Bakı, 24 noyabr, İbrahim Əsədov, AZƏRTAC

Azərbaycan Milli Elmlər Akademiyasının Nizami Gəncəvi adına Milli Azərbaycan Ədəbiyyatı Muzeyində dahi Azərbaycan şairi və mütəfəkkiri Nizami Gəncəvinin anadan olmasının 875 illiyinə həsr edilmiş “Nizami və dünya mədəniyyəti” mövzusunda respublika elmi konfransı keçirilib.

Muzeydə böyük şairin yaradıcılığı ilə bağlı kitab sərgisi təşkil olunub.

AZƏRTAC xəbər verir ki, tədbirdə muzeyin direktoru, Milli Məclisin deputatı, akademik Rafael Hüseynov “Nizaminin dünyası və dünyanın Nizamisi” mövzusunda məruzə ilə çıxış edib.

Akademik R.Hüseynov ümummilli lider Heydər Əliyevin böyük şair Nizami Gəncəvi yaradıcılığına daim önəm verdiyini vurğulayıb.

Nizami Gəncəvinin zəngin yaradıcılığı, Şərq və dünya ədəbiyyatındakı, mədəniyyətindəki yeri və mövqeyi, əsərlərinin əhəmiyyəti, humanist ideyaları barədə danışan alim bildirib ki, şairin qüdrətli qələmindən çıxmış poemaları müəyyən mənada XII yüzilin, böyük sənətkarın içərisində olduğu zamanın ensiklopediyasıdır. Dahi şair bəşəriyyətin bədii söz aləminə “Xəmsə” adlı xəzinə verməklə milli və bəşəri dəyərlərin tamamilə yeni bir mənzərəsini yaradıb.

Akademik R.Hüseynov böyük şair Nizaminin yaşadığı dövrdən başlayaraq xalqının, yurdunun təmsilçisi olduğunu diqqətə çatdırıb.

Nizami Gəncəvinin dünya ədəbiyyatına və mədəniyyətinə əvəzsiz töhfələr verdiyini xatırladan akademik R.Hüseynov dahi şairin yubileylərinin müxtəlif ölkələrdə də geniş qeyd olunduğunu bildirib.

AMEA-nın vitse-prezidenti, akademik İsa Həbibbəyli böyük sənətkar Nizami Gəncəvi yaradıcılığının təbliğinə göstərilən dövlət qayğısından bəhs edib.

Nizami Gəncəvinin dünya ədəbiyyatının böyük simalarından olduğunu söyləyən İ.Həbibbəyli şairin yaradıcılığının daha dərindən araşdırılmasının, onun əsərlərinin müxtəlif dillərə tərcümə edilərək dünyanın ayrı-ayrı ölkələrində geniş yayılmasının və təbliğ edilməsinin vacibliyini vurğulayıb.

Filologiya elmləri doktorları, professorlar Nüşabə Araslı, İmamverdi Həmidov, professor Xəlil Yusifli, dosent Əsmətxanım Məmmədova və başqaları Nizami yaradıcılığı ilə bağlı məruzələrlə çıxış ediblər.

Konfransın bölmə iclaslarında “Farsdilli hind ədəbiyyatına Nizami Gəncəvinin təsirləri orta əsrlər Azərbaycan-Hindistan ədəbi-mədəni əlaqələri kontekstində”, “Milli müstəqillik və Nizami yaradıcılığı dünya ədəbiyyatı faktı kimi”, “Azərbaycan şeir üslubunun yaranmasında Nizaminin rolu” və digər mövzularda məruzələr dinlənilib, müzakirələr aparılıb.