MƏDƏNİYYƏT
Əfşan Əsədova: Ən yorğun günlərimdə rənglərlə istirahət edirəm
Bakı, 16 fevral, Ceyhun Alışlı, AZƏRTAC
Bəşəriyyətin mənəvi mədəniyyətinin tərkib hissəsi sayılan rəssamlıq sənəti, həm də real və mücərrəd həyatın əksidir. Hər zaman həyat hadisələrini fırçasının dili ilə canlandıran, adını dünya tarixinə yazdırmağa müvəffəq olan ustad sənətkarlarımız olub. Bu ənənə cəmiyyətimizdə bütün zamanlarda istedadlı gənc nəsillər tərəfindən davam etdirilib. Bu gün də yaratdığı sənət əsərləri ilə neçə-neçə istedadlı gənc nəsil yetişməkdədir. Belə istedadlı gənc rəssamlardan biri, Prezident təqaüdçüsü Əfşan Əsədovadır. AZƏRTAC gənc rəssamla müsahibəni təqdim edir.
-Hər bir istedadın arzuları onun aid olmaq istədiyi sənətin başlanğıc yoludur. Sizi incəsənətə gətirən həvəs, arzulardır yoxsa istedad?
-Mən rəssam ailəsində böyümüşəm. Bəlkə də valideynlərim incəsənət adamı olduğu üçün uşaqlıqdan məndə bu sahəyə həvəs yaranıb. Fırça ilə böyümüşəm, mütəmadi olaraq rənglərlə təmasda olmuşam. Zaman keçdikcə müəyyən yaşa gəldim və bu sənətə içimdə bir həvəs olduğunu anladım. Əlbəttə ki, valideynlərimin dəstəyini daim üzərimdə hiss etmişəm. Hələ uşaqlıqdan incəsənət sahəsinə töhfə verəcəyimi qarşıya məqsəd qoymuşdum. Azərbaycan Dövlət Rəssamlıq Akademiyasında batika janrını öyrəndikdən sonra magistraturada incəsənət tarixi və nəzəriyyəsi üzrə ixtisaslaşdım. Düşünürəm ki, məni bu sahəyə arzularımdan daha çox boya-başa çatdığım ailə mühiti gətirdi.
-Hansı rəssamları özünüz üçün mayak hesab edirsiniz?
-Bəli, hər bir incəsənət adamının bəhrələndiyi və özü üçün ilham qaynağı hesab etdiyi sənətkarlar olmalıdır. Dünya şöhrətli estoniyalı rəssam Malle Leisi özüm üçün kumir hesab etmişəm. Onun sənət əsərlərindəki əhvali-ruhiyyəni çox sevirəm. O da güllərlə olan kompozisiyaları ilə məşhurdur. Daha sonra məşhur rusiyalı rəssam Nikolay Bloxinin sənət əsərlərindən ilhamlanmışam. Eyni zamanda, bizim xalqımızın ən dəyərli incəsənət simalarından sayılan Ağəli İbrahimov, Rasim Babayev kimi sənətkarlardan öyrənməyə çalışmışam və indinin özündə də onların əsərlərindən faydalanmağa səy göstərirəm.
-Fırçanız daha çox hansı rənglərə meyillidir?
-Bütün rənglərə. Ümumiyyətlə, rənglərlə işləmək mənə özünəməxsus stimul verir. Fırça ilə rənglərin təması rəssamın ruhunun sakitliyi, həyatının yeni mərhələsidir, məncə. Bu baxımdan ən yorğun günlərimdə belə rənglərlə istirahət edirəm.
-Bir insanın sənətdə qazandığı uğurları ona hər zaman stimul verir. Gənc rəssamın Prezident təqaüdçüsü olmağı onun üzərinə nə kimi vəzifələr qoyur?
-Bu il Prezident təqaüdçüsü olmağım məni olduqca ruhlandırdı. Bildiyiniz kimi, ölkəmizdə təşkil olunan bir neçə rəsm sərgisində əsərlərimlə təmsil olunmuşam. Hər zaman istər məna, istərsə də məzmun baxımdan mükəmməl bir sənət əsəri ərsəyə gətirməyə çalışıram. Eyni zamanda, əsərlərin işləmə texnikasına olduqca məsuliyyətli yanaşıram. Sanballı əsər ərsəyə gətirmək gərgin əmək tələb edir. Bu gün digər sahələr kimi mədəniyyət və incəsənət sahəsi də ölkə başçısının diqqət və qayğısı ilə əhatələnib. Bütün bu işlərin davamı kimi əməyimin diqqətdən kənarda qalmaması mənim üçün ayrıca sevindirici haldır. Aldığım təqaüdə layiq olmağa çalışıram.
- İndiyədək əsərlərinizdən satdığınız olubmu və ya özünüz bunun üçün harasa müraciət etmisinizmi?
- Açığını deyim, müraciət etməmişəm. Daha çox mənə müraciət olunub. Amma əsərlərimi satmaq haqqında hələ ki, düşünməmişəm. Ötən il Azərbaycan Rəssamlar İttifaqında Mədəniyyət və Turizm Nazirliyinin təşkilatçılığı ilə “Yasəmən” adlı fərdi rəsm sərgim təşkil olundu. Sərgidə iştirak edən qonaqlara bir neçə əsərimi hədiyyə etdim. Deyim ki, kimsə çox bəyənəndə hədiyyə etdiyim olur.
-Yaradıcılığınızda daha çox batika, qrafika və moda janrına üstünlük verirsiniz. Bir əsəri ərsəyə gətirmək üçün sizə nə qədər zaman kifayət edir?
- Bir işin üzərində özüm razı qalana qədər işləyirəm. Bu müddət iki gün də ola bilər, beş ay da. Hansısa işi yarımçıq qoyub bir il sonra da tamamlaya bilərəm. Ona görə də müddəti dəqiq demək olmur.
-Bir az da gələcək planlarınızdan danışaq.
- Bildiyiniz kimi, modelyer rəssam kimi də fəaliyyət göstərirəm. Əsasən səhnə üçün nəzərdə tutulmuş geyimlər hazırlayıram. Tezliklə sırf bu geyimlərdən ibarət sərgi təşkil etməyi planlaşdırıram. Bundan əlavə, yeni yaradıcılıq axtarışlarım davam edir. Böyük və nəticə etibarı ilə uğurlu məqsədlər naminə çalışmaq, zəhmətimin bəhrəsini görmək istəyindəyəm.
-Səhnə geyimləri ilə bağlı müraciət edənlər varmı?
-İndiyədək bir çox ziyafət geyimləri hazırlamışam. Səhnə üçün nəzərdə tutduğum geyimlərin isə hələ heç bir yerdə təqdimatını keçirməmişəm. Qeyd etdiyim kimi, hazırda geyimlərdən ibarət sərgi üzərində işləyirəm. Bu geyimlər ilk dəfə sərgidə nümayiş olunacaq. Daha sonra bir neçə müğənni ilə işləməyi düşünürəm.
-Maraqlı müsahibəyə görə sağ olun.