ELM VƏ TƏHSİL
Ağcabədi, Ağdam, Zərdab, Bərdə və Tərtər rayonlarında IX sinif şagirdləri üçün buraxılış imtahanları uğurla başa çatıb VİDEO
Ağcabədi, 11 iyun, Tahir Ağaməmmədov, AZƏRTAC
Tələbə Qəbulu üzrə Dövlət Komissiyası (TQDK) iyunun 11-də qurumun Ağcabədi regional bölməsinin əhatə etdiyi Ağcabədi, Ağdam, Zərdab, Bərdə və Tərtər rayonlarında yerləşən orta ümumtəhsil müəssisələrində təhsil alan IX sinif şagirdləri üçün mərkəzləşdirilmiş qaydada buraxılış imtahanları keçirib.
TQDK-nın Ağcabədi regional bölməsinin müdiri kimya üzrə fəlsəfə doktoru Samir Əliyev AZƏRTAC-ın müxbiri ilə söhbətində bildirib ki, imtahanların keçirilməsi üçün qeyd olunan rayonlarda ümumilikdə 16 imtahan mərkəzi ayrılıb. İmtahanlarda 6220 şagirdin iştirakı nəzərdə tutulub. İmtahanların idarə olunması 45 imtahan rəhbəri və 520 nəzarətçi-müəllimə həvalə edilib. Təhlükəsizliyin təminatı məqsədilə imtahan keçirilən binalara polis və Fövqəladə Hallar Nazirliyinin Dövlət Yanğından Mühafizə Xidmətinin əməkdaşları, tibb işçiləri cəlb olunub.
Ağcabədi şəhərində IX sinif şagirdləri üçün buraxılış imtahanları 4 mərkəzdə keçirilib. 3 nömrəli məktəb-liseydə, 8, 11 nömrəli tam orta məktəblərdə, həmçinin laçınlı məcburi köçkünlərin məskunlaşdığı Taxtakörpü qəsəbə tam orta məktəbində təşkil olunan buraxılış imtahanlarında 1727 şagird iştirak edib. İmtahanlar 3 nömrəli məktəb-liseydə Azərbaycan və rus, digər məktəblərdə isə Azərbaycan bölmələri üzrə keçirilib. Buraxılış imtahanları 14 imtahan rəhbəri və 154 nəzarətçi-müəllim tərəfindən idarə olunub.
AZƏRTAC-ın müxbiri Ağcabədi şəhərindəki 3 nömrəli orta məktəbdə IX sinif şagirdləri üçün keçirilən buraxılış imtahanını izləyib. Bu məktəbdə imtahanın idarə olunmasına 4 imtahan rəhbəri və 52 nəzarətçi-müəllim cəlb edilib. İmtahan rəhbəri Mirheydər Abbasov bildirib ki, Azərbaycan bölməsinin şagirdləri üçün imtahan ana dili və riyaziyyat, rus bölməsinin şagirdləri üçün rus dili və riyaziyyat fənləri üzrə keçirilib. Şagirdlərə hər bir fənn üzrə 30, ümumilikdə, 60 test tapşırığı təqdim edilib. Bundan əlavə, şagirdlər sərbəst mövzu üzrə yazı işi də yerinə yetiriblər. İmtahanın gedişində heç bir qanun pozuntusu qeydə alınmayıb.
Qeyd edək ki, IX siniflər üçün keçirilən buraxılış imtahanlarında Ağcabədidə 1727, Ağdamda 951, Zərdabda 587, Bərdədə 2103, Tərtərdə isə 852 şagird iştirak edib. Buraxılış imtahanı təlimata uyğun olaraq saat 10:00-da başlayıb və hər hansı qanun pozuntusuna yol verilmədən 12:00-da başa çatıb.
Günün ikinci yarısında isə XI siniflərdə təhsil alan şagirdlər üçün buraxılış imtahanları keçiriləcək.