REGİONLAR


Ağdaş: heyva bağlarından 2500 tona yaxın məhsulun yığılması gözlənilir

A+ A

Ağdaş, 3 oktyabr, Şahnəzər Bəşirov, AZƏRTAC

Ağdaş rayonunda heyvaçılığın inkişafı və məhsul istehsalının ildən-ilə artırılması daim diqqət mərkəzindədir. Əvvəllər heyvaçılıq rayonu kimi tanınan Ağdaşın bu meyvə ilə bağlı şöhrətinin geri qaytarılması üçün mühüm işlər görülür.

AZƏRTAC xəbər verir ki, kəndli fermerlər və fərdi təsərrüfat sahibləri heyva bağlarını ildən-ilə genişləndirməklə və ağaclara düzgün aqrotexniki qulluq göstərməklə daha çox məhsul istehsal etməyə nail olurlar. Rayonda mövcud olan 1608 hektar bar verən meyvə bağının 340 hektarını heyva bağı təşkil edir. Bağbanlar ötən il 10, bu il isə 14 hektar sahədə yeni heyva bağı salıblar.

Heyvaçılıq rayonun Orta Ləki, Aşağı Cardam, Güvəkənd, Yenikənd kəndlərində əhalinin əsas gəlir mənbəyi hesab edilir. Kəndlilər heyvanın 15 sortunu (“Bəhram”, “Cardam”, “Kamil”, “Əppək”, “Armudu”, “İyli”, “Almalı”, “Bardaq” və s.) yetişdirirlər. Bu il rayonda havanın əlverişli olması və ağaclara lazımi aqrotexniki qulluq edilməsi nəticəsində bol və saf məhsul əldə olunub.

Kəndlilər bu günlərdə məhsul tədarükünə başlayıblar. Ötən il bağlardan 2300 ton heyva yığılıb ki, bu da əvvəlki ildəkindən 2,5 ton çoxdur. Bu il isə bağlardan 2500 tona yaxın məhsulun yığılması gözlənilir. Bağbanlar hər hektardan orta hesabla 60-70 ton məhsul toplayacaqlarına ümid edirlər. Kəndlilər məhsulu öz həyətlərində müştərilərə satırlar.

Ağdaş heyvası yerli bazarlarda satılmaqla yanaşı, xarici bazarlara da çıxarılır.

Qeyd edək ki, heyva ağacının yarpağından, çiçəyindən, meyvəsindən və çəyirdəyindən 10-a yaxın xəstəliyin müalicəsində istifadə olunur.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.