Bakı, 22 iyul (AZƏRTAC). İyulun 22-si Azərbaycan mətbuatının yaranması günüdür. Əsası Həsən bəy Zərdabi ilə qoyulan mətbuatımızın.

Bu gün Ömər Faiq Nemanzadənin, Üzeyir Hacıbəylinin, Mirzə Cəlilin imzası ilə başlayan söz dünyasının bayramıdır. Azad sözün, azad mətbuatın hökm sürdüyü bu dünyada isə daha ümdəsi və şərəflisi hər kəsin sözünün ağası olmaqdır. Dediyin sözün, yazdığın yazıda təhqirlə tənqidin sərhədini düzgün müəyyənləşdirməkdir. Mirzə Cəlilsayağı yazmaq, Sabirin təbirinlə demək, Üzeyirin publisistikasını örnək götürməkdən, onlara bənzəməkdən gözəl və şərəfli heç nə ola bilməz. 

Söz dünyası heç nəyə bənzəməyən bir aləmdir. İstəyir lap yüz, min əsrlik bir zaman kəsiyində dayansa belə əsl söz bütün zamanlarda, hər bir dövrdə belə yenidir, təzədir, tərdir. Bu aləmdə var olanlarsa sözü elə söz məqamına qaldırmağı bacaranlardır.

Azərbaycanda Milli Mətbuat Günü “Əkinçi” qəzetinin nəşrə başladığı günün şərəfinə qeyd edilir. “Əkinçi”nin 1875-ci il iyulun 22-dən 1877-ci ilin sentyabrınadək cəmi 56 nömrəsi işıq üzü görsə də, onun Azərbaycan milli mətbuatının təşəkkül tapmasında, inkişafında rolu əvəzsizdir. O vaxtdan ötən 138 ildə müxtəlif tənəzzül və intibah dövrləri keçən Azərbaycan mətbuatı daim cəmiyyətin proseslərə baxışını əks etdirən güzgü rolunu oynamışdır. 1998-ci ilin avqustunda ulu öndər Heydər Əliyevin müvafiq Fərmanı əsasında senzuranın ləğvi isə Azərbaycanda mətbuatın inkişafına ciddi təkan vermişdir.

Azərbaycan Konstitusiyasında söz və mətbuat azadlığının təməl prinsipi olaraq əksini tapması ölkədə medianın azad və güclü bir cəmiyyət institutu kimi formalaşmasına təkan vermişdir. Bütün bu proseslərin əsas iştirakçıları, əldə olunan nəticələrin əsas səbəbkarları jurnalistlərdir.

Üç il bundan əvvəl, 2010-cu ildə Azərbaycan Prezidenti İlham Əliyevin müvafiq Sərəncamı əsasında jurnalistlərin mənzil-məişət şəraitinin yaxşılaşdırılması ilə bağlı bina tikintisinə başlanılması və bu gün - mətbuatın yaranmasının 138-ci ildönümü münasibətilə keçirilən mərasimdə dövlətimizin başçısı tərəfindən mənzillərin açarlarının jurnalistlərə təqdim olunması da ölkəmizdə azad sözə, azad informasiyaya, Azərbaycan jurnalistikasına verilən qiymətin təzahürüdür.

Sonda sözünün qədrini və qiymətini bilmək arzusu ilə dəqiq, qərəzsiz informasiyanın ünvanı olan AZƏRTAC–ın bütün əməkdaşlarının timsalında özünü mətbuatın bir parçası hesab edən hər kəsi bu bayram münasibətilə təbrik edirik!