İQTİSADİYYAT


Açıq hərracda 35 dövlət əmlakı özəlləşdirilib

A+ A

Bakı, 11 oktyabr, Elvira Məmmədova, AZƏRTAC 

Oktyabrın 11-də Əmlak Məsələləri Dövlət Komitəsi tərəfindən dövlət əmlaklarının özəlləşdirilməsi üzrə növbəti hərrac keçirilib.

AZƏRTAC xəbər verir ki, istənilən vətəndaşın, yerli və xarici investorların məhdudiyyətsiz iştirak etdiyi açıq hərracda səhmdar cəmiyyətləri, kiçik dövlət müəssisə və obyektlərin, eləcə də nəqliyyat vasitələrinin satışı təşkil olunub. Budəfəki hərrac zamanı, ümumilikdə, 35 dövlət əmlakı özəlləşdirilib. Bu hərracın nəticələrinə görə dövlət əmlakının özəlləşdirilməsindən dövlət büdcəsinə 1 milyon manatdan çox vəsait köçürüləcək.

Hərrac rəqabət şəraitində keçməsi ilə yadda qalıb. Belə ki, 5 kiçik dövlət müəssisə və obyektinin satışı üzrə bir əmlaka bir neçə sifariş verilməsi səbəbindən hərrac rəqabətli olub. Bu əmlaklar Bakının Nəsimi, Xətai rayonlarında və Sumqayıt şəhərində yerləşən istifadəsiz qeyri-yaşayış sahəsi və obyektlərdir. Belə ki, Sumqayıt şəhərində yerləşən emalatxana və Bakının Nəsimi rayonundakı 5 mərtəbəli binanın zirzəmisi (16,5 kvadratmetr) üçün 2 sifarişçi qeydə alınıb. Nəsimi rayonundakı eyni binanın 24,8 kvadratmetrlik zirzəmisi üçün 3 sifarişçi, 40,2 kvadratmetrlik digər zirzəmiyə isə 2 sifarişçi özəlləşdirmək üçün iddialı olub. Digər 2 sifarişçi isə Xətai rayonunda yerləşən 9 mərtəbəli binanın 37,8 kvadratmetrlik zirzəmisini hərrac vasitəsilə əldə etmək üçün elektron sifariş verib. Rəqabətli hərraclar bir daha onu göstərir ki, vətəndaşlar və potensial investorlar belə hərraclarda iştirak etməyə maraqlıdır.

Hərracda 2 səhmdar cəmiyyətinin nəzarət səhm paketinin 30 faizlik hissəsi, 20 kiçik dövlət müəssisə və obyekti və 13 nəqliyyat vasitəsi özəlləşdirilib. Satılmış səhmdar cəmiyyətləri istehsal sahəsinə aid olan “Saxsı qablar” ASC və “Beyləqan Dəmir Beton” ASC-dir. Belə müəssisələrin özəlləşdirilməsindən sonra qoyulacaq investisiya sayəsində onların fəaliyyətinin müasir tələblər əsasında bərpası mümkün olacaq.

Özəlləşdirilmiş kiçik obyektlər və qeyri-yaşayış sahələrinin 14-ü paytaxtda, 6-sı isə respublikanın digər şəhərlərində (Sumqayıt, Mingəçevir, Şəki və Gəncə) yerləşir. Kiçik dövlət əmlakları ticarət, ictimai iaşə, xidmət və digər sahələrə aid olub.

Xatırladaq ki, növbəti belə hərrac oktyabrın 25-də keçiriləcək və 84 dövlət əmlakı satışa çıxarılacaq.

Qeyd edək ki, komitə tərəfindən təşkil olunan hərraclara çıxarılan dövlət əmlakları çoxçeşidlidir. Bura nəhəng müəssisələrdən tutmuş kiçik obyektlərə və nəqliyyat vasitələrinədək müxtəlif əmlaklar daxildir. Üstəlik hər hərracda çoxlu sayda və ən əsası çox sərfəli qiymətlərlə əmlaklar özəlləşməyə çıxarılır. Sərfəli qiymətə təklif olunan bu dövlət əmlakları investorlar üçün münasib yatırım imkanları yaradır. Hərraclara olan maraq isə öz növbəsində hərracların rəqabətli keçməsini təmin edir. Digər mühüm amil isə hərracda iştirak prosedurunun və əmlak sahibi olmaq imkanının çox rahat olmasıdır. Bunlarla yanaşı, hərracda qalib olan şəxs aldığı əmlak üzərində mülkiyyət hüquqlarını təsdiq edən çıxarışı da əldə edə bilir. Rahatlığı və operativliyi təmin edən digər faktor yeni yaradılmış Özəlləşdirmə Portalıdır (privatization.az). Məhz qısa müddətdir ki, fəaliyyət göstərən Özəlləşdirmə Portalına indiyədək daxil olan istifadəçilərin sayının 140 mini ötməsi də hərraclara olan marağın əyani göstəricisidir.

Qeyd edək ki, özəlləşməyə çıxarılan hər bir dövlət əmlakının satış qiyməti, habelə mətn və fotoməlumatlar, eləcə də əmlakların yerləşmə mövqeyini göstərən xəritələr (google map) portalda əks olunur. Bütün bunlar investorlar və özəlləşdirmədə iştirak etmək niyyəti olan potensial iştirakçıların satılan əmlaklar barədə daha geniş məlumata malik olmasına imkan verir. Hərracda iştirak üçün komitənin elektron xidməti (www.e-emdk.gov.az) üzərindən sifariş vermək və əmlakın hərracdakı satış qiymətinin 10 faizi məbləğində behi bank vasitəsilə ödəmək kifayət edir. Bundan sonra iştirakçı statusu qazanan vətəndaş hərracda qalib olaraq əmlak sahibi ola bilir.

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.