Ağdam, 25 fevral, Tahir Ağaməmmədov, AZƏRTAC

Vətəndaşların sağlamlığının qorunması, göstərilən tibb xidmətinin səviyyəsinin və keyfiyyətinin yüksəldilməsi ölkəmizdə həyata keçirilən sosial siyasətin prioritet istiqamətlərindəndir. Prezident İlham Əliyevin əhalinin sağlamlığına diqqətinin göstəricisidir ki, son illər ölkəmizdə səhiyyənin maddi-texniki bazasının möhkəmləndirilməsi istiqamətində kompleks tədbirlər həyata keçirilir, şəhərlərdə, rayon mərkəzlərində, qəsəbə və kəndlərdə müasir tibbi avadanlıqlarla təchiz olunmuş yeni xəstəxanalar, tibb məntəqələri tikilərək istifadəyə verilir, səhiyyə xidmətinin yaxşılaşdırılması üçün ardıcıl, təxirəsalınmaz tədbirlər görülür. Bu baxımdan Prezident İlham Əliyevin tapşırığına əsasən, 2014-cü ildən başlayaraq ölkə vətəndaşlarının kütləvi pulsuz tibbi müayinəyə cəlb edilməsini xüsusi qeyd etmək lazımdır. Dövlətimizin başçısının ölkə vətəndaşlarının pulsuz tibbi müayinədən keçirilməsi ilə bağlı verdiyi tapşırığın uğurla reallaşdırılması vətəndaşların sağlamlığına göstərilən qayğının təzahürüdür.

Müayinələr respublikamızın hər yerində olduğu kimi, Qarabağ bölgəsində də uğurla aparılır. Əhalinin sağlamlığının qorunmasına yönələn bu tədbirin yüksək mütəşəkkilliklə keçirilməsini təmin etmək üçün rayonlarda xüsusi komissiyalar yaradılır, tibb ocaqlarında iş qrafiki tərtib edilir. Sakinlər rayon mərkəzi xəstəxanalarında, poliklinikalarda, müalicə-diaqnostika mərkəzlərində, həmçinin iri kənd və qəsəbələrdəki səhiyyə ocaqlarında müayinə olunurlar. Yüksəkixtisaslı həkimlərdən ibarət briqadalar yerlərdə əhalinin müayinəsini həyata keçirirlər.

Tibbi müayinələrin keçirilməsi xəstəliklərin erkən aşkar olunması və vaxtında müalicəsinə, beləliklə də, əhalinin sağlamlığının, xalqımızın genefondunun qorunmasına xidmət edir. Ötən il keçirilən müayinələr zamanı təkcə Ağdam, Ağcabədi, Bərdə, Tərtər, Füzuli, Laçın, Beyləqan və Xocavənd rayonları üzrə ümumilikdə, 472 min 840 nəfər tibbi müayinədən keçib, onlardan 1429 nəfər stasionar, 12 min 383 nəfər ambulator müalicəyə cəlb edilib, 712 nəfər müalicə üçün respublikanın ixtisaslaşmış xəstəxanalarına göndərilib.

Əvvəlki illərdə olduğu kimi, bu il də fevralın 15-dən etibarən əhalinin tibbi müayinəsinə başlanılıb. Müayinələri əsasən, terapevt, oftalmoloq, ginekoloq, nervpotoloq, stomatoloq, kardioloq və digər tibb mütəxəssisləri aparırlar. Vətəndaşlar ehtiyac olduqda kardioqram, ultrasəs, rentgen, laborator və sair müayinələrdən keçirilir.

Bərdə şəhər poliklinikasının müdiri Mehdi Mehdizadə AZƏRTAC-a bildirib ki, aparılan kütləvi tibbi müayinələrin insanların sağlamlığı üçün olduqca böyük əhəmiyyəti var. Belə müayinələr insanlar arasında bir sıra xəstəlikləri erkən aşkar etməyə, vaxtında və dəqiq müalicə aparmağa imkan yaradır. Sakinlər rayon mərkəzi xəstəxanasında, Müalicə Diaqnostika Mərkəzində, şəhər poliklinikasında və kəndlərdəki tibb məntəqələrində müayinə olunurlar. Bundan başqa, yüksək ixtisaslı mütəxəssislərdən ibarət həkim briqadaları tərəfindən rayonun kəndlərində əhalinin tibbi müayinəsi həyata keçirilir.

Dövlətimizin başçısının Azərbaycanın hər vətəndaşının sağlamlığına diqqəti və qayğıkeş münasibəti sakinlər tərəfindən minnətdarlıqla qarşılanır.

Bərdə rayon sakini Gülmirə Qasımova vətəndaşların sağlamlığının etibarlı şəkildə qorunması məqsədilə respublikamızda hər il keçirilən bu humanist aksiyanı yüksək qiymətləndirib: “Əvvəlki illərdə olduğu kimi, indi də poliklinikaya gələrək hərtərəfli müayinə olundum. Artıq sağlamlıq vəziyyətimlə bağlı məlumatlıyam. Dövlətimizin başçısına sağlamlığımızın qayğısına qaldığı üçün minnətdarlığımı bildirirəm”.

Laçın rayonundan məcburi köçkün Pəhlivan Məmmədov tibbi müayinələrin təşkilindən, həkim heyətindən, yaradılan şəraitdən razılıq edib: “Burada yaradılmış şəraitdən, həkimlərin səmimi, qayğıkeş münasibətindən razıyam. Aparılan müayinələr bizə sağlamlığımız barədə məlumatlı olmağımıza kömək edir, xəstəliklərin erkən aşkarlanmasına gətirib çıxarır. Sadə vətəndaşlar üçün yaradılan bu imkanlara görə dövlətimizin başçısına minnətdaram”.

Əhalinin tibbi müayinəsi mayın 15-dək davam edəcək.