REGİONLAR
Əmlak Məsələləri Dövlət Komitəsi növbəti “Kütləvi çıxarış” kampaniyasını Yevlax rayonunda keçirib
Yevlax, 28 sentyabr, AZƏRTAC
Əmlak Məsələləri Dövlət Komitəsi bölgələrdə əmlakların kütləvi qaydada çıxarışlarla təmin olunmasını davam etdirir.
AZƏRTAC xəbər verir ki, növbəti “Kütləvi çıxarış” kampaniyası sentyabrın 28-də Yevlax rayonunun Xaldan qəsəbəsində keçirilib. Kampaniya zamanı 120-yə yaxın vətəndaşa xidmət göstərilib. Qəsəbənin 70-ə yaxın sakininə onların mülkiyyətinə dair hazır çıxarışlar təqdim olunub. Bu çıxarışlar pay torpaqları, həyətyanı torpaq sahələri, vaxtı ilə kolxoz və sovxozlar tərəfindən ayrılmış torpaqlar, fərdi həyət evi və digər daşınmaz əmlaklara aid olub. 50-yə yaxın qəsəbə sakinindən isə onların əmlakı ilə bağlı ilkin mülkiyyət sənədləri qəbul edilib. Bir neçə vətəndaşa evlərdə xidmət göstərilib. Belə ki, komitənin mobil ofisləri vasitəsilə mütəxəssislər bir neçə fiziki məhdudiyyətli vətəndaşın evinə gedərək çıxarışları elə onların evində təqdim edib.
Kampaniya zamanı hüquqi yardım aksiyası çərçivəsində qeydiyyat barədə vətəndaşları maraqlandıran suallar aydınlaşdırılıb, zəruri hüquqi qaydalar izah edilib. Eyni zamanda, torpaq sahələrinin sərhədlərinin dəqiqləşdirilməsi, müvafiq yer quruluşu, inventarlaşdırma və kadastr işlərinin aparılması xidmətləri də göstərilib.
Qeyd edək ki, kampaniya ilə yanaşı, bütün respublika üzrə fərdi qaydada mobil ofis xidmətləri də əhaliyə təqdim olunur. Mobil ofis xidmətlərinin ən vacib cəhəti onun bütün rayonları və kəndləri əhatə etməsidir. Bu xidmətlərə ilkin sənədlərin toplanması, çöl-ölçmə və inventarlaşdırma işləri, hüquqi maarifləndirmə və digər xidmətlər daxildir. Bununla da, vətəndaşın qeydiyyat üçün əlavə vaxt sərf edərək ərazi idarəsinə gəlməsinə, gündəlik işlərindən tamamilə ayrılmasına ehtiyac qalmır.
Kampaniyanın müntəzəm keçirilməsi hüquqi qeydiyyatlı əmlakların sayının artmasına, paytaxtla yanaşı, regionlarda da leqal əmlak dövriyyəsinin və daşınmaz əmlak bazarının aktivləşməsinə gətirib çıxarır. Əmlakın biznes alətinə çevrilməsi, girov, vərəsəlik və digər hüquqi əməliyyatlar zamanı əmlakdan hüquqi maneəsiz istifadə edilməsi imkanını yaradır. Əvvəllər çıxarışın olmaması səbəbindən alqı-satqı prosesinə cəlb edilə bilməyən əmlaklar bu kampaniya sayəsində yenidən rahat şəkildə hüquqi qaydada alqı-satqı edilə bilir. Eyni zamanda, kampaniya çərçivəsində vətəndaşlara əmlakın qeydiyyatının gətirdiyi üstünlüklər haqqında da məlumat verilir.