Akademik Kamal Abdullayev alimlərlə görüşüb
Bakı, 8 sentyabr (AZƏRTAC). Azərbaycan Respublikasının Prezidenti yanında Bilik Fondunun Himayəçilik Şurasının üzvü, akademik Kamal Abdullayev Azərbaycanın bir qrup alimi ilə görüşüb. Fondun informasiya təminatı sektorundan AZƏRTAC-a bildiriblər ki, görüşdə Bilik Fondunun “İlboyu bilik” layihəsi müzakirə edilib. Bilik Fondunun missiyası barədə alimlərə məlumat verən K.Abdullayev “İlboyu bilik” layihəsinin məqsədi və hədəfləri barədə danışıb. O deyib: “Bu layihə Prezident İlham Əliyevin gənclərimizə himayəçilik etmələri üçün alimlərimizə verdiyi daha bir imkandır. Hər birinizin iştirakı ilə biz bilik cəbhəsində uğurlar qazanacağıq. Mühazirələrdə gənclərlə yanaşı yerli ziyalılar da iştirak edəcək və layihə o vaxt uğurlu sayılacaq ki, bölgə ziyalıları paytaxt məktəblərində mühazirələr oxuyacaqlar”.
Qeyd olunub ki, sentyabrın 15-də “İlboyu bilik” layihəsi çərçivəsində alimlərimiz, xarici ölkələrin Azərbaycandakı səfirləri müxtəlif rayonlardakı 70-dən çox məktəbdə “Azərbaycan bu gün və sabah” mövzusunda mühazirələr oxuyacaqlar.
Görüşdə müxtəlif elm sahələrini təmsil edən alimlər layihə ilə bağlı arzu və təkliflərini səsləndiriblər.
Akademik Tofiq Hacıyev layihəyə cəlb olunduğuna görə təşəkkürünü bildirib və bölgələrdə maarifləndirmə işinin gücləndirilməsinin vacibliyini vurğulayıb. O deyib: “Kamal müəllimin rəhbərliyi ilə həyata keçirilən işlərin uğurlu nəticələrinin dəfələrlə şahidi olmuşam. İnanıram ki, Bilik Fondu ölkə əhalisinin maarifləndirilməsində əhəmiyyətli rol oynayacaq”.
Professor Yusif Məmmədov təkliflə çıxış edib: “Növbəti mərhələlərdə yerlərdə sorğular vasitəsilə sosial sifarişi müəyyənləşdirsək, daha səmərəli nəticələr əldə edə bilərik”. Alim həmçinin bildirib ki, layihə bitəndən sonra monitorinqlərin aparılması mühazirələrin effektini dəyərləndirməyə imkan verəcək.
Sosioloq alim Əhməd Qəşəmoğlu Bilik Fondunun maarifçiliyə yönəlmiş bütün layihələrində həvəslə iştirak edəcəyini bildirib, alimlərin rayonlarda, ucqar kəndlərdə yerli əhali ilə görüşlərinin cəmiyyətin inkişafına böyük təkan olacağını söyləyib.
General-mayor Kamil Məmmədov “İlboyu bilik” layihəsinin gənclərdə vətənpərvərlik ruhunun yüksəldilməsində müstəsna rol oynayacağına əminliyini ifadə edib. “Alimlər bütün mühazirələrində vətənsevərliyi və azərbaycançılığı prioritet kimi götürməlidirlər ”.
Sonda alimlərin dərs deyəcəyi şəhər, qəsəbə və kənd məktəblərinin siyahısı elan olunub. Tədbirdə iştirak edən müxtəlif universitetlərin tələbə-könüllülərinə müvafiq tapşırıqlar verilib.
“İlboyu bilik” layihəsinin digər proqramının - “Qardaşlaşmış məktəblər”in icrasına sentyabrın 8-dən başlanır. Proqramın ilkin mərhələsində Azərbaycanın müxtəlif rayonlarında yerləşən 20 məktəb qardaşlaşacaq.
Bununla yanaşı, Bilik Fondu “Dini abidələrdə tarixin izləri”, “Auditoriya+”, “Ustad və şəyird ”, “Docendo discimus”, “Yaradıcılıq fakültələri”, “Epizod”, “Məscidlərdə kitabxana”, “Azərbaycan elmi xaricdə”, “Dünya elmi Azərbaycanda” layihələrini həyata keçirir.
Bölmənin digər xəbərləri
