REGİONLAR
Ağdam rayonunun işğal olunmayan ərazilərinin inkişafı istiqamətində böyük işlər görülüb VİDEO
“Ölkəmizi tanıyaq” devizi ilə təşkil olunmuş maarifləndirici tur-aksiyaların ikinci mərhələsi çərçivəsində Qarabağ bölgəsinə səfər edən Nərimanov və Qaradağ rayonlarının məktəbliləri noyabrın 10-da Ağdam rayonunda oldular.
AZƏRTAC xəbər verir ki, rayonun girişində səmimiyyətlə qarşılanan məktəblilərə Ağdam rayonu haqqında məlumat verilib. Bildirilib ki, Ermənistanın Qarabağın dağlıq hissəsini işğal etmək məqsədilə 1988-ci ilin fevralından başladığı müharibənin əsas çətinlikləri Ağdam rayonu əhalisinin üzərinə düşüb. Ağdam düşmənə qarşı savaşda minlərlə şəhid verib, torpaqlarımızın müdafiəsi uğrunda fədakarlıq göstərmiş ağdamlılardan 16 nəfəri Azərbaycanın Milli Qəhrəmanı adına layiq görülüb.
1993-cü il iyulun 23-də Ağdam şəhəri erməni təcavüzkarları tərəfindən işğal olunub. Erməni silahlı quldur dəstələri rayonun 1154 kvadratkilometrlik ərazisinin 77,4 faizini – bir şəhər, 1 qəsəbə, 82 kəndini vəhşicəsinə talan edib, dağıdıb və yandırıblar. Rayon ərazisindəki mədəniyyət və memarlıq abidələri də erməni vandalizminin qurbanına çevrilib. Lakin buna baxmayaraq ağdamlılar doğma torpaqlara qayıdacaqları günü səbirsizliklə gözləyirlər.
Ağdam rayonunun işğal olunmayan ərazilərinin inkişafı istiqamətində son illərdə böyük işlər görülüb. Sosial obyektlər, məktəblər, Olimpiya kompleksi, rayon xəstəxanası, doğum evi, uşaq xəstəxanası tikilib, məcburi köçkünlər üçün 18 yeni qəsəbə salınıb, yollar yenidən qurulub, infrastruktur layihələri həyata keçirilib.
Məktəblilər Şəhidlər abidə kompleksini ziyarət etdikdən sonra Quzanlı qəsəbəsindəki Ağdam Dram Teatrına gəliblər. Burada onlar rayonda fəaliyyət göstərən “Şur” ansamblının konserinə baxıblar. Məlumat verildi ki, “Şur” ansamblı nəinki Ağdam rayonunda, eləcə də respublikamızın digər bölgələrində, həmçinin keçmiş SSRİ məkanında konsert proqramları ilə çıxış edib. Ağdam şəhərinin Ermənistan silahlı qüvvələri tərəfindən işğalından sonra 20 ilə yaxın bir müddətdə fəaliyyətsiz qalan “Şur” ansamblı bir neçə ildir fəaliyyətini bərpa edib.
Şagirdlərə Ağdamın işğaldən əvvəlki və sonrakı görüntüləri əks olunmuş disk təqdim olunub.
Daha sonra şagirdlər məcburi köçkünlər üçün salınmış Baharlı qəsəbəsində fəaliyyət göstərən Qiyaslı kənd uşaq musiqi məktəbinə gəliblər. Məktəbin xor kollektivinin ifası məktəblilərə xoş ovqat bəxş edib. Qonaqlar burada ağdamlı məktəblilərlə birgə xatirə şəkli çəkdirdilər.
Məktəblilər Çəmənli kəndində Seyid Lazım Ağa ziyarətgahı ilə tanışlıqdan sonra Ağcabədi rayonuna yola düşüblər.