Masallı, 4 may, Bağır Əliyev, AZƏRTAC

Mayın 4-də Masallı şəhərindəki Heydər Əliyev Mərkəzində Əmlak Məsələləri Dövlət Komitəsinin təşkilatçılığı ilə Azərbaycanda torpaqların elektron kadastr uçotu informasiya sisteminin yaradılması ilə bağlı işgüzar forum keçirilib.

AZƏRTAC xəbər verir ki, tədbir iştirakçıları əvvəlcə cəbhə bölgəsində döyüşlərdə şəhid olmuş Milli Ordunun hərbi qulluqçularının xatirəsini bir dəqiqəlik sükutla yad ediblər.

Forumda çıxış edən Masallı Rayon İcra Hakimiyyətinin başçısı Rafil Hüseynov “Azərbaycan Respublikasında torpaq münasibətlərinin tənzimlənməsi sahəsində əlavə tədbirlər haqqında” Azərbaycan Respublikası Prezidentinin 2016-cı il 7 mart tarixli Fərmanı ilə təsdiq olunmuş “Azərbaycan Respublikasında torpaqların elektron kadastr uçotu informasiya sisteminin yaradılması və rəqəmsal kadastr xəritəsinin tərtib olunması qaydaları” haqqında məlumat verib.

Qeyd olunub ki, həmin qaydalara əsasən dövlət və bələdiyyə mülkiyyətində, habelə xüsusi mülkiyyətdə olan bütün kateqoriyalı torpaqların uçotunun aparılması və xəritələşdirilməsi yolu ilə torpaqların elektron kadastr uçotu informasiya sisteminin yaradılması və rəqəmsal kadastr xəritəsinin tərtib edilməsi işlərinin 2020-ci ilədək başa çatdırılması nəzərdə tutulub. Fərmana əsasən yerli icra hakimiyyəti orqanlarına və bələdiyyələrə tapşırılıb ki, Azərbaycan Respublikasında torpaqların elektron kadastr uçotu informasiya sisteminin yaradılması ilə əlaqədar torpaq və digər daşınmaz əmlak mülkiyyətçilərinə, icarəçilərinə və istifadəçilərinə görülən işlərin mahiyyəti və nəticələrinin izahı ilə bağlı təşkilatı dəstəyi təmin etsinlər. 2016-cı ildə 10 rayonda, o cümlədən Masallıda bu işlərin icrasına başlanılması qərara alınıb.

Forumda çıxış edən Daşınmaz Əmlakın Kadastrı və Ünvan Reyestri Xidmətinin rəisi Ramiz Quliyev qeyd edib ki, görülən işlər Azərbaycan Respublikası Prezidentinin torpaqların elektron uçotunun aparılması ilə bağlı tapşırıqlarına və 2016-cı il 7 mart tarixli Fərmanına əsasən həyata keçirilir. Fərmanda torpaq münasibətlərinin səmərəli tənzimlənməsi istiqamətində torpaqların elektron kadastr uçotu informasiya sisteminin yaradılması və ölkə üzrə rəqəmsal kadastr xəritələrinin tərtibi qaydaları da əksini tapıb.

Eyni zamanda, torpaqların elektron uçotu ilə əlaqədar ictimaiyyətin maarifləndirilməsi, görülən işlər barədə məlumatlandırma tədbirləri həyata keçirilir. Bu baxımdan işgüzar forumlar bütün respublika üzrə davam etdiriləcək.

R.Quliyev qeyd edib ki, müasir coğrafi informasiya sistemləri, geodeziya avadanlıq və cihazları tətbiq edilməklə hazırda dövlət, xüsusi və bələdiyyə mülkiyyətində olan bütün kateqoriyalı torpaqların elektron uçotu aparılır.

Diqqətə çatdırılıb ki, elektron kadastr xəritələrinin tərtibi işləri həyata keçirilir. 2016-cı ildə bu işlər respublikanın 23 rayonunda icra ediləcək. 2019-cu ilin sonunadək ölkənin 3 milyon 200 min hektar ərazisində dəqiq torpaq uçotu işləri aparılacaq. Torpaq uçotu işləri yekunlaşmış Bakı, Sumqayıt, Gəncə şəhərlərinin bələdiyyə xəritələrinin tərtibinə başlanılıb.

Uçot sisteminin gələcək nəticələri və ölkə iqtisadiyyatına səmərəsi barədə məlumat verən R.Quliyev bildirib ki, 2020-ci ilədək Azərbaycanın bütün torpaqlarının uçotu yekunlaşacaq, torpaqlar təkcə kəmiyyətinə görə deyil, eyni zamanda, keyfiyyət göstəricilərinə görə də qeydə alınacaq. Bu sistemin mövcudluğu və rəqəmsal kadastr xəritələrinin istifadəyə verilməsi, ölkədə kadastr xidmətinin də bütövlükdə elektron xidmətlər sırasına keçməsinə şərait yaradacaq.

Sistem özündə torpaqların dəqiq sərhədləri, həndəsi ölçüləri, konfiqurasiyası, koordinatları, mülkiyyət mənsubiyyəti, kateqoriyası, mühafizə zonaları, kadastr xəritələri, keyfiyyət və iqtisadi göstəricilər və digər məlumatlar əks etdirir. Həmçinin sistem torpaqların kəmiyyət və keyfiyyət göstəricilərində baş verən dəyişiklikləri müəyyənləşdirməyə, torpaqlardan məqsədli təyinatına və hüquqi rejiminə uyğun istifadəyə və onların mühafizəsinə nəzarət etməyə imkan verir. Torpaqların münbitliyinin bərpası və artırılması istiqamətində səmərəli tədbirlərin görülməsinə, torpaq ehtiyatlarının kəmiyyət göstəricilərini müəyyənləşdirməyə, torpaq balansını tərtib etməyə zəmin yaradır.

Diqqətə çatdırılıb ki, bu işlər nəticəsində torpaq ehtiyatlarının idarə edilməsinin, əmlak münasibətlərinin tənzimlənməsinin dövlət mexanizmi təkmilləşəcək. Torpaqların sənəd göstəriciləri ilə faktiki yerləşmə vəziyyətinə dair göstəriciləri arasındakı uyğunsuzluqlar aradan qaldırılacaq. Əmlak (torpaq) üzərində hüquqların dövlət qeydiyyatı işi daha da sadələşəcək.

Görülən işlər nəticəsində “plan-ölçü” sənədinin verilməsi işi elektron xidmətlər sırasına daxil ediləcək. Torpaq münbitliyinin artırılması, qorunması ilə əlaqədar kompleks tədbirlərin həyata keçirilməsi üçün mötəbər məlumat bazası yaranacaq. Torpaqla bağlı stimullaşdırma tədbirləri, subsidiyaların, güzəştli kreditlərin verilməsi sistem məlumatları əsasında aparılacaq.

Tədbirdə torpaqların elektron kadastr uçotu sisteminin yaradılması və rəqəmsal kadastr xəritələrinin tərtibi ilə bağlı slayd şou nümayiş etdirilib.

Forumda mövzu ilə bağlı müzakirələr aparılıb, suallar cavablandırılıb.