SİYASƏT
AZƏRTAC ilə İsveçrə Teleqraf Agentliyi arasında əməkdaşlığın qurulması imkanları müzakirə edilib
Bakı, 17 aprel, AZƏRTAC
Azərbaycanın İsveçrədəki səfiri Əkrəm Zeynallı İsveçrə Teleqraf Agentliyinin (SDA/ATS) baş redaktoru Bernard Maysen ilə görüşüb.
Səfirlikdən verilən məlumata görə, görüşün əsas məqsədi Azərbaycan Dövlət İnformasiya Agentliyi (AZƏRTAC) ilə İsveçrə Teleqraf Agentliyi (SDA/ATS) arasında əməkdaşlıq əlaqələrinin qurulması imkanlarının araşdırılması ilə bağlı müzakirələrin aparılması olub.
Söhbət zamanı Bernard Maysenə son illər Azərbaycanda keçirilən irimiqyaslı beynəlxalq tədbirlər və onların işıqlandırılması istiqamətində AZƏRTAC-ın gördüyü işlər barədə məlumat verilib. AZƏRTAC-ın artıq dünyanın 40 ölkəsinin informasiya agentliyi ilə ikitərəfli müqavilələr əsasında əməkdaşlıq etdiyi, nüfuzlu beynəlxalq təşkilatlarda təmsil olunduğu diqqətə çatdırılıb. Gələn il AZƏRTAC-ın Dünya Xəbər Agentliklərinin V Konqresinə, eyni zamanda, Asiya və Sakit Okean Ölkələri Xəbər Agentlikləri Təşkilatının (OANA) XVI Baş Assambleyasına ev sahibliyi edəcəyi vurğulanıb.
Görüşdə bu cür tərəfdaşlıq münasibətlərinin SDA/ATS agentliyi ilə də qurulmasının qarşılıqlı maraqlara xidmət edəcəyi diqqətə çatdırılıb.
B.Maysen SDA/ATS -nin İsveçrənin əsas milli xəbər agentliyi olduğunu qeyd edib.
SDA/ATS -nin baş redaktoru Azərbaycanın ev sahibliyi etdiyi beynəlxalq miqyaslı tədbirlərdən xəbərdar olduqlarını, AZƏRTAC-ın nümayəndələri ilə müxtəlif beynəlxalq konqres və toplantılarda görüşdüyünü, gələn il Bakıda keçiriləcək Dünya Xəbər Agentliklərinin V Konqresində iştirak edəcəyini vurğulayıb.
B.Maysen AZƏRTAC ilə xəbərlərin mübadiləsi, jurnalistlərin təkmilləşməsi və informasiyaların işlənilməsi sahəsində təcrübənin öyrənilməsi istiqamətində tərəfdaşlığa hazır olduqlarını qeyd edib. O, bu ilin oktyabr ayında İsveçrədə keçiriləcək parlament seçkiləri ərəfəsində AZƏRTAC-ın jurnalistlərinin SDA/ATS agentliyində bir həftəlik təcrübə keçməsinə şərait yarada biləcəklərini bildirib. Baş redaktor gələn həftə Avropa Xəbər Agentlikləri Alyansının (EANA) Sofiyada keçiriləcək konfransı zamanı AZƏRTAC-ın Baş direktoru ilə görüşüb əməkdaşlıq məsələlərini müzakirə edəcəyini diqqətə çatdırıb.
Söhbət zamanı AZƏRTAC-ın belə tərəfdaşlıq münasibətləri qurulmasına açıq olduğu diqqətə çatdırılıb.