DÜNYA


“Ağıllı” çamadan icad edilib

A+ A

Bakı, 12 iyul, AZƏRTAC 

Son dövrlərdə müxtəlif ölkələrin şirkətləri sahibinin arxasınca gedən, onun elektron qurğularını enerji ilə dolduran və ümumilikdə səyahəti asanlaşdıran yüksək texnologiyalı çamadanlar təqdim edirlər. Bu dəfə belə “smart” çamadanların siyahısına İranın "Ikap Robotics” şirkəti tərəfindən hazırlanan "Olive” də əlavə olunub.

AZƏRTAC “ictnews.az” saytına istinadla xəbər verir ki, “Olive” xarici görünüşünə görə adi çamadanlardan az fərqlənsə də, çoxlu faydalı funksiyalara malikdir. Belə ki, “Wi-Fi” və ya “Bluetooth” vasitəsilə istifadəçinin smartfonu ilə sinxronlaşan çamadan aviareysi xatırlada və təyyarəyə tələsməyə çağıra bilir. Xüsusi mobil əlavə çamadanın olduğu yeri izləməyə şərait yaradır, quraşdırılan 1000 milliamper-saat tutumlu akkumulyator isə smartfon və ya planşeti enerji ilə doldurmağa imkan verir.

“Olive” çamadanı quraşdırılmış akselerometr, giroskop və elektromotor sayəsində iki təkər üzərində sahibinin arxasınca müstəqil hərəkət edərək insanın hərəkətini xüsusi kamera vasitəsilə izləyir. O, həmçinin smartfon və ya “ağıllı” saatların köməyi ilə açılan və bağlanan elektron qıfılla, eləcə də çamadanın dəqiq çəkisini öyrənməyə imkan verən quraşdırılmış tərəzi ilə təchiz edilib.

“Olive” iyunda Münhendə keçirilən startaplar müsabiqəsində robotlaşdırılmış qurğular kateqoriyasında birinci yeri tutub. Hazırda çamadan yaradıcıları qurğunun tamamlanması və seriyalı istehsalına başlamaq üçün sərmayədar və tərəfdaşlar axtarır.

 

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.