Bakı, 27 aprel, AZƏRTAC

Azərbaycan Milli Elmlər Akademiyasının (AMEA) Ədəbiyyat İnstitutunda “Ədəbi proses–2014” yaradıcılıq müşavirəsi keçirilib.

AMEA-dan AZƏRTAC-a bildiriblər ki, tədbirdə institutun direktoru, AMEA-nın vitse-prezidenti, akademik İsa Həbibbəyli rəhbərlik etdiyi qurumda 1976-cı ildən 1984-cü ilədək ardıcıl olaraq ilin ədəbi proseslərinə həsr olunan yaradıcılıq müşavirələrinin keçirildiyini söyləyib.

İ.Həbibbəyli qeyd edib ki, “Ədəbi proses-2013” yaradıcılıq müşavirəsi Azərbaycan ədəbiyyatşünaslıq elmində son illərin ən mühüm hadisələrindən biri idi. Belə ki, əsası Ədəbiyyat İnstitutunda qoyulan “Ədəbi proses” formatında yaradıcılıq müşavirəsi sonuncu dəfə 1984-cü ildə keçirilib və tədbirin materialları bir il sonra nəşr olunub. “Ədəbi proses–2013”ün Azərbaycan ədəbiyyatının müstəqillik dövrünə həsr olunan ilk yaradıcılıq müşavirəsi kimi də mühüm əhəmiyyət daşıdığını diqqətə çatdıran akademik bu müşavirənin aparıcı elmi-ideoloji istiqamətini azərbaycançılıq, millilik və bəşərilik təşkil etdiyini bildirib.

Akademik İ.Həbibbəyli “Ədəbi proses-2013”ün ölkə mətbuatında böyük əks-sədaya səbəb olduğunu vurğulayıb. Alimin sözlərinə görə, bu müşavirənin digərlərindən əsas fərqi məruzəçilərin əksəriyyətinin gənclərdən ibarət olmasıdır. İnstitutun direktoru ötənilki təqdimatın da yüksək səviyyədə keçirildiyini söyləyib.

AMEA-nın vitse-prezidenti ədəbi proses müşavirəsinin məruzələrindən ibarət kitabın nəşri barədə də məlumat verib. Bildirilib ki, cari il 14 məruzəçi ədəbi prosesin bütün sahələrini əhatə edən müxtəlif mövzularda çıxış edəcəklər. Alim institutun nəzdində ədəbi tənqid şöbəsinin yaradılmasını yüksək qiymətləndirib, bundan sonra ədəbiyyatşünaslığın daha da inkişaf edəcəyinə, ədəbi proseslərin sürətlənəcəyinə əminliyini ifadə edib.

İ.Həbibbəyli institut tərəfindən Azərbaycan ədəbiyyatının dövrləşməsi konsepsiyasının hazırlanacağını, konsepsiyada bütün mərhələlərin əhatə olunacağını diqqətə çatdırıb.

Azərbaycan Yazıçılar Birliyinin (AYB) katibi Rəşad Məcid ədəbiyyat institutunun son illər dinamik inkişaf etdiyini vurğulayıb, akademik İsa Həbibbəylinin gənc alimlərə göstərdiyi diqqət və qayğını yüksək qiymətləndirib. R.Məcid AYB-də İsa Həbibbəylinin gənc ədiblərlə görüşünün təşkil olunacağını, bu görüşün gənclərə ədəbiyyatşünaslıq sahəsində görülən işlərlə tanışlıq imkanı verəcəyini bildirib.

Sonra AYB-nin katibi İlqar Fəhmi çıxış edərək son illər Azərbaycan ədəbiyyatında xeyli irəliləyişlərin müşahidə olunduğunu, bu inkişafın təmini istiqamətində Ədəbiyyat İnstitutunda mühüm işlər gördüyünü vurğulayıb.

AYB-in tənqid və publisistika bölməsinin rəhbəri Bəsti Əlibəyli Azərbaycan ədəbiyyatının dövrləşmə konsepsiyasının hazırlanmasının əhəmiyyətindən söz açıb. Son illər ölkə ədəbiyyatında gedən prosesləri yüksək qiymətləndirən B.Əlibəyli tənqidin nəzəri bazasının formalaşdığını söyləyib.

Tədbirdə, həmçinin 2014-cü ilin şeiri, poemalar, dramaturgiya, tənqid, ədəbiyyatşünaslıq, ilin romanları, povestlər, hekayələr, uşaq ədəbiyyatı, cənubda ədəbi proses və s. mövzularda məruzələr dinlənilib, çıxışlar ətrafında fikir mübadiləsi aparılıb.