RƏSMİ XRONİKA
AZƏRBAYCAN PREZİDENTİ HEYDƏR ƏLİYEVİN QƏRBİ AVROPA ÖLKƏLƏRİNƏ SƏFƏRİ DAVAM EDİR
Aprelin 23-də Azərbaycan dövlətinin başçısı NATO-nun iqamətgahında bu beynəlxalq təşkilatın baş katibi Havyer Solana ilə görüşmüşdür. Prezident Heydər Əliyev “Sülh naminə əməkdaşlıq” proqramı çərçivəsində Azərbaycan Respublikasının Şimali Atlantika İttifaqı ilə əməkdaşlığını təsdiqləyən prezentasiya sənədini cənab Solanaya təqdim etmişdir. Ölkəmizin hərbi strukturları rəhbərlərinin də iştirak etdikləri həmin görüşdə Azərbaycanın gələcəkdə NATO ilə əməkdaşlığı barədə məsələlər müzakirə olunmuşdur.
Bundan əvvəl isə Prezident Heydər Əliyev Amerika Birləşmiş Ştatlarının MDB və yeni müstəqil dövlətlər üzrə departamentinin rəhbəri Ceyms Kollinz və ABŞ-ın Belçikadakı səfiri ilə görüşmüşdür. Söhbət zamanı Azərbaycan-Amerika münasibətlərinin inkişaf etdirilməsi məsələləri ilə yanaşı, Azərbaycan-Ermənistan münaqişəsi və onun sülh yolu ilə aradan qaldırılması məsələləri də müzakirə olunmuşdur.
Həmin gün Azərbaycan Prezidenti Ümumdünya Ticarət Mərkəzində Belçikanın Xarici Ticarət Şurasının üzvləri və ölkənin işgüzar dairələrinin nümayəndələri qarşısında çıxış edərək? respublikamızın iqtisadi potensialı haqqında geniş məlumat vermişdir.
Dövlətimizin başçısı Avropa Birliyinin Brüsseldəki qərargahında Avropa Komissiyasının sədri Jak Santer və komissarı Van Den Bruk ilə görüşmüş, Azərbaycan ilə Avropa Birliyi arasında əlaqələrin inkişaf etdirilməsi yollarını müzakirə etmişdir.
Həmin gün Azərbaycan Prezidenti Heydər Əliyev ABŞ-ın Brüsseldəki Ticarət-İnvestisiya Mərkəzi ilə tanış olmuşdur. Dövlət başçımızın fikrincə, Avropa ölkələri ilə Birləşmiş Ştatların ticarət əlaqələrini tənzimləyən həmin mərkəzlə respublikamızın da əməkdaşlıq etməsi vacibdir.
Aprelin 23-də Prezident Heydər Əliyev Brüsselin “Konrad” mehmanxanasında Azərbaycan xalçaları sərgisinin açılışında iştirak etmişdir.
Aprelin 24-də Azərbaycan Respublikası Prezidentinin Belçikaya işgüzar səfəri başa çatmış və o, buradan Norveçə rəsmi səfərə yola düşmüşdür.