İQTİSADİYYAT
Alternativ və bərpa olunan enerji mənbələrinin istifadəsi hesabına irimiqyaslı layihələr həyata keçirilir VİDEO
Bakı, 20 oktyabr, Xatirə Cəfərova, AZӘRTAC
Azərbaycanda alternativ və bərpa olunan enerji mənbələrinin (ABOEM) istifadəsi hesabına irimiqyaslı layihələr həyata keçirilir. Bu layihələr sırasında Samux Aqro Enerji Yaşayış Kompleksi xüsusi yer tutur. Layihə özündə kənd təsərrüfatı, enerji və yaşayış sahələrini vahid bir kompleksdə birləşdirir. Kompleksin enerji təchizatında günəş enerjisi ilə yanaşı, kənd təsərrüfatı və məişət tullantıları hesabına yaranan bioenerji xüsusi çəkiyə malik olacaq.
AZӘRTAC xəbər verir ki, bu barədə Alternativ və Bərpa Olunan Enerji Mənbələri üzrə Dövlət Agentliyinin (ABOEMDA) sədri Akim Bədəlov "Alternativ enerji və enerji səmərəliliyi sahəsində investisiya imkanları və sahibkarlığın inkişafı" mövzusunda keçirilən konfransda məlumat verib.
Qeyd olunub ki, kompleksdə gücü 31 meqavat olan hibrid tipli elektrik və gücü 48 meqavat olan istilik stansiyalarının inşa edilməsi planlaşdırılır. Layihənin əsas məqsədi Samux rayonunun ABOEM hesabına enerji ilə tam təmin olunması ilə yanaşı ərzaq məhsullarının istehsalından və kompleksdə çalışan işçilərin yaşayış sahəsi ilə təminatından ibarətdir.
Ötən illər ərzində ABOEM sahəsi üzrə dövlət və qeyri-dövlət qurumları tərəfindən iqtisadi, sosial, elmi-texniki və s. yönümlü layihələr həyata keçirilib. İyirmidən çox yeni su, külək, günəş elektrik stansiyaları, digər obyektlər tikilib istifadəyə verilib.
ABOEMDA-nın sədri bildirib ki, 2004-cü ildə “Azərbaycan Respublikasına alternativ və bərpa olunan enerji mənbələrindən istifadə olunması üzrə Dövlət Proqramı”nın qəbul olunması respublikamızda ABOEM sahəsinin inkişafına güclü təkan verib. Alternativ və bərpa olunan enerji mənbələrindən istifadənin sürətləndirilməsi məqsədilə qanunvericilik və normativ hüquqi bazanın təkmilləşdirilməsi, sahə üzrə stimullaşdırıcı tədbirlərin həyata keçirilməsi və s. icra olunub.
ABOEMDA sədrinin müavini Cəmil Məlikov bildirib ki, tədbirin keçirilməsində məqsəd alternativ enerji və enerji səmərəliliyi sahəsində kredit resurslarının cəlb olunması və onların effektiv istifadə mexanizmlərini müəyyən etməkdir.
C.Məlikov alternativ enerji və enerji səmərəliliyi sahəsində kiçik və orta sahibkarlığın inkişafı məqsədi ilə kredit xətlərindən istifadə perspektivlərindən danışıb.
Konfrans çərçivəsində dövlət agentliyinin dəstəyi ilə sahibkarlığın inkişafı və bərpa olunan enerji resurslarının səmərəliliyinin yüksəldilməsi məqsədilə beynəlxalq maliyyə təşkilatlarının yerli kommersiya bankları ilə əməkdaşlığı və bu sahədə investisiya imkanları, kredit məhsullarının ölkəmizdə inkişafı mövzusuna dair təqdimatlar edilib və fikir mübadiləsi aparılıb.