İQTİSADİYYAT
Altı ayda Azərbaycanda 230 kilometr avtomobil yolları yenidən qurulub və təmir edilib
Bakı, 16 iyul, AZƏRTAC
Bu ilin 6 ayında Azərbaycanda 230 kilometr ümumi istifadədə olan yeni avtomobil yolları, prospekt və küçələr yenidən qurulub və təmir olunub.
“Azəravtoyol” Açıq Səhmdar Cəmiyyətinin (ASC) mətbuat xidmətindən AZƏRTAC-a bildirilib ki, bu barədə ASC-də 2016-cı ilin 6 ayının yekunlarına və qarşıda duran vəzifələrin icrasına həsr olunan iclasda məlumat verilib.
İclas iştirakçıları əvvəlcə ulu öndər Heydər Əliyevin ASC-nin binasındakı büstü önünə gül dəstələri qoyaraq xatirəsini ehtiramla yad ediblər.
ASC-nin sədri Saleh Məmmədov cari ilin 6 ayı ərzində Prezident İlham Əliyev tərəfindən təsdiq olunan “Azərbaycan Respublikası regionlarının 2014-2018-ci illərdə sosial-iqtisadi inkişafı” və “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqram”ları çərçivəsində yol infrastrukturunun müasirləşdirilməsi, hərtərəfli inkişafı üçün çox böyük işlər görüldüyünü və hazırda da bu tədbirlərin uğurla davam etdirildiyini vurğulayıb.
Qeyd edilib ki, dövlətimizin başçısı aparılan işlərə xüsusi əhəmiyyət verərək mütəmadi olaraq həyata keçirilən bu işlərin gedişatı ilə maraqlanır, açılış mərasimlərində şəxsən iştirak edir. Bunun bariz nümunəsi kimi son aylar Prezident İlham Əliyevin iştirakı ilə 10-a yaxın yol infrastrukturuna aid açılış mərasimlərinin keçirilməsini göstərmək olar.
Bildirilib ki, kənd və qəsəbə yollarının yenidən qurulması da xüsusi əhəmiyyət kəsb edir. Belə ki, kəndlərarası və qəsəbələrarası yolların təmiri və bərpası ilə bağlı işlərin yerinə yetirilməsi yol təmiri və tikintisi üzrə ixtisaslaşmış “Azəravtoyol” ASC-ə həvalə edilib. Bu isə yol inşaatçılarının üzərinə əlavə məsuliyyət qoyur.
Diqqətə çatdırılıb ki, 6 ay ərzində Prezident İlham Əliyev kəndlərarası avtomobil yollarının tikintisi ilə əlaqədar 15 sərəncam imzalayıb. Həmin sərəncamlara əsasən 93 yaşayış məntəqəsinin 300 minə yaxın əhalisinin gediş-gəlişi xeyli rahatlaşacaq. Ümumilikdə isə 82 şəhər və rayon ərazisində 84 kəndlərarası avtomobil yolu layihəsinin tikintisi həyata keçirilməlidir.
“Tikiləcək və yenidən qurulacaq kəndlərarası avtomobil yolunun ümumi uzunluğu - 2101,2 kilometr təşkil edir. Bu layihələrin həyata keçirilməsi 1,6 milyon əhalinin yaşadığı 859 yaşayış məntəqəsinı əhatə edəcək, onların rahat avtomobil yollarından istifadə edərək tədarük etdikləri kənd təsərrüfatı məhsullarını və meyvə-tərəvəzi sürətlə, qısa vaxt ərzində xarab olmadan istədikləri ünvanlara çatdırmağa imkan verəcək”, - deyə S.Məmmədov əlavə edib.
Qeyd edilib ki, Bakı şəhəri və ətrafı qəsəbələr üzrə bu il ərzində 721 min nəfər əhalinin yaşadığı 49 yaşayış məntəqəsini əhatə edən, ümumi uzunluğu 167,8 kilometr olan 18 şəhər və qəsəbələrarası avtomobil yollarının yenidən qurulması və tikintisi nəzərdə tutulub. Ötən 6 ay ərzində respublika ərazisində 230 kilometr uzunluğunda ümumi istifadədə olan yeni avtomobil yolları, prospekt və küçələr yenidən qurulub və təmir olunub. Dörd yeni avtomobil körpüsü tikilib, 4-ü isə təmir edilib. Bakı şəhərində ümumi uzunluğu 31,9 kilometr, yol örtüyünün sahəsi 331,9 min kvadratmetr olan 26 adda prospekt və küçə yenidən qurularaq təmir olunub. Həmin dövr ərzində Bakının 12 inzibati rayonu ərazisində 157,2 min kvadratmetrdən artıq sahədə cari təmiri işləri yerinə yetirilib.
S.Məmmədov deyib ki, yol təsərrüfatı işçilərinin işini həmişə yüksək qiymətləndirən dövlətimizin başçısı ötən illərdə olduğu kimi, bu il də 22 fevral - Avtomobil yolları işçilərinin peşə bayramı günü ilə əlaqədar olaraq bir qrup yol işçisinə əməkdar mühəndis adı verib və tərəqqi medalı ilə təltif edib. Cəmiyyətin sədri həmin şəxsləri təbrik edərək medalları onlara təqdim edib.
İclasın sonunda son aylar ərzində dövlət başçısının avtomobil yollarının yenidən qurulması istiqamətində imzaladığı sərəncamlarından irəli gələn məsələlərin həlli üçün yerinə yetirilən işlərə həsr olunmuş sənədli film nümayiş olunub.