Azərbaycan Respublikasının Prezidenti Heydər Əliyev mayın 7-də Londonda Böyük Britaniyanın sənaye və energetika naziri Timm Eqqar ilə görüşmüşdür.

Azərbaycan rəhbəri Heydər Əliyevi ən yaxın dostu kimi hərarətlə qarşılayan cənab Eqqar onu Londonda görməyindən məmnun olduğunu bildirdi. Dövlətimizin başçısı ilə əvvəlki görüşlərini xoş xatirə kimi yada salan nazir Prezident Heydər Əliyevi özünə dost və qardaş hesab etdiyini söylədi.

Prezidentimiz də bu görüşdən şad olduğunu bildirdi. Heydər Əliyev respublikamızda hazırkı vəziyyətdən ətraflı söhbət açdı. “Əsrin müqaviləsi”nin həyata keçirilməsi sahəsində görülən işlərdən danışdı.

Böyük Britaniya naziri bu yaxınlarda ABŞ-a etdiyi səfər və orada “Ekson” şirkətinin rəhbərliyi ilə apardığı danışıqlar barədə Heydər Əliyevə məlumat verdi. Onun fikrincə, Azərbaycanın öz payından 5 faizi “Ekson”a verməsi çox düşünülmüş bir addımdır. Cənab Eqqar bildirdi ki, “Ekson” dünyanın ən aparıcı, böyük şirkətlərindən biridir və bu şirkət “Britiş Petroleum”la yaxşı münasibətdədir. O dedi ki, “Ekson” şirkətinin rəhbərləri Azərbaycanla əməkdaşlıqdan çox məmnundurlar və respublikanın digər neft yataqlarının birgə istismarında da iştirak etmək niyyətindədirlər.

Prezident Heydər Əliyev Azərbaycanın digər ölkələrin də neft şirkətləri ilə sıx əlaqələrindən danışdı, ölkəmizin neft müqaviləsində öz payının 5 faizini İrana vermək niyyətində olduğunu, lakin konsorsium üzvlərinin buna etiraz etdiyini vurğuladı. Azərbaycan rəhbəri İranın bu konsorsiumda iştirak etməməsindən təəssüfləndiyini bildirdi. Heydər Əliyev dedi ki, İran Azərbaycanın qonşusudur və ölkəmiz onunla sıx əlaqələr saxlamağa tərəfdardır.

Söhbət zamanı Xəzərin statusuna dair son vaxtlar meydana çıxan bəzi məsələlərin müzakirəsinə də geniş yer verildi. Heydər Əliyev dedi ki, Azərbaycan bu məsələdə Böyük Britaniyadan ciddi dəstək gözləyir. Prezidentin fikrincə, İngiltərənin ölkəmizdə maraqları uzunmüddətli olduğu üçün Ermənistan–Azərbaycan müharibəsinin sülh yolu ilə başa çatmasında, qaçqınlarımızın öz torpaqlarına qayıtmasında, respublikada iqtisadi islahatların həyata keçirilməsində Böyük Britaniya Azərbaycana yardım göstərməlidir.

Görüşdə Azərbaycandan çəkiləcək neft kəmərinin marşrutu ilə bağlı geniş fikir mübadiləsi aparıldı. Qeyd edildi ki, bu marşrutun hazırda bir neçə variantı vardır və Azərbaycanın fikrincə, həmin kəmər Türkiyədən keçməlidir. Heydər Əliyev bildirdi ki, neft kəmərinin çəkilməsi də Ermənistan-Azərbaycan müharibəsinin başa çatması ilə sıx əlaqədardır. Çünki Azərbaycan həmin kəmərin hazırda işğal altında olan ərazilərdən keçməsini istəyir. Ona görə də həmin torpaqlar mütləq azad edilməlidir.

Azərbaycan neft kəmərinin Ermənistandan keçməsi barədə xarici ölkələrin mətbuatında dərc olunan bəzi yazılardan bəhs edən Prezident Heydər Əliyev dedi ki, Ermənistan Azərbaycan torpaqlarını işğal etmiş, bir milyondan çox vətəndaşımız qaçqın düşmüşdür. Ona görə də biz bu kəmərin Ermənistandan keçməsinə heç cür razı ola bilmərik. Lakin əgər Ermənistan Respublikası öz qoşunlarını Şuşa və Laçın rayonları da daxil olmaqla, Azərbaycanın bütün ərazilərindən çıxarsa və ölkəmizin ərazi bütövlüyü, sərhədlərinin toxunulmazlığı, suverenliyi tam təmin olunsa, yalnız bu şərtlər daxilində neft kəmərinin Ermənistandan keçməsi məsələsi müzakirə edilə bilər.

Görüşdə neft müqaviləsinin həyata keçirilməsi ilə bağlı görülən tədbirlərdən də danışıldı və ümid edildiyi bildirildi ki, 1996-cı ildə ilk neftin istehsalına başlanacaqdır.

Tərəflərin fikrincə, Azərbaycanla İngiltərə arasında bağlanan 30 illik müqavilə ölkələrimizin uzunmüddətli əməkdaşlığına etibarlı zəmin yaradacaq və dövlətlərimizin dostluq münasibətlərinin inkişafına təkan verəcəkdir. Cənab Eqqarın fikrincə, onun Heydər Əliyevlə şəxsi dostluğu xalqlarımız və dövlətlərimiz üçün də nümunə olacaqdır.

Söhbət zamanı yaxın vaxtlarda Azərbaycanda açılacaq “Xəzərneftqaz-95” beynəlxalq sərgisindən də bəhs olundu. Cənab Eqqar həmin sərgidə iştirak etmək niyyətində olduğunu söylədi.