Bakı, 28 fevral, AZƏRTAC

Əmək və Əhalinin Sosial Müdafiəsi Nazirliyində Türkiyə Respublikası Nazirlər Kabinetinin tabeliyində fəaliyyət göstərən Türk Əməkdaşlıq və Koordinasiya Agentliyinin (TİKA) Bakı Proqram Koordinasiya Ofisinin rəhbəri Adəm Urfa ilə görüş keçirilib.

Nazirliyin ictimaiyyətlə əlaqələr şöbəsindən AZƏRTAC-a bildiriblər ki, görüşdə əmək və əhalinin sosial müdafiəsi nazirinin müavini Mətin Kərimli əmək resurslarının məşğulluğunun təmin olunması, o cümlədən sosial cəhətdən həssas əhali qruplarının məşğulluğuna şərait yaradılmasının Azərbaycan Prezidenti İlham Əliyevin sosial-iqtisadi siyasətində mühüm yer tutduğunu vurğulayıb. O, Əmək və Əhalinin Sosial Müdafiəsi Nazirliyinin bu sahədə gördüyü işlər barədə məlumat verərək qeyd edib ki, TİKA ilə nazirlik arasındakı əməkdaşlıqda da həmin istiqamət xüsusi yer tutur. Son illərdə özünüməşğulluğun dəstəklənməsi sahəsində nazirliyin həyata keçirdiyi iki pilot layihədən biri TİKA ilə əməkdaşlıqda həyata keçirilib. Layihə çərçivəsində əlilliyi olan və işaxtaran kimi qeydiyyata alınmış şəxslər üçün arıçı peşəsi üzrə hazırlıq kursu təşkil olunandan sonra onların hər birinə lazımi avadanlıq və vasitələr verilib. Digər pilot layihə kimi, bu layihə də gözlənilənə uyğun olaraq özünü doğruldub. Həmin əlilliyi olanlar müəyyən müddətdən sonra özünüməşğulluq fəaliyyətindən gəlir əldə edərək vergi və sosial sığorta ödəyicisinə çevriliblər.

Görüş iştirakçılarına Azərbaycan Prezidentinin 7 aprel 2016-cı il tarixli Sərəncamı əsasında ölkəmizdə işsiz və işaxtaran vətəndaşların özünüməşğulluğunun təmin olunması sahəsində görülən işlər barədə məlumat verilib. Sərəncama uyğun olaraq ölkəmizdə işsiz və işaxtaranların ailə biznesinin qurulması üçün aktivlərlə təminatının həyata keçirildiyi bildirilib.

İslam Əməkdaşlıq Təşkilatının (İƏT) Bakıda Əmək Mərkəzinin yaradılması işləri də diqqətə çatdırılıb. Mərkəzin İƏT-ə üzv dövlətlər arasında əmək, məşğulluq və sosial müdafiə sahələrində əməkdaşlığın inkişafında əhəmiyyəti qeyd olunub. Bu mərkəzin fəaliyyətində İƏT-in Türkiyədə fəaliyyət göstərən qurumu olan İslam ölkələri üzrə Statistika, İqtisadiyyat, Sosial Araşdırma və Tədris Mərkəzi (SESRİC) ilə sıx əlaqələrin qurulmasının faydalı ola biləcəyi vurğulanıb.

A.Urfa TİKA-nın dövlət və qeyri-dövlət strukturları ilə əməkdaşlıq şəraitində kənd təsərrüfatı, turizm, institusional infrastrukturun inkişaf etdirilməsi, iqtisadi, sosial və mədəni sahələr üzrə layihələrdən bəhs edərək təşkilatın Azərbaycanda da uğurlu iş təcrübəsinin olduğunu, həmçinin sosial müdafiə və məşğulluq sahələrinə dəstək məqsədilə layihələr həyata keçirildiyini söyləyib.

Görüşdə sosial cəhətdən həssas əhali qruplarının, o cümlədən əlilliyi olan şəxslərin peşə bilik və bacarıqlarına yiyələnməsi və məşğulluq imkanları əldə etməsinin dəstəklənməsi sahəsində əməkdaşlığın gələcək istiqamətlərinə dair fikir mübadiləsi aparılıb.