İQTİSADİYYAT
“Aegean Airlines” aviaşirkəti Afina-Bakı-Afina aviareysi üzrə birbaşa uçuşlar təşkil edəcəkdir
Bakı, 6 aprel (AZƏRTAC). Böyük potensiala malik olan gənc yunan turoperatoru - “Nomos Travel” şirkəti Azərbaycanda keçirilən “AITF” sərgisində ilk dəfədir ki, iştirak edir. Bizim məqsədimiz sərgidə Yunanıstanı özümüz gördüyümüz kimi, yəni tarix və mədəniyyət, günəş və dənizlər ölkəsi kimi təqdim etməkdir.
Yunanıstanın “Nomos Travel” şirkətinin icraçı direktoru Yuliya Çerezova AZƏRTAC-a bildirmişdir ki, sərgidə ziyarətçilərin ölkəmizin mədəniyyətinə olan marağını görürəm. İnsanları yalnız otel, çimərlik və əyləncə mərkəzləri deyil, həm də muzeylər, tarixi memarlıq abidələri və şəkil qalereyaları da maraqlandırır. Əlbəttə, bu, çox xoşdur. Mən əminliklə deyə bilərəm ki, Azərbaycanın turizm biznesində bizə konkret məsələlər və işgüzar təkliflərlə yaxınlaşan əsl peşəkarlar çalışırlar. Artıq sərginin ilk günündə biz yerli turoperatorlarla əməkdaşlıq sahəsində bir neçə müqavilə imzalamışıq. “Nomos Travel” şirkətinin Afinada yerləşən baş ofisi ilə yanaşı, Rodos, Kit və Korf şəhərlərində də filialları mövcuddur. Bundan başqa, “Aegean Airlines” aviaşirkəti tərəfindən mayın 28-də həftədə iki dəfə Afina-Bakı-Afina aviareysi üzrə birbaşa uçuşlar təşkil ediləcəkdir.
Azərbaycanlı turistlərin nəzərinə çatdırıram ki, qarşıdan gələn mövsüm üçün uçuş, transfer, otellərdə yerləşdirilmə və qidalanma xərcləri də daxil olmaqla, orta qiyməti həftəlik 500 avro təşkil edən turizm paketlərimiz artıq hazırdır. Bundan başqa, Azərbaycan vətəndaşları üçün vizaların tez bir zamanda verilməsi ilə bağlı kömək göstərilməsi barədə Yunanıstanın Azərbaycandakı səfirliyinin konsulluq şöbəsi ilə də razılaşmamız vardır.
Biz ilk dəfə mart ayının əvvəllərində Azərbaycan-Yunanıstan işgüzar forumu çərçivəsində Bakı şəhərində olduq və həmin vaxtdan bəri mən yenidən Azərbaycana qayıtmaq istəyirdim. Onu da deyə bilərəm ki, biz səbirsizliklə bu sərgini gözləyirdik və sərgi bizim bütün ümidlərimizi doğrultdu.