azərbaycanda bu, “Consolidated Contractors İnternational Company” /Yunanıstan/ şirkətidir. Gürcüstanda boruların çəkilişini və hər iki ölkədə qurğuların tikintisini “Petrofac”/ABŞ/ şirkəti ilə birlikdə birgə müəssisəyə rəhbərlik edən “Spie Capaq”/Fransa/ şirkəti həyata keçirəcəkdir. Tenderin iştirakçılarının siyahısını 2001-ci ilin sonunda BTC-nin bütün tərəfdaşları bəyənmişlər. Türkiyənin “BOTAS” dövlət boru kəməri şirkəti kəmərin Türkiyə sahəsinin başa çatdırılıb təhvil verilməsi üzrə podratçı olaraq qalır.

Devid Vudvord “ Consolidated Contractors İnternational Company”  şirkətinin təsisçilərindən birinin milliyyətcə erməni olmasına necə baxırsınız?” sualına cavabındadedi:

-Sizdəki informasiya düzgün deyildir. BTC Ko-nun bütün tərəfdaşları boru kəmərinin tikintisinə dair tenderdə iştirak edən şirkətləri diqqətlə öyrənmişlər.  Bundan əlavə, BTC Ko-nun başlıca iştirakçılarından biri Azərbaycan Respublikasının Dövlət Neft Şirkətidir.

Devid Vudvord  layihənin texniki tərəfləri barədə də məlumat verdi. Boru kəmərinin 8 nasos stansiyası olacaqdır. Kəmərin marşrutu 1500-dən çox çaydan keçəcək və onun ən yüksək nöqtəsi dəniz səviyyəsindən 2700 metr hündürlükdə olacaqdır. Tikintini başa çatdırılmasına 30 ay vaxt  lazım gələcəkdir. Bu işlər,əslində, 2003-cü ilin birinci rübündə başlanacaq və 2004-cü ilin dördüncü rübündəqurtaracaqdır. 2005-ci ilin yazında boru kəməri ilk nefti qəbul etməyə hazır olacaqdır. Layihənin həyata keçirilməsinə 2,95 milyard dollar həcmində investisiya qoyulacaqdır.

ABƏŞ-in prezidenti Faza - 1 layihəsindən danışarkən bildirdi ki, bu layihədə 2300-dən çox Azərbaycan vətəndaşı çalışır . Faza - 2 layihəsi isə hasilatın birgə işlənilməsi ilkin neft layihəsindən sonra AÇG yataqlarının tammiqyaslı işlənilməsinin ikinci böyük iri mərhələsidir. 5,2 milyard dollar sərmayənin təxminən 3,8 milyardı obyektlərin tikintisinə  və sınaq buruqlarının qazılmasına, vəsaitin qalan hissəsi isə neft hasilatının sonrakı dövründə istismar quyularının qazılmasına sərf olunacaqdır.Bu layihə həyata keçirilərkən ölkəmizdə 2000-dək əlavə iş yeri yaratmaq nəzərdə tutulur.

Devid Vudvord jurnalistlərin digər suallarına da cavab verdi.