CƏMİYYƏT
Əkinçilik Elmi-Tədqiqat İnstitutunun əməkdaşları beynəlxalq seminarda iştirak ediblər
Bakı, 31 may, AZƏRTAC
Əkinçilik Elmi-Tədqiqat İnstitutunun əməkdaşları buğdanın seleksiyasına həsr olunmuş beynəlxalq seminarda iştirak ediblər.
Kənd Təsərrüfatı Nazirliyindən AZƏRTAC-a bildiriblər ki, Rusiya Federasiyasında Krasnodar-Rostov marşrutu üzrə CİMMYT, İCARDA, FAO və P.P.Lukyanenko adına Krasnodar KTET İnstitutu və “Don” Aqrar Elmi Mərkəzin birgə təşkilatçılığı ilə keçirilən beynəlxalq seminarda Azərbaycanı Əkinçilik Elmi-Tədqiqat İnstitutu, Qobustan Bitki Təcrübə Stansiyası və AMEA-nın Bitki Genetik Ehtiyatları İnstitutunun əməkdaşlarından ibarət nümayəndə heyəti təmsil edib. Ümumiyyətlə, beynəlxalq tədbirə 17 ölkənin 62 seleksiyaçı alimi və mütəxəssisi qatılıb.
Nümayəndə heyəti səfər zamanı Ümumrusiya Elmi-Tədqiqat Yağlı Bitkilər, P.P.Lukyanenko adına Krasnodar KTET və İ.Q.Kalinenko adına Ümumrusiya Elmi-Tədqiqat Dənli Bitkilər institutlarının seleksiya işləri, toxumçuluq təsərrüfatları və fermerlərin taxıl sahələri ilə yaxından tanış olub, təcrübə mübadiləsi aparılıb.
Tədbirin gedişində Krasnodar və Rostov regionlarında fəaliyyət göstərən sözügedən elmi-tədqiqat müəssisələrində Rusiyada seleksiyanın tarixi, nailiyyətləri və perspektivləri, payızlıq buğdanın yaxşılaşdırılması üzrə beynəlxalq proqramın əhəmiyyəti, Türkiyədə buğdanın seleksiyası və istehsalı, FAO-nun Mərkəzi Asiya və Rusiya regionlarında fəaliyyəti, iqlim dəyişmələri ilə əlaqədar payızlıq buğdanın seleksiyasının əsas istiqamətləri və yekunları, marker seleksiyasının əsas istiqamətləri, seleksiya işi və dünyada buğda istehsalının əsas tendensiyalarına dair təqdimatlar olub.
Seminarın axırıncı günü Əkinçilik Elmi-Tədqiqat İnstitutunun direktoru Cavanşir Təlai “İWWİP proqramı çərçivəsində Azərbaycanda aparılan seleksiya işlərinin yekunları”na həsr edilmiş təqdimatla çıxış edib. O, çıxışında Azərbaycanda kənd təsərrüfatı təyinatlı torpaqlar, son beş ildə payızlıq buğdanın təsərrüfat göstəriciləri, mövcud problemlər, aparılan seleksiya işlərinin məqsədi və prioritetləri, beynəlxalq seleksiya mərkəzləri ilə birgə yaradılmış, rayonlaşmış və seleksiya nailiyyətlərinin dövlət reyestrinə daxil olan yumşaq buğda sortları və əldə edilmiş nəticələr ətraflı danışıb.
Nümayəndə heyəti səfər müddətində Krasnodar diyarında taxıl toxumçuluğu ilə məşğul olan Timaşeyevsk, Korenovsk və Pavlovsk rayonlarında fəaliyyət göstərən kəndli fermer təsərrüfatlarında, Krasnodar ETKT İnstitutuna məxsus buğda və arpa sortları ilə qoyulmuş nümayiş əkinləri və toxumçuluq fəaliyyəti ilə yaxından tanış olub, bu istiqamətdə fikir mübadiləsi aparılıb.
Səfər müddətində əməkdaşlıq edilən tərəflərlə birgə alınmış elmi nəticələrə dair fikir mübadiləsi aparılıb, seleksiyanın çağırışları və mövcud problemləri müzakirə edilib, gələcək üçün əməkdaşlığın istiqamətləri işlənib hazırlanıb. Həmçinin sözügedən institutlarla genetik materialların mübadiləsi, buğda, arpa və soya sortlarının sınağı və kadr hazırlığı sahələrində birgə əməkdaşlıq haqqında müqavilələrin bağlanılması qərarı alınıb.
Qeyd edək ki, Əkinçilik Elmi-Tədqiqat İnstitutu 1996-cı ildən etibarən “Payızlıq buğdanın yaxşılaşdırılması üzrə beynəlxalq proqram” (İWWİP) çərçivəsində buğda seleksiyası sahəsində genetik materialların introduksiyası və mübadiləsini həyata keçirir. Bu illər ərzində həmin proqram çərçivəsində 8500-dən çox payızlıq və fakultativ yumşaq buğda nümunələri introduksiya edilib, sınaqdan keçirilib və seleksiya işlərinə cəlb olunub. Artıq müştərək sortlar (“Tale 38”, “Qızıl buğda”, “Ləyaqətli 80”) yaradılıb, rayonlaşdırılıb və seleksiya nailiyyətlərinin dövlət reyestrinə daxil edilib.