CƏMİYYƏT


Əmək və məşğulluq sahəsində aparılan islahatlar Beynəlxalq Əmək Təşkilatının nümayəndələri ilə müzakirə edilib

Bakı, 20 aprel, AZƏRTAC

Əmək və Əhalinin Sosial Müdafiəsi Nazirliyində Beynəlxalq Əmək Təşkilatının (BƏT) 2016/2017-ci illər üçün Qlobal Əmək Haqqı hesabatının təqdim olunması məqsədilə ölkəmizdə səfərdə olan BƏT mütəxəssisləri Nikolas Studer və Rosalia Vazquez ilə görüş keçirilib.

Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, görüşdə əmək və əhalinin sosial müdafiəsi nazirinin müavini İdris İsayev Prezident İlham Əliyevin rəhbərliyi ilə aparılan uğurlu islahatların dünyada mürəkkəb sosial-iqtisadi vəziyyətin hökm sürdüyü şəraitdə də ölkəmizdə makroiqtisadi sabitlik və inkişafın davam etməsinə imkan yaratdığını söyləyib.

Nazir müavini əmək və məşğulluq sahəsində həyata keçirilən islahatlarda BƏT-in ratifikasiya olunmuş sənədlərindən irəli gələn prinsiplərin diqqətdə saxlandığını və təşkilatın 2016/2017-ci illər üçün Qlobal Əmək Haqqı hesabatının vacibliyini qeyd edib. O, hesabatda əməkhaqqı sahəsində mövcud dünya təcrübəsi və yanaşmalar, yeni meyllər, əməkhaqqının real dəyərindəki dəyişikliklər barədə məlumat və təhlillərin, obyektiv qiymətləndirmələrin ölkəmizdə müvafiq sahədə siyasətin təkmilləşdirilməsində əhəmiyyətli olduğunu vurğulayıb: “Əmək münasibətləri iştirakçılarının hüquq bərabərliyinin təmin edilməsi, qanuni mənafelərinin qorunması istiqamətində son illərdə sistemli tədbirlər həyata keçirilib. Görülən tədbirlər ölkənin iqtisadi yüksəlişi şəraitində əhali gəlirlərinin də mütəmadi artımına imkan verib. Dinamikanın davamı kimi, 2016-cı ildə ölkə əhalisinin gəlirləri 2015-ci illə müqayisədə nominal ifadədə 8,7, gəlirlərin əhalinin hər nəfərinə düşən həcmi isə 7,5 faiz artıb. Gəlirlərin bir hissəsi də əməkhaqqı gəlirlərindən ibarətdir və bu sahədə də müsbət dinamika ildən-ilə davam edir. Son on il ərzində respublikamızda minimum əməkhaqqının səviyyəsi 3,5, orta aylıq əməkhaqqı 3,3 dəfə artıb, o cümlədən keçən il orta aylıq əmək haqqında artım 6,9 faiz təşkil edib. Minimum əməkhaqqının vaxtaşırı olaraq artırılması təmin edilir və bu sahədə növbəti addım kimi, dövlət başçısının müvafiq Sərəncamı ilə cari ilin əvvəlindən minimum əmək haqqı 10,5 faiz artırılaraq 116 manata çatdırılıb”.

İ.İsayev ölkəmizdə dövlətin müəyyən etdiyi minimum əməkhaqqı miqdarından az əməkhaqqı verilməsinin, həmçinin işçinin işgüzar keyfiyyətləri, peşəkarlıq səriştəsi, əməyinin nəticələri ilə əlaqəli olmayan amillərə görə əməkhaqqı məbləğinin azaldılmasının qanunla qadağan edildiyini bildirib. Əhalinin gəlirlərində əməkhaqqının rolunu diqqətə çatdıran nazir müavini layiqli əməyin təmin olunması sahəsində aparılan işlərin bir istiqamətinin də məhz qeyri-rəsmi məşğulluğun və qeyri-rəsmi əmək ödənişlərinin qarşısının alınmasına yönəldiyini vurğulayıb: “Ölkə Prezidentinin bu il martın 17-də verdiyi Sərəncamla Əmək Münasibətlərinin Tənzimlənməsi və Koordinasiyası Komissiyasının yaradılması bu sahədə bir sıra vacib məqsədlərə xidmət etməklə bərabər, işəgötürən–işçi münasibətlərinin rəsmiləşdirilməsi və əməyin ödənişinin təşkilinə nəzarət mexanizmlərinin təkmilləşdirilməsində də xüsusi əhəmiyyət kəsb edir”.

BƏT mütəxəssisləri ölkəmizdə əmək və məşğulluq sahəsində həyata keçirilən islahatların rəğbətlə qarşılandığını və əməkdaşlıq əlaqələrinin davamlılığından məmnun olduqlarını ifadə ediblər.

Görüşdə BƏT-in 2016/2017-ci illər üçün Qlobal Əmək Haqqı hesabatında əksini tapan məsələlər və ölkəmizdə əməkhaqqı siyasəti ilə bağlı fikir mübadiləsi aparılıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.