REGİONLAR


Ağdamda xalça müəssisəsinin yaradılması Qarabağ xalçaçılıq məktəbinə böyük töhfədir VİDEO

Ağdam, 6 iyun, Tahir Ağaməmmədov, AZƏRTAC

Qarabağ xalçaları rəngarəngliyinə və müxtəlif naxış elementlərinə görə xalqımızın xalçaçılıq mədəniyyətində özünəməxsus yer tutur. Qədimliyi ilə seçilən bu xalçalar Azərbaycan dekorativ tətbiqi sənətinin nadir incilərindəndir.

Prezident İlham Əliyevin 2016-cı ilin 5 may tarixli Sərəncamına əsasən “Azərxalça” Açıq Səhmdar Cəmiyyətinin yaradılması ilə Azərbaycan xalça sənətinin, o cümlədən Qarabağ xalçaçılıq məktəbinin inkişafında yeni mərhələ başlayıb. Təsadüfi deyil ki, “Azərxalça” ASC-nin ilk filialı Qarabağda - Füzuli rayonunun Horadiz şəhərində yaradılıb. Prezident İlham Əliyevin iştirakı ilə 2016-cı ilin noyabrında istifadəyə verilən filialda Qarabağın tarixi xalça çeşniləri əsasında xovlu xalçalar toxunur.

“Azərxalça” ASC-nin filiallarından biri də xalçaçılığın zəngin ənənələrinin qorunub saxlanmasında və inkişaf etdirilməsində mühüm rol oynayan Ağdam rayonunda yaradılmaqdadır. Filial üçün rayonun Quzanlı qəsəbəsində 125,8 kvadratmetr ərazidə inşa edilən binada tikinti işləri yekunlaşmaq üzrədir. Burada toxuculuq zalı, rəssam, tibb və inzibati otaqlar, yeməkxana, anbar və sair yaradılacaq. İnşaat işlərinin sentyabr ayında başa çatdırılması nəzərdə tutulur.

Filialda işləmək üçün Quzanlı qəsəbəsində “Azərxalça” ASC tərəfindən xalça toxucuları üçün tədris-hazırlıq kursları təşkil edilib. Kurslar lazımi avadanlıqlar, dəzgahlar, xam mal, eyni zamanda, xalçaçılıq sənətinə dair müvafiq ədəbiyyatlar və dərsliklərlə təchiz olunub.

Ömrünün qırx ilini xalçaçılığa həsr etmiş Ceyran Əliyeva bu qədim el sənətinin incəliklərini ilmələrin dili ilə gənc xalçaçılara öyrədir. Prezident İlham Əliyevin 2017-ci il 1 may tarixli Sərəncamı ilə Azərbaycanda xalçaçılıq sənətinin inkişafında səmərəli fəaliyyətinə görə “Əməkdar mədəniyyət işçisi” fəxri adına layiq görülən Ceyran xanım bunu Qarabağ xalçaçılıq sənətinə göstərilən ehtiramın təzahürü kimi dəyərləndirir.

Ceyran Əliyeva AZƏRTAC-a müsahibəsində bildirib ki, Ermənistanın ölkəmizə qarşı hərbi təcavüzü, Qarabağın dağlıq hissəsinin və ətraf ərazilərin işğal edilməsi bütün sahələr kimi, xalçaçılığa da ağır zərbə vurub: “1993-cü ildə Ağdamın işğalından sonra Ağdam Xalçaçılıq İstehsalat Birliyi və müəssisənin Qarabağda olan bütün filialları fəaliyyətini dayandırıb. İyirmi ildən çox köçkünlük həyatı yaşayan Ağdam Xalçaçılıq İstehsalat Vahidliyi isə bu müddət ərzində fəaliyyətini çətinliklə də olsa Bərdə şəhərində davam etdirib. Məcburi köçkünlər üçün Ağdam rayonunun işğal altında olmayan ərazilərində yeni qəsəbələrin salınması, əhalinin böyük bir hissəsinin, o cümlədən Bərdədə məskunlaşan xalçaçıların bu qəsəbələrə köçməsi Ağdamda xalçaçılıq müəssisəsinin yaradılması zərurətini doğururdu. Bu gün “Azərxalça” ASC tərəfindən Ağdamda filialın yaradılması Azərbaycan xalça sənətinə, o cümlədən Qarabağ xalçaçılıq məktəbinə böyük töhfədir”.

C.Əliyeva deyib ki, “Azərxalça” ASC-nin təşkil etdiyi tədris-hazırlıq kurslarına məcburi köçkün qəsəbələrindən və müxtəlif kəndlərdən 130 qadın cəlb edilib. Artıq onlardan yüz nəfərdən çoxu xalçaçılıq peşəsinə tam yiyələnib. Kurslarda tədris alan toxucular Cəmiyyətin filialında daimi işlə təmin olunacaqlar. Onlar burada həm Qarabağ xalçaçılıq məktəbinin ənənələrini davam etdirəcək, həm də yaxşı əməkhaqqı almaqla ailələrinin sosial rifahını yaxşılaşdıracaqlar.

“Görülən bu tədbirlər onu deməyə əsas verir ki, artıq Qarabağ xalçaçılıq məktəbi öz yeni inkişaf mərhələsinin astanasındadır. Biz xalçaçılar da el sənəti olan bu sahənin inkişafına göstərilən diqqət və qayğıdan ruhlanaraq Qarabağ xalçalarının yenidən şan-şöhrətə çatması üçün əlimizdən gələni əsirgəməyəcəyik”, – deyə Ceyran Əliyeva bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.