REGİONLAR
Ağsuda cari ilin altı ayının sosial-iqtisadi inkişafının yekunları müzakirə olunub
Ağsu, 25 iyul, AZƏRTAC
Ağsu rayonunda cari ilin altı ayında sosial-iqtisadi inkişafın yekunları və qarşıda duran vəzifələr geniş müzakirə olunub.
AZƏRTAC xəbər verir ki, məsələ ilə əlaqədar rayon icra hakimiyyətinin başçısı Ənvər Seyidəliyevin məruzəsində, eləcə də çıxışlarda əvvəlcə iqtisadiyyatın aparıcı sahəsi olan kənd təsərrüfatındakı vəziyyət geniş təhlil edilib. Qeyd olunub ki, aqrar sektorda aparılan islahatlar, ixracyönümlü məhsulların, o cümlədən baramaçılığın və pambıqçılığın inkişafına göstərilən dövlət qayğısı rayonda bu sahələrin inkişafına güclü təkan verib. Cari mövsümdə 2660 qram ipəkqurdu toxumundan 5491 kiloqram məhsul istehsal olunaraq “Şəki-İpək” ASC-yə təhvil verilib.
Hazırda rayonda 2500 hektarda pambıq yetişdirilir. İndi plantasiyalarda üçüncü kompleks becərmə tədbirləri aparılır. Artıq bitkilər qozalama fazasındadır.
Vurğulanıb ki, bu il 33 min 925 hektar sahədə taxıl yetişdirilib, 72 min 179 ton məhsul istehsal olunub. Hər hektara görə məhsuldarlıq buğda zəmilərində 24 sentner, arpa zəmilərində isə 21,9 sentner olub.
Məruzə və çıxışlarda tikinti-quraşdırma işləri sahəsində görülən işlərdən bəhs edilərək bildirilib ki, hesabat dövründə “Az-Qranata” MMC üçün yeni şərab süzmə sexi və soyuducu anbarın, şəhərin kanalizasiya sisteminin təmizləmə qurğusunun, “Süsən Aqro” MMC üçün Gəgəli qışlağı adlanan ərazidə kənd təsərrüfatı məhsulları istehsalı kompleksinin tikintisi, Qarabağ əlilləri üçün hər biri üç otaqdan ibarət 13 evin inşası davam etdirilib. Çaparlı-Kəndoba-Cəlayir avtomobil yolunda yenidənqurma işləri başa çatmaq üzrədir.
Hesabat yığıncağında əhalinin elektrik enerjisi, təbii qaz və içməli su ilə normal təchizatı ilə bağlı görülən işlər, təhsil, səhiyyə, mədəniyyət sahələrinin maddi-texniki bazasının möhkəmləndirilməsi istiqamətində həyata keçirilən tədbirlər, habelə qarşıda duran vəzifələr geniş müzakirə olunub.